KALEWANAIK 22 - BUKUIT NE TILIIL Sireet ne Dutero Kanon

¹ Kaigai kelewen kainet ne myee kosiir mogornatosyek che chaang'; kaigai kelewen myeeindo ne po chamyet kosiir fedha ak thahabu.

² Ni ne amdoi mogoreek ak kibananook: Kamuktaindet ne Toroor yaindetap icheek tugul.

³ Keerei chiito ne ng'oom yaityet ak kounygei; ago siirtoi abusanik ak konyoor nyalilda.

⁴ Melektap kaming'inetapkei ak kaiyweisyet ne kiywei Kamuktaindet ne Toroor, ko mogornatosyek, teegisto ak saboondo.

⁵ Mi katook ak mestonok ooreetap chiito ne imaasat; looitune chooto ineendet ne riibei saboondanyi.

⁶ Ineet lakweet koosup ooreet ne nyolu kobun, ak ma pagaaktoi agot ye kagoosit.

⁷ Ko uu ye pou `mogoryot kibananook, ko otwogindetap chiito ne pesendoi, ne peseni.

⁸ Ineendet ne koolei tengekto kogesei nyalilda, ak petei kirokto ne po nereeknatennyi.

⁹ Kiberuuri chii ne aiyeep, amu igoochin amitwogikyik kibananiat.

¹⁰ Oon chotindet, si kobet polateet, ee, siisei pooryeet ak teweernateet.

¹¹ Ineendet ne chamei tiliilindap muguleldo ak myeeindap kutinnyi ko egu anyun laitoryat chorwennyi.

¹² Riibei konyegap `Kamuktaindet ne Toroor ineendet ne tinyei naet, ago igabui ng'aleegap chiito ne kaberberindet.

¹³ Mwaei chiito ne choriren kole, “Mi ng'etundo saang'! Kibara eng' ooreet.”

¹⁴ Keriinget ne loo kutitap chepkugoniot; ibutyin yooto ineendet ne nereekyin `Kamuktaindet ne Toroor.

¹⁵ Ki kiratyi perberyo muguleldap lakweet; ago oonei kirokto ne po kergong'yet kolooit eng' ineendet.

¹⁶ Ineendet ne usei kibananiat si kotesak tuguukyik, ak kogoochin tuguuk mogoryot, koegu kibananiat.

Mwautigap che utaatiin

¹⁷ Ep iit, si kobiit igas ng'aleegap piik che utaatiin, ak itokyi muguleldang'ung' naennyu.

¹⁸ Amu myee ngot iriip eng' oriing'ung', ngo kimegitu tugul eng' kuting'ung'.

¹⁹ Si kobiit imang'u Kamuktaindet ne Toroor, kaaboorun rani chuuto, ee, kaaboorun.

²⁰ Tos ma asirun tuguuk che korooron che po kirwoogutik ak naet.

²¹ Kogoonin inai imanitap ng'aleegap iman, si kobiit imuuch iwolji ng'aleegap iman icheek che koiyoogun?

-1-

²² Amat irebe kibananiat amu panan, anan ius eng' ormariich ne kinyaliili.

²³ Amu ng'alaaldochin `Kamuktaindet ne Toroor icheek, ak koluul saboonwegap icheek che luulei.

-2-

²⁴ Amenam chorwandit ak chiito ne nereechi, amat obendate ak chiito ne tinyei nereegek,

²⁵ si meneetkei ortinwekyik, ak inyooru mesteet ne po saboondang'ung'.

-3-

²⁶ Amat iegu agenge eng' icheek che iyastos konamegei eunek, anan agenge eng' icheek che tononjin piik agobo pesenaik.

²⁷ Ngot ko metinye che iyaaktoe, ko amu nee anyun si koibenen itogung'ung'?

-4-

²⁸ Ameiste kiwoteet ne po keny, ne kichobei kwanisyeguk.

-5-

²⁹ Tos igeere chiito ne igiiljingei poisyennyi? Tononi ineendet eng' taitap laitorinik; ma tononi eng' taitap piik che ma taagunotiin.