KAITOSYEK 34 - BUKUIT NE TILIIL Sireet ne Dutero Kanon

Kiwotosyegap Kanaan

¹ Ki mwachi `Kamuktaindet ne Toroor Musa koleenji,

² “Ng'at piigap Israel ileenji: Ye oit emetap Kanaan, niito emet ne onyooru koek poroteng'wong', kibooru kiwotosyekyik ko uu ni:

³ Komostang'wong' ne po murot tai kong'etee surkwen ne po Sin korop tabandap Edom. Kiwoteng'wong' ne po murot tai kong'etee tabandap Araraita ne po Munyuk ne tokyingei kong'asiis.

⁴ Ak koweigei kiwoteng'wong' kotokyigei murot tai eng' ole kitogostoe kebendi Akrabbim, ak kwo agoi Sin. Itei kiwotosyekyik komostap murot tai ne po Kadesh-barnea yeityo kwo kotokyigei Haser-adar agoi koit Asmon.

⁵ Yeityo koweigei kiwateet kong'etee Asmon agoi kererutap Misiri ak koboochit kiwotosyekyik Nyanjet ne po Mediterenian.

⁶ “Egu Nyanjetap Mediterenian kiwoteng'wong' ne mi cherongo.

⁷ “Kiwoteng'wong' ne po murot kaataam ko ni: kong'etee Nyanjetap Mediterenian, oaroroti agoi tulweetap Hor,

⁸ ak kobooch tulweetap Hor, oaroroti agoi ye kimandoe kebendi Lebo-hamath, ak poochitu kiwotennyi Sedad,

⁹ ak itei kiwateet Sipron ak poochitu tabanwekyik Hasarenan. Niito kiwoteng'wong' ne po murot kaataam.

¹⁰ “Yeityo oarorote kiwoteng'wong' ne po komostap kong'asiis kobooch Hasar-enan agoi Sepam.

¹¹ Chortagei kiwateet kong'etee Sepam agoi Ribla, eng' komostap kong'asiis ne po Ain. Chortagei kiwateet kora agoi koit tabandap Nyanjetap Galilaya eng' komostap kong'asiis.

¹² Ingochoortagei anyun kiwateet koosup Jordan agoi koit tabanwekyik Araraita ne po Munyuk. Egu niito emeng'wong' ko uu kiwotosyekyik che yiemei tugul.”

¹³ Ki ng'at `Musa piigap Israel koleenji, “Niito emet ne onyabani eng' parbareek, ne kong'at Kamuktaindet ne Toroor kigoochi ortinwek sogool ak kebeberta ne po ooreet age.

¹⁴ Amu ki kotaach porotennywa ooreetap lagogap Reuben, ooreetap lagogap Gad, ak ki kotaach porotennywa kebebertap ooreetap Manasseh chii age tugul ko uu kooriigap kwanisyekwak.

¹⁵ Ki kotaach porotennywa ortinwechooto aeng'u ak kebeber eng' Jordan pitoni eng' Jeriko ole tokyingei kong'asiis.”

Kandoik che teleljin kaarooretap kiwotosyek

¹⁶ Ki mwachi `Kamuktaindet ne Toroor Musa koleenji,

¹⁷ “Chu kainaigap piik che pcheiywok emet koek poroteng'wong': Eleazar tisiindet ak Joshua weeriitap Nun.

¹⁸ Ak olewen pounindet ne po ooreet age tugul, si kopchei emet koek poroteet.

¹⁹ Kainaigap pichooto chu: Eng' ooreetap Judah, ko Kaleb weeriitap Jepune.

²⁰ Eng' ooreetap lagogap Simion, ko Semuel weeriitap Amihud.

²¹ Eng' ooreetap Benjamin, ko Eliad weeriitap Kislon.

²² Eng' ooreetap lagogap Dan, ko pounindet Buki weeriitap Jogli.

²³ Eng' lagogap Joseph, eng' ooreetap lagogap Manasseh, ko Pounindet Haniel weeriitap Ephod.

²⁴ Eng' ooreetap lagogap Ephraim, ko pounindet Kemuel weeriitap Siptan.

²⁵ Eng' ooreetap lagogap Zebulun, ko pounindet Elizaphan weeriitap Parnak.

²⁶ Eng' ooreetap lagogap Issakar ko pounindet Paltiel weeriitap Asan.

²⁷ Eng' ooreetap lagogap Asher, ko pounindet Aihud weeriitap Selomi.

²⁸ Ak eng' ooreetap lagogap Naphtali, ko pounindet Pedael weeriitap Amihud.”

²⁹ Chuuto piik che ki ng'at Kamuktaindet ne Toroor kole kopchechi emetap Kanaan piigap Israel koek porotennywa.