KAITOSYEK 21 - BUKUIT NE TILIIL Sireet ne Dutero Kanon

Kengemei kiwongu Arad

¹ Ki kas laitoryatap Arad kanaanindet ne ki menyei murot tai, kole, pwoonei Yahudik kobunu ooreetap Atarim, ki wo ak ki parge ak Israel, ak kiluul alak eng' Yahudik.

² Ki iyasyechi `Yahudik Kamuktaindet ne Toroor, koleenji, “Ngot igoono pichu, ang'eme awong'u nganasookwak.”

³ Ki kas Kamuktaindet ne Toroor ng'aleegap Yahudik, ak ki igoochi Kanaanik. King'em kowong' icheek kobooto nganasookwak. Ki kiguure anyun yooto Horma.

Ereneetap sugunwet

⁴ Ki pa anyun eng' tulweetap Hor kobun ooreetap Araraita ne Piriir, koyiem emetap Edom. Ago kichootyo mugulelwegap piik amu ooreet.

⁵ Ki ing'unyng'ung'ji anyun `piik Kamuktaindet kobooto Musa, kole, “Kilya si omutwech kemang'une Misiri kebwa kebekyi surkwen? Amu ma mi amitwogik anan peek, ak wechei saboonwekyok amitwogichu tertereen.”

⁶ Ki iyookyi `Kamuktaindet ne Toroor pichooto erenook che ng'woneen susennywa ko uu maat. Kisus piik ak ki pek piik che chaang' che po Israel.

⁷ Ki pa `piik kap Musa koleenji, “Kogeyai tengekto amu ko king'unyng'ung'ji Kamuktaindet ne Toroor kobooten. Saa Kamuktaindet ne Toroor si koistoenech erenochu.” Ara kisaachi `Musa piik.

⁸ Ki leenji `Kamuktaindet ne Toroor Musa, “Itaany ereneet ne uu maat ak inde keetit ne itononi; ak ye keer chii age tugul ne kagesus, kosap.”

⁹ Ki itaany anyun `Musa ereneet ne po sugunwet ak ki inde keetit ak kootonon. Ngo sus ereneet chii age tugul, ak konyal erenanooto po sugunwet, kosap.

Kiterteeri Amorik ak Bashan

¹⁰ Ki pa anyun piigap Israel, ak komuung'e Obot.

¹¹ Ki pa eng' Obot agoi komuung'e Iye-abarim ne mi surkwen ne tokyingei Moab, komostap kong'asiis.

¹² Ki pa eng' olooto, ak komuung'e atebweetap Sered.

¹³ Ki pa eng' olooto, ak komuung'e Arnon pitoniin, ne mi surkwen ne punu kiwotetap Amorik. Amu Arnon kiwotetap Moabik, kwenutap Moabik ak Amorik.

¹⁴ Siraat eng' kitabuutap Lugosyegap Kamuktaindet ne Toroor amu nooto, “Ne ki yai eng' Araraita ne Piriir, ak atebwosyegap Arnon,

¹⁵ ak eng' atebwosyek che choorchingei ole menyei Ar, ne mi ole neegitee kiwotetap Moab.”

¹⁶ Ak ki pa eng' olooto agoi Beer, nooto keriingetap peek ne ki mwachi `Kamuktaindet ne Toroor Musa koleenji, “Iyum piik, si anaga peek.”

¹⁷ Kityen anyun Yahudik tyeni: “Kuutu peek, ee keriingoni! Otyenji!

¹⁸ Keriinget ne kibalei che taagunotiin, kobooto ne igoitoi ng'atuutik che konyitotiin kotinyei kirokto ne po kirwooget ak kirokto ne po pounatet.” Ak ki pa eng' surkwen agoi Matana.

¹⁹ Ki pa eng' Matana agoi Nahaliel, ak ki pa eng' Nahaliel agoi Bamot.

²⁰ Ki pa eng' Bamot agoi atebweet ne mi mbareetap Moab, agoi tulweet parak ne po Piska, ne ing'ururi surkwen.

Kiterteeri Sihon ak Og

²¹ Ki iyookto `Yahudik piik koba kap Sihon laitoryatap Amorik koleenji,

²² “Chamwo abun emeng'ung'. Ma kimastoi kebendi mbareenik, anan mbareenigap sabibuk, ama kiee peegap keriingonik. Kibune ooreet ne oo ne po laitoryat; agoi kesiir kiwoteng'ung'.”

²³ Ago ma chamji `Sihon piigap Israel kobun kiwotennyi. Ago ki iyum `Sihon piikyik tugul ak koba kobargei ak piigap Israel eng' surkwen, ki pargei ak icheek eng' Jahas.

²⁴ Ki par `Israel ineendet eng' rotwetap chok ak konam emennyi kobooch Arnon agoi Jabbok, agoi kiwotetap piigap Ammon; amu king'ootaat kiwotetap piigap Ammon.

²⁵ Kiluul piigap Israel nganasochooto tugul, ak ki meny Yahudik nganasook tugul che po Amorik, eng' Hesbon, ak eng' nganasookyik tugul.

²⁶ Amu Hesbon ko ki nganaseetap Sihon laitoryatap Amorik, ne kiga kobargei ak laitoryatap Moab ne ki po tai ak kirebe emennyi komugul ne ki mi eunnyi agoi Arnon.

²⁷ Mwaei eng' nooto anyun icheek eng' kalewenaik kole, “Obwa Hesbon keteech; ingeteech nganaseetap Sihon ak kigimit.

²⁸ Amu kamandae maat Hesbon, kamandae liplibenetap maat nganaseetap Sihon. Kagobeel Ar ne po Moab, ak kiptainik che po ole toroor che po Arnon.

²⁹ Pwo! Inyee Moab! Kaolusye, okweek piigap Kemos! Kagogoito weeriikyik che kichililso kogoochi Sihon laitoryatap Amorik, ak tiibiikyik koek luulenik, kogoochi Sihon, laitoryatap Amorik.

³⁰ Kagolus, Hesbon agoi Dibon. Kageng'em agoi Nopa, ne itei Medeba.”

³¹ Ara ki meny anyun Yahudik emetap Amorik.

³² Ki iyookto `Musa piik kosegei Jaser, ak ki iluul nganasookyik ak ki oon Amorik che ki mi olooto.

³³ Ki week anyun kotogosta kobun ooreetap Bashan. Ki manda anyun Og laitoryatap Bashan ak piikyik tugul, kwo kobargei ak icheek eng' Edrei.

³⁴ Ki leenji `Kamuktaindet ne Toroor Musa, “Meiywei ineendet, amu kaande ineendet eung'ung' kobooto piikyik tugul, ak emennyi. Iyachini ineendet ko uu ye ki iyachi Sihon laitoryatap Amorik ne ki menyei Hesbon.”

³⁵ Ki par anyun `icheek ineendet kobooto weeriikyik ak piikyik tugul, kot koma ng'etyi `ineendet chii agot agenge. Ak ki punji icheek emennyi.