KAITOSYEK 6 - BUKUIT NE TILIIL Sireet ne Dutero Kanon

Pitonwegap Nazaretik

¹ Ki ng'alaalji anyun `Kamuktaindet ne Toroor Musa koleenji,

² “Mwachi piigap Israel leenjin, Ye kayai chii ne muren anan ko ne kwony kayasyoet, kayasyetap Nasiritindet, kotabaanjigei Kamuktaindet ne Toroor,

³ ko ingoistoegei divaik ak maiyek. Amat koe peek alak tugul che mindilil che po divaik anan ko maiyek alak tugul. Amat koe peegap sabibuk anan koam sabibuk che tuonen anan che yamyotiin.

⁴ Eng' peetuusyekyik tugul che po katabaanennyi kotee kota ko Nasaretindet, ko monyolu koam kiy age tugul ne punu sabibuk, kong'etee tenderigap logoechooto agoi peerik.

⁵ “Amat kocher metinnyi eng' peetuusyekyik tugul che po kayosyennyi ne po katabaanet, agoi kogeskei peetuusyechooto che itabaanjinegei Kamuktaindet ne Toroor. Ingotiliilit anyun ineendet ak ingobiityo suumeekyik koechegitu.

⁶ Amat koriikyi muusto eng' peetuusyechooto tugul che itabaanjinegei Kamuktaindet ne Toroor.

⁷ Amat kong'wanitkei agobo kwan anan kamet anan ng'eetap kamet anan chepkamet ye kabek icheek, amu mi metinnyi katabaanennyi po kei ne itabaanjigei Kamuktaindet.

⁸ Tiliil eng' Kamuktaindet ne Toroor eng' peetuusyek tugul che po katabaanennyi.

⁹ “Ak ngo me chii eng' chokyinet eng' ole neegitee ineendet, ak koomurwon metitap katabaanennyi, ko ingocher anyun metinnyi eng' peetuut ne ki anyinyi ineendet, nooto peetuutap tisap.

¹⁰ Ak eng' peetuutap sisiit koipchi tisiindet cheptugenik aeng' anan ko aarek aeng' che po toriitik koba kurgeetap emait ne kituiyechin.

¹¹ Igoitoi tisiindet age kobunji kagoochinetap tengekto ak kobunji age kagoochinet ne kibeelei, yeityo koyai kagaigaet agobo ineendet amu konam tengekto agobo ne kome. Itiliili anyun metit peetuunooto.

¹² Ingotabaanji Kamuktaindet ne Toroor peetuusyegap katabaanennyi, ak koget mengit ne ma siirei kenyiit agenge koek kagoochinetap chalwok. Ago petos puch peetuusyek che ki po tai amu ki kimurwon katabaanennyi.

¹³ “Ni ng'atuutyetap Nasiritindet, ye kagogeskei peetuusyegap katabaanennyi. Kimutu konyo kurgeetap emait ne kituiyechin,

¹⁴ yeityo kogoochi kagoochinennyi Kamuktaindet ne Toroor; mengit agenge ne ma siirei kenyiit agenge ne libwoop koek kagoochinet ne kibeelei, subeendo agenge ne libwoop ne po keechiir ne ma siirei kenyiit agenge koek kagoochinetap tengekto ak mengit agenge ne libwoop kobunji kagoochinoigap kaalyeet.

¹⁵ Igoitoi kogeny kerebet ne oo ne mi magatiinik che ma kinde mermereek, magatiinik che mengeechen che po peek che ng'ootiin che tambulul che ki kiburukto mwaita, magatiinik che tertereen che ma kinde mermereek che ki kiilee mwaita, kagoochinennywa ne po peek ak kagoochinoikwak che kieei.

¹⁶ “Igoitoi tisiindet tuguuchooto eng' taitap Kamuktaindet ne Toroor ak kogoito kagoochinet ne po tengekto ak kagoochinet ne kibeelei.

¹⁷ Igoitoi mengit koek tiseiywot ne po kagoochinetap kaalyeet kobooto kebebertap magatiinik che ma kinde mermereek, ak kogoito kagoochinetap peek ne po nooto kobooto kagoochinet ne kieei.

¹⁸ Inemu Nasaretindonooto metinnyi ne po katabaanennyi eng' kurgeetap emait ne kituiyechin ak koip sumeechooto konde maat ne kibeelee tiseiywegap kagoochinoigap kaalyeet.

¹⁹ “Yeityo konem tisiindet kusto ne kagiyo ne po mengit ak konem eng' kerebet magatyat agenge ne ming'in ne ma kinde mermereek ak magatyat agenge ne terter ne ma kinde mermereek, ak konde tuguuchooto eunegap Nasiritindet ye kagonem metit agobo katabaanennyi.

²⁰ Yeityo koongoi tisiindet chooto koek kagoochinoik che kiongoi eng' taitap Kamuktaindet ne Toroor; tiliileen chooto ak punjin tisiindet kobooto tagateet ne kiongoi ak chaatit ne kigoitoi. Ye ibata nooto anyun, komuuch Nasiritindet koe divaik.

²¹ “Ni ng'atuutyetap Nasiritindet ne yae kayasyaennyi. Kagoochinennyi ne igoochin Kamuktaindet ne Toroor ko nyolu kosupkei ak katabaanennyi, kobooto tuguuk alak che imuuchi konyoor. Kosupkei ak kayosyet ne ka yai, ko nyolu koyai, kosubi ng'atuutyet ne po katabaanennyi.”

Kaberuuroik che kiberuuren piik

²² Ki ng'alaalji `Kamuktaindet ne Toroor Musa koleenji,

²³ “Mwachi Aron ak weeriikyik ileenji Koberuur piigap Israel ko uu ni,

²⁴ ‘Ingoberuurin Kamuktaindet ne Toroor ak koriibin;

²⁵ Ingokwenyin lapkeiyetap togeetap Kamuktaindet ne Toroor ak korirenen.

²⁶ Ingotokyin Kamuktaindet ne Toroor togeennyi ak kogoonin kaalyeet.’

²⁷ “Indoi kainennyu piigap Israel, ak aberuur icheek.”