KALEWANAIK 19 - BUKUIT NE TILIIL Sireet ne Dutero Kanon

¹ Kaigai kibananiat ne wendote imanda, kosiir ne imaasat eng' ng'aleekyik ak ko perber.

² Ma myee pekyinet ne ma tinyei naet, ak yaei tengekto ineendet ne sartae pandanyi.

³ Ng'emegei chiito eng' perberyennyi, ak konereekyin `ine Kamuktaindet ne Toroor eng' muguleldanyi.

⁴ Tesei choronok che chaang' `mogornateet; ago itabaanegei kibananiat `chorwennyi.

⁵ Ma kimetoi paoryatap lembech ama kibir; ak ma chilili ineendet ne mwaei lembechek.

⁶ Riirchin piik che chaang' myeeindap chiito ne tagunoot; ak chii age tugul ko chorweetap ineendet ne igoitoi konunoik.

⁷ Ngot ko wechei kibananiat `tupchosyekyik tugul, koistoegei anyun ne tya choronokyik! Nga isubi kogaigae icheek ng'aleek, koma nyooru.

⁸ Chamei saboondanyi ne nyooru utaatyet, nyooru myeeindo ineendet ne riibei kaguiyet.

⁹ Ma kimetoi paoryatap lembech ama kibir; ak lusei ineendet ne mwaei lembechek.

¹⁰ Ngot koma nyooljin `ne perber tuguugap talbisto, kotam nee anyun ngeele pou `otwogindet weeriigap laitoryat.

¹¹ Ma sartae nereegek chiito ne ng'oom, ak egu toroornatennyi ye kasiirtoe pistoet.

¹² Uu nereegegap laitoryat porisenetap ng'etuny; ago uu myeeindonyi rewoot ne mi susweek.

¹³ Weeriit ne perber ko nyalil eng' kwandanyi; ak polatetap osotyot ko uu peek che saitoi.

¹⁴ Koot ak mogornatosyegap chii ko poroteet ne punu kwanisyek; ago punu Kamuktaindet ne Toroor osotyot ne ng'oom.

¹⁵ Igoochin chiito chorirnatet rwondo ne nyigiis, ak amei rubeet chiito ne choriren.

¹⁶ Riibei saboondanyi ne riibei ng'atuutik, ago meei ne ma riibei ortinwekyik.

¹⁷ Ineendet ne riiree kibananiat ko kabesendochi Kamuktaindet ne Toroor, ak kiyaakyin ineendet kogeny eng' poisyennyi ne myee.

¹⁸ Kergong' weeriing'ung' kota komi kamang'unet; amat itil eng' muguleldang'ung' ile myee ngo mee.

¹⁹ Nyooru pireet chiito ne tinyei nereeknateet ne oo; amu ngot isaru ineendet, ko kanyooljin tuun isaru kogeny.

²⁰ Epchi iit katigonet ak itaach kaneetisyet, si kobiit inyooru utaatyet eng' kagesuneng'ung'.

²¹ Mi chobutik che chaang' muguleldap chiito; ago tebyei katigonetap Kamuktaindet ne Toroor.

²² Ki chamei chiito amu myeeindonyi; ak kaigai kibananiat kosiir kiplembechwet.

²³ Kaiyweisyet ne kiywei Kamuktaindet ne Toroor ko saboondo iman; ne nyitat kamung'etap yametapkei, ma nyoonjin yaityet.

²⁴ Indoi eunnyi sanit chiito ne choriren, agot kimnateet ne indoe kutinnyi koma tinye.

²⁵ Pir sasindet, si koneetkei ng'omnateet ne abusat; ak iger kong' ineendet ne tinyei kaguiyet, si koguiyo naet.

²⁶ Ibu kalilanet ak teweernateet, weeriit ne iseeri tuguugap kwandanyi ak koon kamennyi.

²⁷ Weeriinnyu, ngot ko me kas kaneetisyet, kobeetenen ng'aleegap ng'omnateet.

²⁸ Chotei kirwooget paoryat ne ma tilei kiy; ak lugui yaityet kutusweegap kiptengeginik.

²⁹ Kichopchin kirwoogutik chotiik, ak kichopchin pataigap che perber pirutik.