KALEWANAIK 25 - BUKUIT NE TILIIL Sireet ne Dutero Kanon

Mwautigap utaatyet

¹ Kalewenaigap Solomon chuuto ak icheek, che kisirei piigap Hezekiah laitoryatap Judah.

² Toroornatetap Kamuktaindet kouny kiy, ago toroornatetap laitorinik kocheeng' ng'olyoo age tugul.

³ Ko uu ye ma isiagaksei toroorindap kipsengwet, ak looindap ng'wony, ko uu nooto agine mugulelwegap laitorinik.

⁴ Kenende michikyigek eng' fedha, si kobiit tereet ne po katiliilindetap fedha.

⁵ Iste kiptengekyot eng' taitap laitoryat, si ki kimiit eng' imanda ng'echerennyi ne po laitornatet.

⁶ Amelasuge eng' taitap laitoryat, anan itonon eng' komostap piik che eecheen.

⁷ Amu kaigai ngeleenjin, “Togosu,” kosiir kiming'inin eng' taitap pounindet, Kiit ne kaigeer eng' konyeguk.

⁸ Amat isip iyai pooryeet, si ma petun kiit ne iyae eng' let, ye kagoteweerin chiitap kokweng'ung'.

⁹ Orwooch ak chiitap kokweng'ung' ineegei, amat ing'aany ung'ootyetap chiito age;

¹⁰ si ma iteweerin ineendet ne kasei, ak konamin teweernateng'ung'.

¹¹ Ng'olyoot ne kemwaei eng' sait ne nyolu ko uu logoegap thahabu che mi kerebonigap fedha.

¹² Uu munaiyetap itit ne po thahabu, ak lelestap thahabu che korooron, kotigonindet ne utaat ne kere kong' itit ne kase iit.

¹³ Uu kaitityetap teluji eng' peetuusyegap kesisyet, chiito ne kiyooktoi ne kiyani, eng' icheek che iyooktoi ineendet; amu igoigoi saboonwegap kiptainikyik.

¹⁴ Uu poolik ak usoonet ne ma tinyei ropta, ne ilasunegei konunoikyik eng' lembech.

¹⁵ Kigoigoi kirwoogindet eng' muitaet ne oo, ak iriei ng'elyepta ne tala kowet.

¹⁶ Ngot inyooru kumyat, iam che tee che yamin; si mebiye ak ing'ung'u.

¹⁷ Ametyech kootap chiitap kokweng'ung' kotugul; si ma ng'et agobo inyee ak kosasin.

¹⁸ Chiito ne paoryanjin chiitap kokwennyi eng' lembech ko kergei ak kiriswet, ak rotwetap chok, ak kipchabet ne ng'atip.

¹⁹ Uu keldet ne kigoil, ak keeldo ne ki kobunuk kamang'unet ne kimang'u chiito ne ma kiyani eng' peetuutap nyalilda.

²⁰ Ineendet ne tyenjin tyenwogik muguleldo ne nyigiis ko uu chiito ne ireegu ngoryeet eng' peetuusyegap kaitityet, ak ko uu siki che kiroong'jin moet.

²¹ Ngo am rubeet punyondeng'ung', ibai; ak ngo am melel, inage koe;

²² amu irurukyini ng'etetyot metinnyi, ak kogeerun Kamuktaindet ne Toroor.

²³ Ibu ropta usoonetap murot kaataam, ibu ko uu nooto chemerereet nereegek.

²⁴ Kaigai kemeny taban eng' koot parak, kosiir kemeny koot ne oo ak kwondo ne poliin.

²⁵ Uu peek che kaitit eng' ne amei melel, logoiywek che myach che punu emet ne loo.

²⁶ Uu kondap peek ne kanyi ng'atatyat anan kondametutap peek ne tururot chiito ne po iman ne igoochingei kiptengekyot.

²⁷ Ma myee keam kumyat ne oo; anan kocheeng'jingei chii teegisto ne siirtoot.

²⁸ Uu nganaseet ne kigebut, ne ma tinyei irimeet chiito ne ma riibegei.