KAITOSYEK 36 - BUKUIT NE TILIIL Sireet ne Dutero Kanon

Poroteet ne kinyoor tiibiigap Zelophehad

¹ Ki pwa anyun che eecheen eng' kooriigap kwanisyek che po ooreetap lagogap Gilead, weeriitap Makir, weeriitap Manasseh ne agenge eng' ortinwegap weeriigap Joseph, nyoo kong'alaal eng' taitap Musa ak pounik, che eecheen eng' kooriigap kwanisyek che po piigap Israel.

² Ki le icheek: “Ki ng'at `Kamuktaindet ne Toroor kiptaiyandennyu kole, kogoochi emet piigap Israel eng' seretap parbareek koek poroteet. Ki ng'at Kamuktaindet ne Toroor kiptaiyandennyu kogoochi tiibiigap Zelophehad tupchennyo, poroteetap kwandanywa.

³ Ara anyun ngot kotun icheek weeriigap pororyosyek alak che po piigap Israel, keisto anyun porotennywa eng' poroteetap kwanisyekyok ak ketesyi poretetap ooreet ne ituni icheek. Eng' niito ki istoi anyun parbaryatap porotennyo.

⁴ Ye iit kenyiitap Jublii ne po piigap Israel, ketesyi anyun porotennywa poroteetap ooreet ne punjin icheek, ak ki istoi anyun porotennywa eng' poroteetap ooreetap kwanisyekyok.”

⁵ Ara ki ng'at `Musa piigap Israel ko uu ng'olyootap Kamuktaindet ne Toroor koleenji, “Kamwa iman ooreetap weeriigap Joseph.

⁶ Kang'at Kamuktaindet ne Toroor ng'olyoondoni agobo tiibiigap Zelophehad, kole ingotun icheek che machei; ago ingotun che po kootap ooreetap kwandanywa ineegei,

⁷ si ma kiuto poroteet age tugul ne po piigap Israel, kong'etee ooreet age kwo ooreet age; amu kanyool konamgei chii tugul eng' piigap Israel ak poroteetap ooreetap kwanisyekyik.

⁸ Chepto age tugul ne punjin poroteet eng' pororyet age tugul ne po piigap Israel, kitunjin kootap ooreetap pororyetap kwandanyi, si kobiit konam chii age tugul eng' piigap Israel poroteetap kwanisyekyik.

⁹ Ma kimuuchi kiuto poroteet age tugul kong'etee pororyet age agoi age, namjingei age tugul eng' pororyosyegap piigap Israel porotennyi kobunji.”

¹⁰ Ki yai tiibiigap Zelophehad ko uu ye ki ng'at `Kamuktaindet ne Toroor Musa.

¹¹ Tipchooto po Zelophehad; Mahlah, Tirzah, Hoglah, Milkah ak Noah, ko ki itun weeriigap tupchosyegap kwandanywa.

¹² Ko uu ye ki kitunji icheek ortinwegap weeriigap Manasseh weeriitap Joseph, ko ki tebee porotennywa pororyetap ooreetap kwandanywa.

¹³ Chuuto anyun ng'atuutik ak kirwoogutik che ki ng'at `Kamuktaindet ne Toroor piigap Israel eng' Musa eng' warengetap Moab ole neegitee Jordan eng' Jeriko.