KALEWANAIK 21 - BUKUIT NE TILIIL Sireet ne Dutero Kanon

¹ Uu ainoosyek muguleldap laitoryat eng' eutap Kamuktaindet ne Toroor; imuti kotokyigei oldo tugul ole machei.

² Leen chii po iman poisyonikyik tugul, ago keerei `Kamuktaindet ne Toroor mugulelwek eng' karagendoet.

³ Keyaei iman ak kirwooget, ko taachaksei eng' taitap Kamuktaindet ne Toroor kosiir korosyot.

⁴ Koonyek che tinyei menoteet ak muguleldo ne meenei, agot taitap kiptengeginik ko tengekto kityo.

⁵ Tokyingei chaang'indo kityo kabwaatutigap che igiilegei; ago panani age tugul ne sartae.

⁶ Ye kinyooru konoraik eng' lembeita ko uu kibungweret ne ki wiirchin komosi ak komosi ak uu mesteetap meet.

⁷ Oone kiptengeginik koroomnatennywa, amu eesyoi ichek koyai ne myee.

⁸ Kunuur miising' ooreetap ineendet ne laei ng'oogisto, ago atebetap ne tiliil ko litit poisyennyi.

⁹ Kaigai kemeny taban eng' koot parak, kosiir kemeny koot ne oo ak kwondo ne poliin.

¹⁰ Machei yaityet saboondap chiito ne ya; ma nyooru chameet chiitap kokwennyi eng' tainnyi.

¹¹ Ye kibir chotindet, konyooru utaatyet koseng'eng'; ak ye kineet ne utaat, kotaachei naet.

¹² Ibwaati chiitap iman kootap kiptengekyot; ole kigabuitoi kiptengeginik eng' ng'emisyennywa.

¹³ Ineendet ne timei itiikyik ye riirei kibananiat, koriirei agine ago ma kasyin chii.

¹⁴ Imisi nereegek konunotyot ne ki koonu eng' ung'oot, ak imisi nereegek che ng'woneen asoya.

¹⁵ Poiboiyet eng' chiito ne po iman koyai kirwooget; ago kaimetapkei eng' yaigap tengekto.

¹⁶ Imuunyi eng' tuiyetap che ki kobek chiito ne mastoi eng' ooreetap kaguiyet.

¹⁷ Egu kibananiat chiito ne chamei ureryet, ma egu mogoryot ineendet ne chamei divaik ak mwanik.

¹⁸ Egu kiptengekyot ne kityage ne po iman; ak kogeeri kaberberindet che po iman.

¹⁹ Kaigai kemeny surkwen, kosiir kemeny ak kwondo ne polei ak konereechi.

²⁰ Miitei konoraik che po kamanuutyet ne oo ak mwanik eng' meng'ootetap ne utaat, ago amei konoraikyik kobek chiito ne perber.

²¹ Ineendet ne isubi imanda ak chamyet, konyooru saboondo, imanda ak teegisto.

²² Laanyei chiito ne utaat nganaseetap che kiimeen, ak kobut kimnateetap kamang'unennyi.

²³ Age tugul ne riibei kutinnyi ak ng'elyeptanyi koriibei saboondanyi si ma nyoor nyalilwogik.

²⁴ Kiguure chotindet chiito ne meenei ak kochaugei, poisyei ineendet eng' kaeetetapkei ne po menoteet.

²⁵ Parei chiito ne choriren magennyi; amu eesyoi eunekyik kobois.

²⁶ Mi ne kasei myat eng' keiyandit peet komugul; ago igoitoi ne po iman ama etei.

²⁷ Kiit ne kiwechei korosyotap kiptengeginik, kotam nee anyun ye ibu korosyondonooto kotinyei kabwaatutik che yaach.

²⁸ Lusei paoryat ne po lembech, ago ng'alaali ng'aleek che tebyei keny chiito ne kasei.

²⁹ Iuuiiti togeennyi chiito ne ya, ago chobei ortinwekyik chiito ne po iman.

³⁰ Ma mi utaatyet, anan kaguiyet, anan kirwooget, ne kirindoi Kamuktaindet ne Toroor.

³¹ Choboksei paraisiit agobo peetuutap lugeet, ago po katerteeret Kamuktaindet ne Toroor.