KAITOSYEK 18 - BUKUIT NE TILIIL Sireet ne Dutero Kanon

Poisyonigap Tisiik ak Lawiik

¹ Ki leenji `Kamuktaindet ne Toroor Aron, “Oibe tengektap ole-tiliil, inyee ak weeriiguk ak kootap kwanisyeguk. Oibe okweegei tengektap tiseinateng'wong', inyee ak weeriiguk.

² Ara imutu koriik tupchosyeguk ak icheek che po ooreetap Lawi, ooreetap kwandang'ung', si kobiit onamgei ak icheeget ak koboisyeun. Ago otebee taitap Emait ne po Paornateet, inyee ak weeriiguk.

³ Ak koriip icheek ng'atuutyeng'ung' ak ng'atuutyet ne po Emait komugul. Ago amat keriikyi tuguuk che po ole-tiliil anan kapkorosuut, si ma pek icheek, anan ko okweek.

⁴ Kiyomenen pichooto si koriip icheek ng'atuutyetap emait ne kituiyechin ak agobo poisyet tugul ne po Emait. Ak amat koriikyok toondet age tugul.

⁵ Oriip oyai ng'atuutyetap ole-tiliil ak ng'atuutyetap kapkorosuut, si mata kobiit nereegek kogeny agobo piigap Israel.

⁶ Kaatabaan anee tupchosyekwok Lawiik eng' piigap Israel koek icheek kagoochinet eng' okweek. Kigoochin icheek Kamuktaindet ne Toroor si kobois eng' emait ne kituiyechin.

⁷ Oriip inyee ak weeriiguk tiseinateng'wong' agobo kiy age tugul ne po kapkorosuut ak che po chooto mi oriit eng' angeet ne ki kioye, ak oboisyee. Kagoonok tiseinateet koek poisyetap konunet. Kibarei too age tugul ne riikyin.”

Kebebertap Tisiik

⁸ Ki leenji `Kamuktaindet ne Toroor Aron, “Kaagoonin riipseet ne po konunoikyuk che kinamjin parak, tuguuk tugul che itabaanatiin che po piigap Israel. Kaagoonin inyee ak weeriiguk tuguuchooto, amu kailset, koek ng'atuutyet ne po agoi.

⁹ Egu cheguuk tuguuchooto eng' che tiliileen miising', che kita kibeelei: kiy age tugul ne koonu icheek, che ibwo, ngo kagoochinennywa age tugul ne po peek, konunennywa age tugul ne po tengekto, anan agot age tugul ne po kachililutyet, ko punjinin inyee ak weeriiguk.

¹⁰ Iame tuguuchooto eng' ole-tiliil. Amei age tugul ne muren; egu ne tiliil eng' inyee.

¹¹ “Neng'ung' ni agine: kagoochinennywa ne kinamjin parak ne po konunenywa eng' kagoochinoikwak tugul che kiongoi che po piigap Israel. Kaagoonin chooto kobooto weeriiguk ak tiibiiguk, ko uu ng'atuutyet ne po koigeny. Amei chii age tugul ne po koong'ung' ne ma ng'waan.

¹² “Kaagoonin tongoanikwak tugul che kigoochin Kamuktaindet ne Toroor, tugul che myachen che po mwanik, divaik tugul che korooron che po kesisyetap sabibuk, ak che po peek che myachen.

¹³ Punjinin tongoanik che po tuguuk tugul che mi emennywa, che ipchin `icheek Kamuktaindet ne Toroor. Amei age tugul ne ma ng'waan ne po koong'ung'.

¹⁴ Punjinin kiy age tugul ne itabaanat eng' Israel.

¹⁵ “Punjinin age tugul ne yaatei iyoteet, eng' piik ak eng' che kiyagi, che igoochin `icheek Kamuktaindet ne Toroor. Ago ityaachi iman che po tai eng' sigeet eng' piik, ak ityaachi che twatei che ng'woneen eng' che kiyagi.

¹⁶ Chooto che kityaachi eng' icheeget, ko che po kobooch arawet agenge ak kwo tai. Ityachi ko uu kamanuutyet ne igerchini koek fedhaisyegap shekelisyek muut, ko uu kereetap ole-tiliil (nooto ko gerahisyek tiptem).

¹⁷ Ago amat ityaach ne twatei teta, keechiiryet ak ng'orooryet; tiliileen chooto. Iise kaptisisyet korotiikwak; ak ibeel mwanikwak koek kagoochinet ne punei maat, koek nyamdutyet ne anyiny eng' Kamuktaindet ne Toroor.

¹⁸ Ak kobunjiin panyeekwak, ko uu ye neng'ung' tagateet ne keongoi; ak chaatit ne po komostap tai.

¹⁹ “Kaagoonin kobooto weeriiguk ak tiibiiguk kagoochinoik tugul che kinamjin parak che po tuguuk che tiliileen, che igoochin `piigap Israel Kamuktaindet ne Toroor ko uu ng'atuutyet ne po koigeny. Niito anyun kayomisetap muunyuk ne po koigeny eng' taitap Kamuktaindet ne Toroor eng' inyee ak eng' iyoteng'ung'.”

²⁰ Ki leenji anyun `Kamuktaindet ne Toroor Aron, “Menyooru poroteet eng' emennywa, amenyooru kebeberta age tugul eng' kwenunnywa. Anee kebebertang'ung' ak poroteng'ung' eng' kwenutap piigap Israel.”

Kebertap Lawiik

²¹ “Kaagoochi lagogap Lawi kebeberwek tugul che po taman eng' Israel koek porotennywa, kogeere poisyennywa ne yaei, nooto poisyetap emait ne kituiyechin.

²² Kobooch nguno ko mariikyin piigap Israel emait ne kituiyechin, si ma nyoor tengekto, ak kobek.

²³ Ago yaei Lawiik poisyetap emait ne kituiyechin, ak koip tengektonywa. Egu niito ng'atuutyet ne po koigeny eng' ibinwekwok tugul. Ago ma nyooru poroteet icheek eng' piigap Israel.

²⁴ Amu kaagoochi Lawiik koek porotennywa kebebertap taman ne po piigap Israel, ne igoochin icheek Kamuktaindet ne Toroor koek kagoochinet ne kinamjin parak. Kaamwachi anyun icheek aleenji, ma nyooru icheek poroteet eng' kwenutap piigap Israel.”

²⁵ Ki ng'alaalji `Kamuktaindet ne Toroor Musa koleenji,

²⁶ “Mwachi kogeny Lawiik ileenji: Ye otaach kebeberwegap taman eng' piigap Israel, chooto kaagoonok kobunu icheek; koek poroteng'wong', ogoite anyun kebebertap taman eng' kebeberato koek kagoochinet ne kinamjin parak, kobunji Kamuktaindet ne Toroor.

²⁷ Ki ityok kagoochineng'wong' ne kinamjin parak, ko uu ye ki iti peek che po rwanyut ne kiboorsee ak ko uu nyiietap ole kitue sabibuk.

²⁸ Ogoochini Kamuktaindet ne Toroor ak okweek ko uu nooto kagoochinet ne kinamjin parak ne po kebeberwekwok tugul che po taman, che otaache eng' piigap Israel. Ogoochi eng' chooto kagoochinet ne kinamjin parak ne po Kamuktaindet ne Toroor, Aron tisiindet.

²⁹ Ogoitoi kagoochinet age tugul ne kinamjin parak ne po Kamuktaindet ne Toroor, eng' konunoikwok tugul, eng' chooto myachen, koek kebebertanyi ne ki kitabaan.

³⁰ Mwachi anyun icheek amu nooto ileenji: Ye onamjini parak eng' chooto myachen, ki ityin anyun Lawiik ko uu ye ki iti rurateet eng' rwanyut ne kiboorsee ak ko uu ye ki iti rurateet eng' ole kitue sabibuk.

³¹ Oam chooto eng' komoswek tugul, okweek ak piigap kooriikwok; amu chooto melekwekwok che po poisyeng'wong' eng' emait ne kituiyechin.

³² Moibe tengekto eng' nooto, ye kaonamji parak che myachen eng' chooto, ak mong'wanit tuguuk che tiliileen che po piigap Israel, si mobegu.”