KAITOSYEK 30 - BUKUIT NE TILIIL Sireet ne Dutero Kanon

¹ Ki mwachi `Musa pounigap ortinwegap piigap Israel koleenji: “Ni kiit ne ki ng'at Kamuktaindet ne Toroor:

Kaarortaosyek

² “Ye iarorchi `chii Kamuktaindet ne Toroor kiy, anan ngo yosyo korate saboondanyi ng'atuutyet, amat kowal ng'olyoondennyi ago koyai ko uu tugul che ki mwa eng' kutinnyi.

³ “Ye iarorchi kobogoryondo neta ko neran Kamuktaindet ne Toroor kiy ak korategei ng'atuutyet, ye ta komi kootap kwandanyi,

⁴ ak kogas kwandanyi kaarortaennyi anan ratuutyennyi ne korate saboondanyi ago ma mwa kiy, kogimegitu anyun kaarortaosyekyik ak kogimit ratuutyet age tugul ne korate saboondanyi.

⁵ Ago ngo etee kwandanyi eng' peetuut ne kagas koma tonondos kaarortaosyekyik agot agenge anan ratuutikyik che korate saboondanyi, ak ko nyochi kaat Kamuktaindet ne Toroor amu kieetee kwandanyi.

⁶ Ngitun kobogoryondonooto kota komiitei eng' ineendet kaarortaosyekyik, anan ngo kisartae ng'olyoo eng' kutinnyi ne korate saboondanyi.

⁷ “Ak kogas manong'otyondennyi, ak kosiis koma mwochi kiy ineendet, kotononso anyun kaarortaosyekyik ak ratuutik che kiga rate saboondanyi.

⁸ Ago ngo etee manong'otyondennyi eng' peetuut ne kagas, kowal anyun chiichooto kaarortaetap kobogoryondonooto ne kotinyei koek puch anan ng'olyoot ne kosartae, ne koga rate saboondanyi, ak ko nyochi kaat Kamuktaindet ne Toroor.

⁹ Ago kaarortaetap kwony ne ki kosiirtoe manong'otyot anan ko ne po ineendet ne ki kibesyo ak manong'otyot, kotononi amu ineendet, ma kibutei.

¹⁰ “Ngo aror ineendet komi kootap manong'otyondennyi anan korat saboondanyi eng' ratuutyetap kayasyoet,

¹¹ ak kogas manong'otyondennyi ago ma mwa kiy, ama koete, kotononso anyun kaarortaosyekyik tugul ak ratuutyet age tugul ne kirate saboondanyi.

¹² Ago ngo wal manong'otyondennyi tuguuchooto koek puch eng' peetuut ne ki kas, koma tononi anyun kiy age tugul ne mang'une kutinnyi agobo kaarortaosyekyik. Ki yai manong'otyondennyi tuguuchooto koek puch ak ko nyochi kaat Kamuktaindet ne Toroor.

¹³ Imuuchi kogimit manong'otyot anan koyai koek puch kaarortaet age tugul anan kayasyoet age tugul ne ratisyei ne inyalili saboondo.

¹⁴ Ago ngo siis manong'otyondennyi eng' ineendet peetuut age tugul, kogimiti anyun kaarortaosyekyik tugul anan ko ratuutikyik tugul che miitei ineendet. Ki kogimit tuguuchooto amu ki siis, ma etee kwonyooto eng' peetuut ne ki kas.

¹⁵ Ago ngo put koek puch ko kagogas ye kagobataita kasaryan, koip anyun ineendet tengektap kwonyooto.”

¹⁶ Chuuto ng'atuutik che ki ng'at `Kamuktaindet ne Toroor Musa, che po chii ak osotyonnyi ak che po chepto ak kwandanyi, ye ta ne neran chebooto, eng' kootap kwandanyi.