KAITOSYEK 16 - BUKUIT NE TILIIL Sireet ne Dutero Kanon

Ngelelnatetap Kora, Datan ak Abiram

¹ Ki iyum piik anyun `Kora weeriitap Itshar, weeriitap Kohat weeriitap Lawi, kobooto Datan ak Abiram weeriigap Eliap, ak On weeriitap Phelet, weeriigap Reuben,

² ak kong'eetyo kongelelso eng' taitap Musa kobooto piigap Israel alak. Ki mi kobooto icheeget pounik, piik che taagunotiin pogol aeng' ak konom che po tuiyet che ki kiguur kobwa ole katuiyechi piik.

³ Ki iyumgei icheegei si kobiit kotil let Musa ak Aron, ak koleenji icheek, “Otoroorigei kot kotyanit! Tuiyoni komugul ko tiliil, ak chii age tugul ko tiliil, ak mi Kamuktaindet ne Toroor kwenunnywa. Amu nee anyun si otoroorgei osiir tuiyetap Kamuktaindet ne Toroor?”

⁴ Ye kingo kas Musa ng'olyoondonooto, kong'uruuk kot koit ng'wony togeennyi eng' kaimetapkei.

⁵ Yeityo komwachi Kora ak piikyik koleenji, “Ibooru Kamuktaindet ne Toroor mutai karon che chechiik ak ne tiliil. Ineendet ne kaguur kwo ole mi ineendet, koriikyi, ko nooto ne leweni.

⁶ Inyee Kora, ak piiguk tugul, oyai ko uu ni: oip tereenik okweek,

⁷ onde mastinwek tereenichooto oriit ak onde mutai karon nyamdutik che kibeelei eng' taitap Kamuktaindet ne Toroor. Tiliil anyun chiichooto leweni Kamuktaindet ne Toroor. Kaoeetkei okweek weeriigap Lawi.”

⁸ Ki leenji `Musa Kora, “Ogas anyun, okweek weeriigap Lawi!

⁹ Tos ogeere ole ming'in ng'olyoondoni eng' okweek amu ki itabaanak Kiptaiyat Kamuktaindetap Israel eng' tuiyetap Israel, si komutak ooriikyi ineendet, si oyai poisyetap kootap Kamuktaindet ne Toroor ak otononse eng' taitap tuiyet oboisyechi icheek?

¹⁰ Ki komutwak ooriigu ak tupchosyeguk tugul weeriigap Lawi. Tos omache tiseinateet agine?

¹¹ Koyumgei anyun inyee oegu agenge ak piiguk otil let Kamuktaindet ne Toroor. Aron ko ng'oo kot ong'unyng'ung'ji?”

¹² Ki iyookto `Musa chiito keguur Datan ak Abiram weeriigap Eliap. Ago ki le, “Ma kibwane!

¹³ Tos igeere ile kiy ne ming'in ye ki imutwech ketogosu eng' emet ne kinyiitaat cheego ak komi kumyat eng' chaang'indo si ibarchech ong'atani? Ak nguno imache iegu pounindet, iboiywech-i?

¹⁴ Kosiir nooto koma imutyech emet ne nyiitaat cheego ak komi kumyat eng' chaang'indo ama igoonech poroteetap mbareenik ak che po sabibuk. Tos ngiroo ko ki piik acheek che king'ale? Ma kibwane!”

¹⁵ Ki nereech Musa miising' ak ki leenji Kamuktaindet ne Toroor, “Amecham kagoochinennywa! Tom aibe agot sigirit agenge, ak tomo alelji chii agenge eng' icheek.”

¹⁶ Yeityo koleenji `Musa Kora, “Obwa taitap Kamuktaindet ne Toroor mutai, inyee ak piiguk tugul kobooto Aron agine.

¹⁷ Ingoip chii tugul tereennyi ak konde nyamdutik che kibeelei, yeityo koip chii tugul tereennyi konyo taitap Kamuktaindet ne Toroor. Tereenichooto tugul, ko pogol aeng' ak konom. Ak iibu tereeng'ung' inyee ak Aron, chii tugul ak tereennyi.”

¹⁸ Ki ip anyun chii tugul tereennyi ak konde maat oriit, yeityo konde tuguuk che kibeelei maat parak, ak kotonon kobooto Musa ak Aron eng' kurgeetap emait ne kituiyechin.

¹⁹ Ye kita koiyumi `Kora tuiyet komugul kotil let icheek eng' kurgeetap emait ne kituiyechin, komong' liilindap Kamuktaindet ne Toroor eng' tait tuiyet tugul.

²⁰ Ki mwachi `Kamuktaindet ne Toroor Musa ak Aron koleenji,

²¹ “Otabaanegei tuiyoni okweek si kobiit awong' icheek.”

²² Ago ki ing'uruukso icheek kot kotiiny togoochikwak ng'wony ak kole, “Ee Kamuktaindet, Kamuktaindet ne po saboonwegap piik tugul, tos inereekyini tuiyet komugul ngo yai chiito agenge tengekto?”

²³ Ak ki ng'alaalji `Kamuktaindet ne Toroor Musa koleenji,

²⁴ “Mwachi tuiyet ileenji, ‘Oistoegei meng'ootetap Kora ak Datan ak Abiram.’ ”

²⁵ Ki ng'eet Musa kwo kap Datan ak Abiram ak ki isup ineendet poisyegap Israel.

²⁶ Ki mwachi tuiyet koleenji, “Asaok ale oistoegei emaisyegap kiptengeginichu! Amat otwaa kiy age tugul nenywa si ma kiwong'wok eng' tengekwogikwak.”

²⁷ Ki istogei anyun icheek eng' komosta age tugul ne po meng'ootetap Kora, Datan ak Abiram. Ki pwa saang' Datan ak Abiram ak kotononso eng' kurgeetap emaisyekwak kobooto osotikwak ak weeriikwak ak lagokwak.

²⁸ Ki le Musa, “Onae ni ole ki iyookwo Kamuktaindet ne Toroor ayai poisyonichu tugul, ak ma ayai eng' magennyu.

²⁹ Ngot kobek pichu ko uu ye pegu piik tugul anan ngot keyachi icheek ko uu ye kiyachin piik tugul ko kaagaa ma iyookwo Kamuktaindet ne Toroor.

³⁰ Ago ngot koyai Kamuktaindet ne Toroor kiy ne taunen, ak koyaat ng'wony kutinnyi, ak kolugui icheek kobooto tuguukwak tugul ak kochoortagei keriinget kosaptos, onai anyun ole ki sas `pichu Kamuktaindet ne Toroor.”

³¹ Ak kingo kagomwa ng'aleechooto tugul kogees, kobetak ng'wony ye ki mi.

³² Ki yaat ng'wony kutinnyi kolugui icheek ak piikwak, kobooto piik tugul che kiga namgei ak Kora ak tuguukwak tugul.

³³ Ki pa keriinget kosaptos pichooto ak icheeget che ki mi tugul. Ki tuch `ng'wony icheek ak ki lusyo anyun eng' tuiyet.

³⁴ Ki mweiso anyun Yahudik tugul che ki mi ole neegitee icheek ye kingo kas kateennywa, amu ki le, “Si ma luguech ng'wony agacheek!”

³⁵ Ki mong' maat anyun eng' Kamuktaindet ne Toroor ak ki peel pichooto pogol aeng' ak konom che ki igoitoi nyamdutik che kibeelei.

Tereenik

³⁶ Ak ki mwachi `Kamuktaindet ne Toroor Musa koleenji,

³⁷ “Mwachin Eleazar weeriitap Aron tisiindet koisto tereenik eng' maat ak iwas maat eng' olooto, amu tiliileen tereenichooto.

³⁸ Ara agobo tereenigap kiptengeginik che kogorwookyigei icheegei kot kobek, ko ingitaany anyun kolebelitu si ketuge kaptisisyet, amu ki igoito tuguuchooto eng' taitap Kamuktaindet ne Toroor, ara tiliileen anyun amu nooto. Si koek chooto kaboorunet eng' piigap Israel.”

³⁹ Ki ip anyun Eleazar tereenichooto po sugunonik, che kiga kogoito icheeget che ki kibeel, ak ki kitaany tuguuchooto si ketuge kaptisisyet.

⁴⁰ Ki ek nooto kabwaatet eng' piigap Israel si ma riik toondet ne ma po ooreetap Aron, nyoo kobeel nyamdutik eng' taitap Kamuktaindet ne Toroor, si ma igei Kora ak piikyik. Ki yaak chooto ko uu ye ki mwachi `Kamuktaindet ne Toroor ineendet eng' Musa.

Kosaru `Aron piik

⁴¹ Ago ki ing'unyng'ung'ji Musa ak Aron `tuiyet komugul ne po piigap Israel eng' peetuut ne ki isubi peetuunooto kole, “Koobar piigap Kamuktaindet ne Toroor.”

⁴² Ak ye kingo kagoyumgei tuiyet, si kotil let Musa ak Aron, kogiguskong' icheek ak kogeer ole mi Emait ne Ketuiyechin, kooro kole, ki tuch pooldet emainooto, ak ki took liilindap Kamuktaindet ne Toroor.

⁴³ Ak ki pa Musa ak Aron taitap emait ne kituiyechin.

⁴⁴ Ki mwachi `Kamuktaindet ne Toroor Musa koleenji,

⁴⁵ “Oistoegei tuiyoni, si kobiit awong' icheek.” Ak ki ing'uruuk kot kotiiny togeennyi ng'wony.

⁴⁶ Yeityo koleenji `Musa Aron, “Ip tereeng'ung' ak inde maat ne punu kaptisisyet tereet oriit ak inde nyamdutik paragunnyi yeityo iip ichaaktae kwo ole miitei tuiyet si iyachi kagaigaet. Amu kagobun nereegek Kamuktaindet ne Toroor ak kagotoigei koroito.”

⁴⁷ Ki ip anyun Aron tereennyi ko uu ye kagamwa Musa ak kilabat kwo kwenutap tuiyet. Kooro kole, kagotoigei koroito eng' piik. Ki peel anyun nyamdutik ak koyachi kagaigaet piik.

⁴⁸ Ki tonon eng' kwenutap che kagobek ak che saptos, ak ki siis koroito.

⁴⁹ Icheek che ki pek eng' koroito, ko ki eliphuusyek taman ak ang'wan ak pogol tisap, koma ki itito che ki pek amu ng'aleegap Kora.

⁵⁰ Yeityo koweek anyun Aron kwo ole mi Musa agoi kurgeetap emait ne kituiyechin, amu kiga kosiis koroito.