KAITOSYEK 22 - BUKUIT NE TILIIL Sireet ne Dutero Kanon

Koyooktoi Balak keguur Balaam

¹ Ki pa anyun piigap Israel, koba komuung'e warengetap Moab, Jordan pitoniin ole neegitee Jeriko.

² Ki keer Balak weeriitap Sipor tuguuk tugul che ki yachi Yahudik Amorik.

³ Ki iywei `Moabik pichooto miising' amu ki chaang'; ak kitoptobenso Moabik amu piigap Israel.

⁴ Ki leenji `Moabik poisyegap Midian, “Amei tuiyoni tuguuk tugul che neegiteenech, ko uu ye amei tuuga susweegap timiin.” Ara king'eet anyun Balak weeriitap Sipor, ne ki laitoryatap Moab eng' peetuusyechooto,

⁵ ak ki iyookto piik koba kap Balaam weeriitap Beor, ne ki menyei Petor ne neegitee Yufrets nooto emetap piigap pororyennyi. Ki pa koguur ineendet koleenji, “Keero, mi yu piik che ki punu Misiri; yomu icheek emet, ak menyei ole neegiteena.

⁶ Asaain anyun nguno ale, nyoo chubwa pichooto, amu kiimeen kosiiro. Tamangap amuuch aterteer ak aoon koba eng' emoni; Amu angen ale ne iberuuri kiberuuri, ak ne ichube ko chuboot.”

⁷ Ara ki pa anyun poisyegap Moab ak che po Midian koibei eng' eunekwak kagoochinoigap ng'oorset. Ki it kap Balaam, ak ki mwachi ng'aleegap Balak.

⁸ Ki leenji `Balaam pichooto, “Oruiye yu kemouni, si aibwok ng'aleek, ko uu ye machei komwaiwo Kamuktaindet ne Toroor.” Ara ki tebi pounigap Moab kobooto Balaam.

⁹ Ki nyoonji `Kamuktaindet Balaam, nyoo koteebe koleenji, “Ng'oo pichu omi tugul?”

¹⁰ Ak ki wolji `Balaam Kamuktaindet kole, “Kagoyook piik `Balak weeriitap Sipor, laitoryatap Moab, kobwa oldanyu koleenjo,

¹¹ ‘Kayom emet piik che ki punu Misiri; ara anyun, nyoo chubwa icheek tamangap amuuch kebargei ak icheek, ak aoon komanda eng' emet.’ ”

¹² Ki leenji `Kamuktaindet Balaam, “Amat obe ak icheeget. Amat ichup pichooto, amu iberuurotin icheek.”

¹³ Ki ng'eet Balaam karon, ak koleenji pounigap Balak, “Oba emeng'wong', amu kaetena Kamuktaindet ne Toroor keebe ak okweek.”

¹⁴ Ara king'eetyo pounigap Moab koba ole mi Balak ak koleenji, “Kaeesyo Balaam kebwa tugul.”

¹⁵ Ki iyookto Balak kogeny pounik alak che chaang' che siirei, ak ko che konyitotiin kosiir che po tai.

¹⁶ Ki it kap Balam, kobwa koleenji, “Kale Balak weeriitap Sipor, Kaigai ameng' kogerin kiy si menyo ole ami;

¹⁷ amu aeetin inyooru teegisto ne oo, ak ayai kiy age tugul ne imwaiwo. Asaain anyun ale, nyoo chubwa pichu.”

¹⁸ Ago ki wolji `Balaam otwogigap Balak koleenji, “Agot ngo koono Balak fedha ak thahabu che nyiei koonnyi, koma muuchi asiir ye pooch ng'olyootap Kamuktaindet ne Toroor Kamuktaindennyu, si ma chuchuch anan ates che kamwa ineendet.

¹⁹ Asoomok anyun ale, otebee yu kemouni agine, si kobiit anai ne mwaiwo Kamuktaindet ne Toroor ne siirei chooto.”

²⁰ Ki nyoonji `Kamuktaindet Balaam kemoi, konyo koleenji, “Ngo kabwa pichu koguurin, ing'eet ak obe tugul, ago iyae kityo ng'olyoot ne amwaun.”

²¹ Ara king'eet Balaam karon, koiito kiit ne tebee eng' sigiryennyi, ak ki pa ak pounigap Moab.

Balaam ak sigiryet

²² Ki nereech kot Kamuktaindet ne Toroor amu ki wo, ak ki tonon malaikaiyatap Kamuktaindet ne Toroor eng' ooreet koek ne kirindoi ineendet. Ak ye kibunei sigiryennyi kobooto otwogikyik aeng',

²³ kogigeer sigiryet malakaiyatap Kamuktaindet ne Toroor kotononi eng' ooreet, ak kiting'e eunnyi rotwetap chok ne kaging'us. Ki wo taban sigiryet kometo ooreet, kwo timiin; ak kibir `Balaam sigiryet kole koweekyi ooreet.

²⁴ Ki tonon malaikaiyatap Kamuktaindet ne Toroor eng' ooreet ne mariich eng' mbareenigap sabibuk, ole ng'ootaat komosi ak komosi.

²⁵ Ye ki keer sigiryet malakaiyatap Kamuktaindet ne Toroor, ko ki rus inaatut, ak kirusee keldap Balaam inaatut. Ak kibir sigiryet kogeny.

²⁶ Ki inakta malakaiyatap Kamuktaindet ne Toroor kwo tai, ak kitonone ye mariich, ye ki ma kimuuchi keeweekyigei komostap tai anan kaataam.

²⁷ Ye ki keer sigiryet malakaiyatap Kamuktaindet ne Toroor, ko ki ru komi Balam parak; ak kites konereech Balaam, ak kibir sigiryet eng' kiroktonyi.

²⁸ Ak ki yaat `Kamuktaindet ne Toroor kutitap sigiryet kotwek, ak ki leenji Balaam, “Kayaun nee, si ibira konyil chu somok?”

²⁹ Ak ki leenji `Balaam sigiryet, “Amu kechota! Nda katinye rotweet, ta kaabarin.”

³⁰ Ki wolji `sigiryet Balaam koleenji, “Tos ma aa sigiryeng'ung', ne ki ilaanye kobooch keny agoi kora? Tos ki cham ayaun ko uu ni atkinye tugul?” Ak ki leenji, “Achicha.”

³¹ Ki yaat anyun `Kamuktaindet ne Toroor konyegap Balaam, ak ki keer malaikaiyatap Kamuktaindet ne Toroor kotononi eng' ooreet, kotinyei eunnyi rotwetap chok ne kaging'us. Ak ki ing'uruuk, kobutyi ng'wony.

³² Ki leenji malaikaiyatap Kamuktaindet ne Toroor, “Amu nee si ibir sigiryeng'ung' konyil chu somok? Keero, kanyo aegu kirindoindeng'ung', amu imaasat oreng'ung' eng' tainnyu.

³³ Kageera sigiryet, ak kwo taban eng' tainnyu konyil chuuto somok. Nda kamawo taban koistoenagei ta kaabarin iman ak amete sigiryet kosap.”

³⁴ Ki leenji `Balaam malaikaiyatap Kamuktaindet ne Toroor, “Kaayai tengekto, amu kama angen ale itononi eng' ooreet si kobiit igirinda. Ara anyun, ngo mechame, ko myee aweek.”

³⁵ Ago ki leenji `malaikaiyatap Kamuktaindet ne Toroor Balaam, “Oba ak pichooto, ago imwae ng'olyoot ne amwaun kityo.” Ki pa anyun Balaam kobooto pounigap Balak.

³⁶ Kingo kas Balak kole kagonyo Balaam, kwo kotorookta ineendet eng' nganaseetap Moab ne mi kiwotetap Arnon, ne miitei tabandap kiwotonooto.

³⁷ Ki leenji `Balak Balaam, “Tos kiga ma agimgimin, aguurin? Amu nee si menyo ole ami? Tos ma muuchi aeetin iman inyooru teegisto?”

³⁸ Ki wolji `Balaam Balak koleenji, “Kaanyonjin nguno, ago tos atinye kamuget agot kitigin amwa kiy age tugul? Amwae ng'olyoot ne indoi Kamuktaindet kutinnyu.”

³⁹ Ki pa anyun Balaam ak Balak, ak ki it Kiriath-husot.

⁴⁰ Ki eeny Balak tuuga ak keechiirek, ak ki iyookyi Balaam ak pounik che ki mi kobooto ineendet.

Koberuuri `Balaam piigap Israel

⁴¹ Kingo kagoeech, komut `Balak Balaam kotogosta kwo ole mi oldinwek che torooreen che po Baal, ak ki keer eng' olooto ole poochin kebebertap piik.