KALEWANAIK 1 - BUKUIT NE TILIIL Sireet ne Dutero Kanon

Kalewenaik

¹ Kalewenaigap Solomon weeriitap Daudi, laitoryatap Israel.

² Kalewenaik ko koonu kaguiyet agobo utaatyet ak atebeet ne myee, koonu kaguiyet ne nin.

³ Ketaach kaneetisyet eng' atebeet ne myee, koek chii ne ititaat, imanda ak kirwooget ne nyolu.

⁴ Kigoochi ng'ulaatyet che perberen, kogoochi neran naet ak naet ne myee.

⁵ Si kobiit kogas chiito ne utaat, ak kotesak eng' kaneetetapkei; ak chiito ne tinyei kaguiyet konyoor kirwoogutik che po iman,

⁶ Koguiyo kalewenet ak kaarorennyi, koguiyo ng'aleegap piik che utaatiin ak ng'aleekwak che ung'ootiin.

⁷ Taunetap naet ko kiywei Kamuktaindet ne Toroor; ago sasei che perber utaatyet ak kaneetisyet.

⁸ Weeriinnyu, epchi iit kaneetisyetap kwandang'ung', amemete ng'atuutyetap kamenng'ung'.

⁹ Amu egu chooto naaryeetap myeeindo eng' meting'ung', ak koek sirimwek che mi kaating'ung'.

¹⁰ Weeriinnyu, ngo kaigain kiptengeginik, ko mecham.

¹¹ Ngo mwa kole, “Nyoo keebe tugul, ongeribis keunygei si ketumde korotiik, ongeunykei kesapchi che ma tinyei leluut, agot ngo ma ting'enech ng'olyoo.

¹² Ko uu Olemi Che ki kobek, ongelugui icheek kosaptos, kelugui kochamegei, ko uu che choorchingei Keriinget.

¹³ Kinyooru tuguuk tugul che po kamanuutyet ne oo; kinyiiti kooriikyok parunenik.

¹⁴ Ongenamge, si keyamde tuguukyok tugul.”

¹⁵ Weeriinnyu, amobe ooreet agenge kobooto icheek; iste keeldong'ung' eng' ooreenywa.

¹⁶ Amu rwochin keelyekwak yaityet, ak choktoi kotumdoi korotiik.

¹⁷ Puch ye ki riichei mesteet, kogeerei toriityon age tugul.

¹⁸ Ribistos chuuto kotumdoi korotiikwak, unyegei kosapchin saboonwekwak.

¹⁹ Uu nooto ortinwegap age tugul ne kipkeiyat agobo kelunet; rebei saboonwegap piik.

Kuursei utaatyet

²⁰ Waachei miising' utaatyet eng' ooreet; ng'alaali eng' komoswek che paroen.

²¹ Kuursei eng' ole tuiyechin piik; eng' ormariichogap nganaseet ko mwaitoi ng'aleek:

²² “Ochame abusnateng'wong' kot kotyanit, okweek che oo abusatiin? Poiboitune chotiik chotisyennywa kot kotyanit, ak wechei che perber naet?

²³ Ogas oriip kateunennyu, ogeero, aroong'wok kabwaatutikyuk, ak ang'ang'wok ng'aleekyuk.

²⁴ Amu ki aguurse, ago ki oeesye, ki aiite eunnyu, ago ma iit chii.

²⁵ Ki osas kirwoogutikyuk tugul, ama ocham kateunennyu.

²⁶ Arorye eng' peetuutap nyalildang'wong', achotisyei ye kanyo kaiyweisyeng'wong',

²⁷ ye kanyo kaiyweisyeng'wong' ko uu usoonet ne oo, ak ye kanyo nyalildang'wong' ko uu kipchurchuryet, ye kanyonjok pichiindo ak ng'wanindo.

²⁸ Oguura anyun ago mawolu, ocheeng'a eng' kagiiletapkei ago monyorwo.

²⁹ Amu ki owech naet, ama olewen oiywei Kamuktaindet ne Toroor;

³⁰ ama ocham kirwoogutikyuk, ki osas kateunaikyuk tugul,

³¹ amei anyun logoegap ortinwekwak, ak konyiak ng'aleekwak che yaacheen.

³² Amu parei icheek kachuchugetapkei ne po abusanik, ak ng'emei icheek poroteetap che perber.

³³ Ago age tugul ne kasa kotebee chametapkei, ak imuunyi, ama iywei yaityet.”