KAITOSYEK 17 - BUKUIT NE TILIIL Sireet ne Dutero Kanon

Kirokto ne po Aron

¹ Ki mwachi `Kamuktaindet ne Toroor Musa koleenji,

² “Ng'alaalji piigap Israel ak iibune kirokweek taman ak aeng': kirokto agenge eng' koot age tugul ne po kwanisyekwak eng' pounikwak ko uu kooriigap kwanisyekwak. Sirchi kainetap chii age tugul kiroktonyi.

³ Sirchi kainetap Aron kirokto ne po Lawi, amu punjin kirokto agenge pounindet age tugul ne po kooriigap kwanisyekwak.

⁴ Yeityo igonor kirokwechooto eng' emait ne kituiyechin eng' taitap paornateet, ole kituiyechini ak okweek.

⁵ Yeityo kong'at kirokto ne po chiito ne aleweni, ak awong'u eng' tainnyu kang'unyng'unyet ne ing'unyng'ung'jinok piigap Israel.”

⁶ Ara ki ng'alaalji `Musa piigap Israel, ak ki igoochi pounikwak tugul ineendet kirokweek taman ak aeng', kirokto agenge eng' pounindet age tugul ko uu kooriigap kwanisyekwak, ak ki miitei kirokto ne po Aron kobooto chechwaak.

⁷ Ki igonor Musa kirokwechooto eng' taitap Kamuktaindet ne Toroor eng' emaitap paornateet.

⁸ Eng' peetuut ne ki isubi, kwo Musa emaitap paornateet oriit, ak kooro kole, kogong'at kirokto ne po Aron ne po ooreetap Lawi, ak koyesyo taaptook, ak kogoi lagoek che ruryotiin che kiguure almond.

⁹ Ki ip anyun Musa kirokweek tugul kobunu taitap Kamuktaindet ne Toroor si konde taitap piigap Israel tugul. Ki keer, ak ki inem chii age tugul kiroktonyi.

¹⁰ Ki leenji `Kamuktaindet ne Toroor Musa, “Ketite kirokto ne po Aron kwo taitap paornateet, si kegonor koek kaboorunet eng' piik ngelelik, si kobiit iwong'u kang'unyng'unyennywa ne ing'unyng'ung'jino, si ma pek.”

¹¹ Ki yai anyun Musa ko uu nooto, ko uu ye ki ng'at Kamuktaindet ne Toroor.

¹² Ki mwachi `piigap Israel Musa koleenji, “Keero, kagibegu, kagelusye, kagelusye tugul!

¹³ Meei chii age tugul ne riikyin kootap Kamuktaindet ne Toroor. Tos kiwong'ugei acheek tugul?”