KALEWANAIK 23 - BUKUIT NE TILIIL Sireet ne Dutero Kanon

-6-

¹ Ye oamisye ak pounindet, komeutye ile omi ak ng'o.

² Ngo ii kipkeiya, inde rotweet moktang'ung'.

³ Amat imach amitwogigap pounindet che anyiny; amu imuuch kaberberin amitwogichooto.

-7-

⁴ Ngot itinye utaatyet ne ititaat; komeimigei ile asi iegu mogoryo.

⁵ Ye iyaat konyeguk igeer, koma komi? Amu yachingei mogornateet kebebaik, tirireni ko uu kipsiichit kotokyingei parak.

-8-

⁶ Ameam amitwogigap ineendet ne tinyei kong' ne ya, amemach amitwogikyik che anyiny,

⁷ amu uu ineendet kabwaatutikyik. Leenjinin, “Amisye ak ieeise!” ago ma mi muguleldanyi kobooten.

⁸ Ing'ung'u kererutyet ne keam, ak kobetyo ng'aleeguk che anyiny.

-9-

⁹ Amat ing'alaal kogasei ne perber; amu sasei utaatyetap ng'aleeguk.

-10-

¹⁰ Ameiste kiwoteet ne po keny; anan irep mbareenigap che ma tinyei kwanisyek,

¹¹ amu kiim katyagindennywa; tononjin icheek eng' ng'aleek kogirindoin.

-11-

¹² Igoochi muguleldang'ung' kaneetisyet, ak igoochi itiiguk kogas ng'aleegap ng'omnateet.

-12-

¹³ Ameesye igerkong' lakweet, amu ma meei ngibir.

¹⁴ Piree kirokto, si isaru saboondanyi eng' ye mi che ki kobek.

-13-

¹⁵ Weeriinnyu, ngo utaat muguleldang'ung', ko paibai agine muguleldanyu.

¹⁶ Eng' iman koboiboitu muguleldanyu, ye kemwa tuguuk che po iman.

-14-

¹⁷ Amat koam ng'etkong' muguleldang'ung' agobo kiptengeginik, ago konyit Kamuktaindet ne Toroor peetuut komugul.

¹⁸ Amu miitei iman melekto, ama ki istoi kamang'uneng'ung'.

-15-

¹⁹ Kas anyun, weeriinnyu, ak isich utaatyet, ak indochi muguleldang'ung' eng' ooreet.

²⁰ Amotebi ak eeigap divaik, kobooto kipkeinik che amei panyeek.

²¹ Amu egu ponoonik kibogitinik ak kipkeinik, ak ilaakyin rwondo chiito mararenik.

-16-

²² Epchi iit kwandang'ung' ne kisichin, amesas komet ko kagoosit.

²³ Al imanit, amealde, ee, al utaatyet, kaneetisyet ak kaguiyet.

²⁴ Paibaitu miising' kwandap ne po iman, ak ineendet ne sichei lakweet ne utaat, kobaibaitune ineendet.

²⁵ Ingogaskei kwandang'ung' ak kamenng'ung', ingobaibait kamenng'ung' ne kisichin.

-17-

²⁶ Weeriinnyu, koono muguleldang'ung', ingobaibaitune konyeguk ortinwekyuk.

²⁷ Amu keriinget ne loo chepkugoniot, keriinget ne mariich kwondo ne ma neng'ung'.

²⁸ Ee saptoi ko uu rebindet, ak kotesei kaberberik eng' piik.

-18-

²⁹ Ng'oo ne riirei koleen, Pwo! Ng'oo ne arageni? Ng'oo ne polei? Ng'oo ne ing'unyng'unyi? Ng'oo ne ki kiguoten puch? Ng'oo ne piriireen koonyek?

³⁰ Icheek che eei divaik agoi, icheek che cheeng'oti maiyek che purugotin.

³¹ Ameiit maiyek ye kagobiriritu, ye taagu itoondanyi eng' kigombet, ye rektoi komyee.

³² Eng' let kosus ko uu ereneet, ak kouut ko uu melmeldo.

³³ Keerei konyeguk karusyek, ak komwa muguleldang'ung' tuguuk che imaasotin.

³⁴ Ee, iigeitu ineendet ne rue nyanjet kween, anan ko uu ineendet ne rue toloitap moinget.

³⁵ Ile, “Kagokwera, ago ma ama kiy, kagobira, ama agas. Agosu au, si acheeng'at kogeny?”