KALEWANAIK 18 - BUKUIT NE TILIIL Sireet ne Dutero Kanon

¹ Ineendet ne itabaanegei, kocheeng'ei magennyi ineegei, ak konereekyin chiichooto ng'omnateet ne ititaat.

² Ma mage kiy ne perber kaguiyet, ago paibaitune kabartaetap kabwaatutikyik kityo.

³ Ye nyo kiptengekyot, konyo agine sasisyet, ak pwoonei kora teweernateet ak chotisyet.

⁴ Uu peegap keriing' ne loo ng'aleegap chii, ibaibai ko uu peegap kereruut ne rootei utaatyet.

⁵ Ma myee ketiytiy kiptengekyot, anan kimaas ne po iman eng' kirwooget.

⁶ Chutei kutitap ne perber ole mi tiyet, ak kuurei kutinnyi pireet.

⁷ Ng'emisyetap ne perber kutinnyi, ak mesteetap saboondanyi kutinnyi.

⁸ Uu tuguuk che anyiny ng'aleegap chaamindet, ak pendi moet.

⁹ Ineendet agine ne choriren eng' poisyennyi ko tupcho ak ng'emindet.

¹⁰ Irimet ne kiim kainetap Kamuktaindet ne Toroor; mwechin ne po iman ak konyoor chametapkei.

¹¹ Mogornateetap mogoryot ko nganasennyi ne kiim, ak uu irimeet ne kooi eng' kabwaatutikyik.

¹² Menei muguleldap chii kotom konyoor ng'emisyet, ak indoe kaming'inetapkei teegisto.

¹³ Ineendet ne wolu koma epchi iit, ko perberyo ak teweernateet eng' ineendet.

¹⁴ Igimiiti saboondap chiito nyalulnatennyi; ago imuuchi ng'oo komuita eng' arageneet?

¹⁵ Nyooru naet muguleldap ne utaat; ak cheeng'ei naet `ititap ne ng'oom.

¹⁶ Cheeng'jin konunet chiito poroindo, ak komutyi ineendet taitap piik che eecheen.

¹⁷ Ne sip kong'alaali, keleen po iman; ago nyoonei chii age kochuulei ng'aleekyik.

¹⁸ Iwong'u `kabeletapkei parbaryat, ak ioitos che irwookyingei.

¹⁹ Uui kosiir nganaseet ne kiim keeweech tupchet ne ki kinach, ak uu tiiyasyek che uu chooto temeleiywegap nganaseet.

²⁰ Piyonyi moetap chii logoegap kutinnyi; piyonyi ineendet iyoteetap kutinnyi.

²¹ Miitei kimnateetap ng'elyepta, meet ak saboondo; ak amei logoekyik icheek che chamei.

²² Nyooru kiit ne myee age tugul ne nyooru osotyot ne ituni, ak nyooru chameet eng' taitap Kamuktaindet ne Toroor.

²³ Poisyee kibananiat kagaigaosyek; ago wolu mogoryot kong'emei.

²⁴ Cheeng'jingei ng'emisyet ineendet ne cheeng'ei choronok che chaang', ago mi chorweet ne namegei ak chii kosiir ng'eetap kamet.