KALEWANAIK 20 - BUKUIT NE TILIIL Sireet ne Dutero Kanon

¹ Chotindet divaik, poliindet maiyek. ak ma utaat age tugul ne petei eng' maiyek.

² Uu porisenetap ng'etundo kamuisetap laitoryat; ineendet ne tachei laitoryat koyachin saboondanyi tengekto.

³ Teegisto eng' chii ngo istoegei pooryeet; ago polei age tugul ne perber.

⁴ Ma chamei kobatis ineendet ne choriren eng' peetuusyegap kabatisyet; soomsooti anyun kegesisyei, ama nyooru kiy.

⁵ Uu rireet kirwooget eng' muguleldap chiito, ago siilei chiito ne tinyei kaguiyet.

⁶ Iboortoi chii age tugul eng' piik che chaang' myeeindonyi; ago imuuchi ng'oo konyoor chiito ne kiyani?

⁷ Iberuurotin lagogap chiito ne po iman, ne wendote imandanyi.

⁸ Iseertoi yaitwogik tugul eng' konyekyik laitoryat ne tebee ng'echereetap kirwooget.

⁹ Ng'oo ne imuuchi komwa kole, “Kaatiliil muguleldanyu, aa tiliil, ma atinye tengek?”

¹⁰ Ratilisyek che po ng'aalseet, ak tuguuk che kigerisye che po ng'aalseet; ko chooto tuguuk che wechei `Kamuktaindet ne Toroor.

¹¹ Naoksei lakweet eng' poisyonikyik, ngo tiliil poisyennyi anan ngo litit.

¹² Ki yai `Kamuktaindet ne Toroor tuwai, itit ne kigastoe ak konda ne kigeertoe.

¹³ Amecham rwondo, si meegu kibananiat; kosu, si ibiye.

¹⁴ Mwaei alindet kole, “Ma tilei kiy, ma tilei kiy,” ago ye kakwo, kochoigei.

¹⁵ Mi thahabu ak chaang'indap koik che po kamanuut; ago ng'aleegap naet ko koita ne po kamanuutyet ne oo.

¹⁶ Nam ngoryeetap ineendet ne tononjin toondet; ak onam ineendet koek kaarorunet ne tononjin toek.

¹⁷ Anyiny eng' chii amitwogigap lembeita, ago ne matya konyi kutinnyi koik.

¹⁸ Ki kimiiti chobutyet age tugul eng' katigonet; ak iyai lugeet, icheeng' utaatyet.

¹⁹ Ng'aanyei ung'ootik ne ibooti ng'aleek; amat onamge anyun ak ineendet ne iberberisyei.

²⁰ Age tugul ne sasei kwan anan kamet, kimisi tainnyi eng' mesundeito ne oo miising'.

²¹ Poroteetap tuguuk che kindii ne piitu eng' chokyinet koma kiberuuri eng' let.

²² Amat imwa ile, “Ageeri yaityet.” Igen Kamuktaindet ne Toroor, si kosaruun.

²³ Wechei `Kamuktaindet ne Toroor ratilisyek che po lembech; ama myee kerutyetap lembech.

²⁴ Indochin `Kamuktaindet ne Toroor kakwautigap chii; imuktoi ano anyun chii koguiyo ooreennyi?

²⁵ Mesteet eng' chii kosartae kole, “Tiliil,” ak ye kagoyai kayasyosyek, koteebat.

²⁶ Iyestoi laitoryat ne utaat kiptengeginik, ak kotuei icheek eng' kiit ne kituisye.

²⁷ Tait ne po Kamuktaindet ne Toroor saboondap chii, ne isyachi tuguugap ke.

²⁸ Riibei `rireenet ak iman laitoryat, ak kogimiti rireenet ng'echerennyi ne po laitornatet.

²⁹ Toroornatetap murenik ko kimnateennywa, ak karaaranindap poisyek kalwalek.

³⁰ Iundoi yaitwogik pirutik che ng'woneen, ak itiliili pirutik agoi kebeberwegap oriit.