KALEWANAIK 10 - BUKUIT NE TILIIL Sireet ne Dutero Kanon

Kalewenaigap Solomon

¹ Chu kalewenaigap Solomon: Iboiboi weeriit ne utaat kwanda, ago inyalili weeriit ne perber kamet.

² Ma mi keluno konoraigap yaityet, ago saru imanda eng' meet.

³ Ma chamjin `Kamuktaindet ne Toroor saboondap ne po iman kotanui eng' rubeet, ago timdoi mageetap kiptengeginik.

⁴ Panani ne choriren, ago ibu mogornateet eutap ne igiiligei.

⁵ Ng'oom weeriit ne iyumi eng' kemei, ago ibu teweernateet weeriit ne ruei kegesisyei.

⁶ Tebee kaberuroik ne po iman, ago tuchei koroomnateet kutitap kiptengekyot.

⁷ Iberuurot kabwaatetap ne po iman, ago nunei kainetap kiptengeginik.

⁸ Taachei kayomisutik ne utaat eng' muguleldo, ago ibuti ne perber ne chaang' ng'aleek.

⁹ Ineendet ne wendote lititindo kowendote chametapkei, ago naoksei ineendet ne imaasi ortinwekyik.

¹⁰ Ibu arageneet ne ng'wegisye konda, ago ne kere kong' eng' nyiganateet koyaei kaalyeet.

¹¹ Kondametutap saboon kutitap ne po iman, ago tuchei koroomnateet kutitap kiptengekyot.

¹² Ing'eeti `suryet pooryosyek, ago tuchei `chamyet pistaosyek tugul.

¹³ Kinyoorchin kaguiyet kutitap chiito ne tinyei utaatyet, ago nyoljin kirokto patetap ineendet ne ma tinyei naet.

¹⁴ Konori piik che utaatiin naet, ago ng'emisyet ne neegit kutitap koseng'eng'it.

¹⁵ Mogornateetap mogoryot ko nganasennyi ne kiim, panandap kibananook ko ipchin ng'emisyet.

¹⁶ Poroteetap ne po iman ko tokyingei saboondo, ago melektap kiptengekyot ko tokyingei tengekto.

¹⁷ Miitei ooreetap saboondo ne riibei katigonet, ago mastoi chiito ne pagaktoi kereetap kong'.

¹⁸ Ineendet ne unyei weget kotinyei kutitap lembechek, ak ineendet ne mwaei ng'aleegap chemerereet ko perber.

¹⁹ Mabete pistoet ye mi ng'aleek che chaang', ago ng'oom ne siisei.

²⁰ Uu fedhaisyek che korooron ng'elyeptap ne po iman, ago ma tilei kiy muguleldap kiptengekyot.

²¹ Paei piik che chaang' kutitap chiito ne po iman, ago pegu che perber amu ma tinyei naet.

²² Imogornoni `kaberuretap Kamuktaindet ne Toroor, ama testoi riirek.

²³ Yaet yaitwogik ko uu ureryet eng' koseng'eng'inik, ak uu nooto utaatyet eng' chiito ne tinyei kaguiyet.

²⁴ Kiit ne iywei kiptengekyot ko nooto ne nyoonjin ineendet, ago kigoochin che po iman tuguuk che machei.

²⁵ Ye siirto kipchurchuryet koma komi kiptengekyot, ago lumeiywot ne po koigeny chiito ne po iman.

²⁶ Uu siki eng' kelek, ak uu iyeto eng' koonyek, uu nooto chiito ne choriren eng' icheek che iyooktoi ineendet.

²⁷ Tesei peetuusyek kaiyweisyet ne kiywei Kamuktaindet ne Toroor, ago kitilei kenyiisyegap kiptengeginik kong'ering'itu.

²⁸ Kagasetapkei kamang'unetap che po iman, ago lusei kamang'unetap kiptengeginik.

²⁹ Irimet ne kiim ooreetap Kamuktaindet ne Toroor eng' ne po iman, ago ng'emisyet eng' yaigap yaityo.

³⁰ Ma koi ki isto ne po iman, ago ma menyei kiptengeginik emet.

³¹ Mang'une utaatyet kutitap ne po iman, ago kitilei ng'elyeptap ne imaasisyei.

³² Ingen kutitap ne po iman tuguuk che taagaksei, ago mwaei kutusweegap kiptengeginik ng'aleek che po kamaaset.