KALEWANAIK 2 - BUKUIT NE TILIIL Sireet ne Dutero Kanon

Poroteetap utaatyet

¹ Weeriinnyu, ngitaach ng'aleekyuk, ak igonorchigei ng'atuutikyuk,

² ngot iepchi iit utaatyet, ak itokyi muguleldang'ung' kaguiyet;

³ ngot iguur naet, ak iwaach agobo kaguiyet;

⁴ ngot icheeng' ko uu ye icheeng'e fedha, ak icheeng' ko uu ye icheeng'e konoraik che ung'ootiin,

⁵ iguitosi anyun kaiyweisyet ne kiywei Kamuktaindet ne Toroor, ak inyooru naet agobo Kamuktaindet ne Toroor.

⁶ Amu igoitoi `Kamuktaindet ne Toroor utaatyet, mang'une kutinnyi naet ak kaguiyet.

⁷ Konorchin che po iman utaatyet ne ititaat, ineendet long'eetap icheek che pendote imanda.

⁸ Si kobiit koriip ortinwegap kirwooget, ak koriibei ortinwegap piikyik che tiliileen.

⁹ Iguiye anyun imanda ak kirwooget, ak ne nyolu, ak ooreet age tugul ne myee.

¹⁰ Amu chutei utaatyet muguleldang'ung', ak kobaibai naet saboondang'ung';

¹¹ Riibin ruchiinet, ak riibin kaguiyet:

¹² Si kosaruun eng' ooreetap chiito ne ya, ak eng' piik che mwaei tuguuk che imaasotin,

¹³ che laaktoi ortinwegap lititindo si kobendatee ortinwegap mesundeito,

¹⁴ che poiboitune koyai yaityet, ak koboiboitune mastaetap piik che yaacheen;

¹⁵ che kunuuren ortinwekwak, ak komaasotin eng' ortinwekwak.

¹⁶ Si kosaruun eng' chepkugoniot, ak eng' kwondo ne chemwai kuut,

¹⁷ ne ki kometo chamaneet ne kinerchindos tuwai, ak kobistoe kayomisetap Kamuktaindennyi.

¹⁸ Choorchingei koonnyi meet, ak pendi ortinwekyik ye mi che ki kobek:

¹⁹ Ma weeksei age tugul ne wendi oldanyi, ama itei ole mi ortinwegap saboondo.

²⁰ Ara wendote anyun ortinwegap piik che myach, ak isup ortinwegap piik che po iman.

²¹ Amu menyei emet `piik che po iman, ak ng'etune olooto che ititaatiin.

²² Ago ki istoi piik che yaacheen eng' emet, ak kitutu eng' emet che yaei kaberberisyet.