KALEWANAIK 17 - BUKUIT NE TILIIL Sireet ne Dutero Kanon

¹ Kaigai kererutyet ne yaamaat kobooto kamuung'et, kosiir ko ne nyiitaat igoorto ak komi pooryeet.

² Pou `otwogindet ne poisyee ng'omnateet weeriit ne ibu kalilanet, ak nyooru poroteet kobooto tupchosyek.

³ Po `tereet fedha che kitiliili, ak po `maat ne oo thahabu, ago Kamuktaindet ne Toroor ne tyemei mugulelwek.

⁴ Epchin iit `chii ne ya kutusweegap kiptengeginik; epchin iit kiplembechwet ng'elyepta ne ng'aalsei.

⁵ Age tugul ne chotei kibananiat ko chotei Yaindennyi, ineendet ne poiboitu ko kanyoor alage nyalilda koma kimetoi ama kibir.

⁶ Chepkuletap poisyek `mochogoronikwak, ak toroornatetap lagok `kwanisyekwak.

⁷ Ma nyooljin ng'aleek che korooron abusanet, kotam nee anyun kutit ne mwaei lembech, eng' pounindet.

⁸ Uu koita ne po kamanuutyet ne oo kitap asoya eng' taitap ineendet ne tinyei; poorei eng' ui tugul ole tokyingei.

⁹ Cheeng'ei chamyet ineendet ne tuchei pistoet; ago ineendet ne ibooti ng'aleek ko ibestos choronok che eecheen.

¹⁰ Chutei `kereetap ong' ineendet ne tinyei kaguiyet kosiir pirutik pogol eng' ne perber.

¹¹ Cheeng'ei chiito ne ya pistoet kityo; ago kiyookyin `ineendet chiito ne kolgol.

¹² Kaigai ketuiyee magalaluut ne kagirebe aarekyik, kosiir ketuiyee ne perber eng' perberyennyi.

¹³ Age tugul ne yaaktoi yaityet eng' ne myee, koma istoegei yaityet koonnyi.

¹⁴ Uu taunetap pooryeet ye kiyatei peek; omete anyun pooryeet kotom kobiit polateet.

¹⁵ Ineendet ne iityin imanda kiptengekyot ak ineendet ne igikyin chiitap iman; chooto tuwai ko che wechei Kamuktaindet ne Toroor.

¹⁶ Lyon anyun si kotinyei ne perber kiit ne ale utaatyet, ngot koma tinyei naet?

¹⁷ Tinyei chorweet chamyet kotugul, ak kisichei ne tupcho ak chii agobo nyalilda.

¹⁸ Ma tilei kiy keyai kayasyoet, si koek tononjinindet eng' taitap chiitap kokwennyi.

¹⁹ Chamei pistoet ne chamei pooryeet, ak ineendet ne itoroori kurgennyi kocheeng'ei ng'emisyet.

²⁰ Ma nyooru kiy ne myee ineendet ne imaasat muguleldo; ak ibutyin yaityet ne tinyei ng'elyepta ne imaasat.

²¹ Ineendet ne sichei ne perber konyooru arageneet; ak ma tinyei poiboiyet kwandap ne abusat.

²² Kerichek che myach muguleldo ne igasegei, ago iyaami kawek `saboondo ne katanui.

²³ Eng' ung'oot kotaachei kiptengekyot kitap asoya, si komaas ortinwegap kirwooget.

²⁴ Mi utaatyet taitap ineendet ne tinyei naet, ago mi konyegap ne perber agoi ole poochin ng'wony.

²⁵ Weeriit ne perber ko arageneet eng' kwandanyi, ak ng'wanindo eng' ineendet ne kisichei.

²⁶ Ma myee kinde fain ne ma tinyei leluut, anan kebir che taagunotiin agobo imandanywa.

²⁷ Tinyei naet ne ma iseeri ng'aleekyik, ak tinyei kaguiyet `ineendet ne tinyei mugulel ne po muitaet.

²⁸ Agot ne perber ye siisei, kiiti keele utaat; ye ker kutinnyi, kiit keele ng'oom.