KALEWANAIK 3 - BUKUIT NE TILIIL Sireet ne Dutero Kanon

Porotosyek alak che punu ng'omnateet

¹ Weeriinnyu, ameutyee kaneetisyennyu, ago ingoriip `muguleldang'ung' ng'atuutikyuk;

² amu tesun chooto chaang'indap peetuusyek, kenyiisyegap sabeet ak kaalyeet.

³ Amecham koistoenengei rireenet ak iman. Ratyi kaating'ung', sirchi muguleldang'ung'.

⁴ Si inyooru anyun chameet ak kaguiyet ne myee eng' taitap Kamuktaindet ak piik.

⁵ Imang'u Kamuktaindet ne Toroor eng' muguleldang'ung' tugul, ametiegei naeng'ung'.

⁶ Ng'aany ineendet eng' ortinweguk tugul, si kolitiitu ortinweguk.

⁷ Amendegei inyegei ile ii utaat; iywei Kamuktaindet ne Toroor, ak iistoegei yaityo.

⁸ Egu niito anyun chametapkei ne po mugeng'ung', ak koek mwanik eng' koweguk.

⁹ Konyitee Kamuktaindet ne Toroor tuguuguk, ak eng' tongoanigap rurateng'ung' tugul;

¹⁰ si konyi chogeniguk eng' aiyebindo, ak kong'irtagei divaik che leelach eng' ole ituisye.

¹¹ Weeriinnyu, amesas katigonetap Kamuktaindet ne Toroor, ameng'et eng' kateunennyi;

¹² amu iteechin Kamuktaindet ne Toroor age tugul ne chamei, ko uu ye iteechin kwanda weeriinnyi ne poiboitune.

¹³ Paibai chiito ne nyooru utaatyet, ak chiito ne nyooru kaguiyet.

¹⁴ Amu siirei chemung'arainateet ne po ng'omnateet ne po fedha, ak siirei keljinet ne kenyoorunee nooto thahabu che korooron.

¹⁵ Po kamanuutyet ne oo ineendet kosiir koiik che kiguure peninim, ak tuguuk tugul che imache koma mi che kiroge ng'omnateet.

¹⁶ Mi eunnyi ne po tai chaang'indap peetuusyek; komi eunnyi ne po kaataam mogornatosyek ak teegisto.

¹⁷ Po kagasetapkei ortinwekyik, ak kaalyeet ortinwekyik tugul.

¹⁸ Ineendet ko keetitap saboondo eng' icheek che namei, ak paibai age tugul ne namegei ak ineendet.

¹⁹ Ki lum `Kamuktaindet ne Toroor ng'wony eng' utaatyet, ki igimit kipsengwet eng' kaguiyet.

²⁰ Kipcheak rirosyek eng' naennyi, ak isaau poolik rewoot.

²¹ Weeriinnyu, amengoistoenengei chooto eng' taing'ung'; isup utaatyet ne ititaat ak ruchiinet.

²² Egu anyun chooto saboondo eng' muguleldang'ung', ak koek myeeindo eng' kaating'ung'.

²³ Iwendote anyun oreng'ung' eng' chametapkei, ama riichin kiy.

²⁴ Meiywei kiy ye irue; ye iru, koanyinyitu rwondang'ung'.

²⁵ Amearageni eng' ne cheein, anan eng' ng'emisyetap kiptengeginik ye kait.

²⁶ Amu egu Kamuktaindet ne Toroor kamang'uneng'ung', ak koriibei ineendet keeldong'ung' ama ki nam.

²⁷ Ameetee myeeindo che nyoljin kigoochi, ye itinye kimnateet ne iyae.

²⁸ Ameleenji chiitap kokweng'ung', “Ui, si iweege, si agoonin mutai.” Ye itinye kiit ne machei.

²⁹ Amechopchi yaityet chiitap kokweng'ung', amu menyei ole neegiteenen eng' chametapkei.

³⁰ Amobeelgei ak chii puch, ngot koma yaun kiy ne ya.

³¹ Amat koamjin ng'etkong' chiito ne koroom, amelewen age tugul eng' ortinwekyik.

³² Amu wechei `Kamuktaindet ne Toroor ngelelyot, ago mi ung'ootikyik ak piigap iman.

³³ Mi chubetap Kamuktaindet ne Toroor kootap kiptengekyot; ago iberuuri meng'ootetap piik che po iman.

³⁴ Chotei ineendet iman chotiik, ago igoochin myeeindo che iming'inegei.

³⁵ Punjin toroornatet piik che utaatiin, ago egu teweernateet etunatetap che perber.