KALEWANAIK 29 - BUKUIT NE TILIIL Sireet ne Dutero Kanon

¹ Ineendet ne iuuiiti kaatinnyi, ko kageger kong' konyil che chaang', ko yaitu eng' chokyinet, ama mi kiy ne kinyae.

² Ye pounisye che po iman ko poiboitu piik; ago tigendos piik ngo pounis chiito ne ya.

³ Iboiboi kwanda age tugul ne chamei utaatyet; ago iseerseeri tuguuk ineendet ne namegei ak chepkugonik.

⁴ Igimiiti emet laitoryat eng' kirwooknateet, ago igabui emet ineendet ne taachei tuguuk che ki koigoisye.

⁵ Chiito ne ilasu puch chiitap kokwennyi ko iitochin keelyekyik mesteet ne regereiywot.

⁶ Miitei mesteet pistoetap chiito ne ya; ago tyeni ak kobaibai chiito ne po iman.

⁷ Ibwaati chiito ne po iman ng'aleegap kibananook; ma tinyei kaguiyet kiptengekyot konai nooto.

⁸ Peelei nganaseet chotiik, ago kirindoi piik che utaatiin nereegek.

⁹ Ngot kotinyei kabeletapkei chiito ne utaat ak chiito ne perber, ngot konereechi anan ngo roryei, koma mi kamuung'et.

¹⁰ Wechei piik che tumdoi korotiik, chiito ne ititaat, ak cheeng'ei kobar chiito ne po iman.

¹¹ Iboortoi chiito ne perber nereegekyik tugul, ago pou ak kosiisei eng' chooto, chiito ne utaat.

¹² Ngot koepchi iit pounindet lembeita, koyaagitu otwogikyik tugul.

¹³ Tuitos kibagenge kibananiat ak usiindet: ikweng'jin Kamuktaindet ne Toroor konyegap icheek tuwai.

¹⁴ Ki kimiiti agoi koigeny laitornatetap laitoryat ne irwookyin kibananook eng' imanda.

¹⁵ Ibu kirokto ak kereetap kong' utaatyet, ago iteweeri kamet lakweet ne kigoochin koboigei.

¹⁶ Ye tesak kiptengeginik, ko tesoksei pistoet, ago keerei che po iman kabutennywa.

¹⁷ kergong' weeriing'ung', si kogoonin kamuung'et; si kobaibai saboondang'ung'.

¹⁸ Petyoti piik eng' ole ma mi ng'ang'utyet, ago paibai ineendet ne riibei ng'atuutyet.

¹⁹ Ma kitigonee ng'aleek otwogindet, amu nganda iguitos, koma kase iit.

²⁰ Tos igeere chii ne sartae ng'aleekyik? Miitei kamang'unet eng' chiito ne perber kosiir ineendet.

²¹ Ineendet ne riibei komyee otwogindennyi kobooch kota ko lakwa kotun koegu weeriit eng' let.

²² Ing'eeti pooryeet kimnereekyat, ak ko nyiei pistoet chiito ne koroom.

²³ Iming'ini chii `menatennyi, ago nyooru teegisto ineendet ne iming'inegei.

²⁴ Wechei saboondanyi ineendet ne tinyei yamdaet ak choriindet; kasei chubisyet ama twegu.

²⁵ Ibu mesteet kaiyweisyet ne kiywei chii, ago nyooru chametapkei age tugul ne imang'u Kamuktaindet ne Toroor.

²⁶ Cheeng'ei che chaang' myeeindo eng' pounindet, ago punu Kamuktaindet ne Toroor kirwoogetap chii.

²⁷ Wechei che po iman ne ma po iman: wechei ne ya ne isubi iman.