KAITOSYEK 25 - BUKUIT NE TILIIL Sireet ne Dutero Kanon

Ibeetapkei ak saaetap kanamonik eng' Shitim

¹ Ye kita komenyei `Israel Shitim, ko ki toi murenik koipkei ak tiibiigap Moabik,

² ak kiguur `tiipchooto piik koba ole kigoochine kanamonikwak tiseiywek. Ki amis piik ak kogutung'ji kanamonik.

³ Ara ki namgei Israel ak Baal ne po Peor. Ak kinereech kot Kamuktaindet ne Toroor agobo Israel.

⁴ Ki leenji `Kamuktaindet ne Toroor Musa, “Nam pounik tugul che po piik, ak igartaat icheek kolalei asiis eng' taitap Kamuktaindet ne Toroor, si koistoegei Israel nereegek che koroomen che po Kamuktaindet ne Toroor.”

⁵ Ak ki leenji `Musa kirwoogigap Israel, “Obar chii age tugul eng' okweek ne kogonamgei ak Baal ne po Peor.”

⁶ Eng' yooto, ko ki nyo age eng' Yahudik komutu kwony ne po Midianik konyo koonnyi eng' taitap Musa ak eng' taitap tuiyet komugul ne po piigap Israel, ye kita koriirtos eng' kurgeetap emait ne kituiyechin.

⁷ Ye kingo keer Phineas weeriitap Eleazar, weeriitap Aron tisiindet, kong'eet eng' kwenutap tuiyet ak konam ng'otit eng' eunnyi

⁸ ak koosup Yahudyondonooto agoi emait. Kitoore ng'otit icheek tuwai kosore moetap chiichooto po Israel ak kwonyooto agine. Ki siis anyun koroito eng' piigap Israel.

⁹ Eng' yooto che ki pek eng' koroyooto, ko piik eliphuusyek tiptem ak ang'wan.

¹⁰ Ki mwachi `Kamuktaindet ne Toroor Musa koleenji,

¹¹ “Kagoisto Phineas weeriitap Eleazar weeriitap Aron tisiindet, nereegekyuk eng' piigap Israel, amu ki tinyei ng'etkonda agobo tengek eng' icheek amu anee, mata anyun awong'u piigap Israel eng' ng'etkondanyu.

¹² Amu niito, ko mwachi anyun ineendet ileenji kaagoochi kayomisennyu ne po kaalyeet.

¹³ Kayai kayomiset ne po tiseinateet ne po koigeny eng' ineendet ak eng' iyotennyi ne piitu let. Amu ki tinyei pekyinet agobo Kamuktaindet ak kagoyachi kagaigaet piigap Israel.”

¹⁴ Ki kiguure chiichooto po Israel ki kibar kobooto kwony ne po Midianik, Shimri weeriitap Salu, ki pounindetap kootap kwanisyek eng' ooreetap Simion.

¹⁵ Ak kainetap kwonyooto po Midianik ki kibar, ko ki Kosbi, chepo Sur, ki kandoindetap kootap kwanisyek eng' Midian.

¹⁶ Ki mwachi `Kamuktaindet ne Toroor Musa koleenji,

¹⁷ “Inyalil Midianik ak ibar iwong'u icheek,

¹⁸ amu iimok eng' kaberberisyennywa, ne king'alenak eng' ng'olyootap Peor ak eng' ng'olyootap Kosbi, cheptap pounindetap Midian, chepkamennywa, ne ki kibar eng' peetuutap koroito amu ng'olyootap Peor.”