KALEWANAIK 26 - BUKUIT NE TILIIL Sireet ne Dutero Kanon

¹ Ko uu ye ma namegei teluji ak kemeut, ama namegei ropta ak peetuusyegap kesisyet, ko uu nooto, ma nyooljin teegisto chii ne perber.

² Ko uu ye ma ombenoti puch chepkelembut, anan ko uu ye ma tirirenoti puch kibiswet, ko uu nooto, ma namei chii chubisyet ne po puch.

³ Ko uu ye po `kipchoritiit paraisiit, ak ko uu ye po `karnetap kutit sigiryet, ko uu nooto, po `kirokto chiito ne perber.

⁴ Amewolji ne perber ko uu perberyennyi, si meige ineendet aginye.

⁵ Wolji ne perber ko uu perberyennyi, si ma iitkei ineendet kole utaat eng' losennyi pogei.

⁶ Ineendet ne iyooktoe ng'olyoot chiito ne perber ko uu ye tilei keelyekyik anan koeei ng'emisyet.

⁷ Ko uu ye songinindos keelyegap ne ing'wali; ko uu nooto kalewenet eng' kutusweegap che perber.

⁸ Ineendet ne igoochin teegisto chiito ne perber, ko uu chiito ne indoi koita porowet ne ki wiirtoisye.

⁹ Uu kateet ne toorei eutap kibogityot, kalewenet eng' kutusweegap che perber.

¹⁰ Uu mwogindet ne iguoteni tugul, ineendet ne siirei ne perber anan che siirtoi, koboisyechi.

¹¹ Uu seset ne weekyingei kang'undaikyik, ineendet ne perber ne ketyingei perberyennyi.

¹² Tos igeere chiito ne iityingei kole utaat eng' losennyi pogei? Miitei kamang'unet eng' chiito ne perber kosiir ineendet.

¹³ Mwaei ne choriren kole, “Mi ng'etundo ooreet; mi ng'etundo ortinwek che paraen.”

¹⁴ Ko uu ye weegegei kereiywotap kurgeet kariikyik che namei, ko uu nooto weechegei chiito ne choriren eng' itogunnyi.

¹⁵ Unyei keunnyi eng' taabeet chiito ne choriren; ng'etei ineendet si ma inde kutinnyi.

¹⁶ Iityingei chiito ne choriren kole ng'oom eng' losennyi pogei kosiir piik tisap che imuuchi kowol kiy.

¹⁷ Uu ne namei itigap seset, ineendet ne siirtoi, ak koiimgei eng' pooryeet ne ma nenyi.

¹⁸ Uu chiito ne amei iywek ne wiirtoi kegenganik, kipchabonik ak meet;

¹⁹ chiito ne iberberi chiitap kokwennyi, ak kole, “Ka urereni?”

²⁰ Meei maat ye ma mi kweenik; ak siisei pooryeet eng' ole ma mi chaamindet.

²¹ Ko uu ye tesei `nesek ng'etetyot ak ko uu ye tesei `kweenik maat; ko uu nooto, tesei suryet `chiito ne poliin.

²² Uu amitwogik che anyiny ng'aleegap chaamindet, ak pendi ng'aleechooto moet oriit.

²³ Uu tereetap meneet ne ki kiliige michikyigek che kigenendoe fedha, kutitap chemwai kuut kobooto muguleldo ne ya.

²⁴ Iberberisyei eng' ng'aleekyik chiito ne wegisyei, ago konorchingei ng'aalseet;

²⁵ ye kamwa che myach, ko meyan ineendet; amu miitei muguleldanyi tuguuk tisabu che po wegeet.

²⁶ Agot ngo tugegei wegeet eng' ng'aalseet, ko tuun keng'aanyei yaityennyi eng' taitap tuiyet.

²⁷ Ibutyin keriinget age tugul ne palei keriinget; ak koweekyingei koita ineendet ne mildoi.

²⁸ Wechei ng'elyepta ne mwaei lembech icheeget che kagoguoten; ak ibu ng'emisyet chiito ne chemwai kuut.