KAITOSYEK 14 - BUKUIT NE TILIIL Sireet ne Dutero Kanon

Kongeleldos piik amu ng'aleegap Segeik

¹ Kiwaach anyun tuiyet komugul koriiryo ak ki iteiyo kemout komugul.

² Ki ing'unyng'ung'ji piigap Israel tugul Musa ak Aron ak koleenji, “Ki kaigai nda kiga kibekyi emetap Misiri! Anan nda kebekyi ong'atani!

³ Amu nee si komutwech Kamuktaindet ne Toroor kebwa emoni, si kobiit kebarech eng' rotwetap chok? Ak koek osotikyok ak lagokyok luulenik. Tos ma kaigai keeweekyigei Misiri?”

⁴ Ki ng'alaaljigei anyun icheegei kole, “Ongelewen kiptaiyat si keweigei Misiri.”

⁵ Ki ing'uruukso anyun Musa ak Aron kot kotiiny togoochikwak ng'wony eng' taitap piik tugul che po tuiyet komugul ne po piigap Israel.

⁶ Ki pet ngoroikwak Joshua weeriitap Nun ak Kaleb weeriitap Jepune; chuuto tuwai ko ki mi kobooto icheek che kigaba kosegei emet,

⁷ ak ki ng'alaalji tuiyet komugul ne po piigap Israel koleenji, “Emonooto ki kibunate kesegei ko karaaran miising' kosiir.

⁸ Ngot kobaibai Kamuktaindet ne Toroor eng' acheek, komutech anyun keebe emonooto ak kogoonech emonooto nyiitaat cheego ak komi kumyat eng' chaang'indo.

⁹ Ago kaigai amongelelji Kamuktaindet ne Toroor anan oiywei piigap emet, amu uu amitwogik icheek eng' acheek. Kigeistoe icheek urwetap toreteet ak mi Kamuktaindet ne Toroor kobootech, amoiywei icheek.”

¹⁰ Ago kimwae tuiyet komugul kole kelach icheek eng' koik. Ki took ak komong'ji piigap Israel tugul liilindap Kamuktaindet ne Toroor eng' emait ne kituiyechin.

Kosaae Musa agobo piik

¹¹ Ak kiteebe `Kamuktaindet ne Toroor Musa koleenji, “Renya pichu kot kotyanit? Ma iyana agoi au, agot nganda ki ayai kaboorunoichooto tugul eng' kwenunnywa?

¹² Abare koroito ak aistoegei icheek, ak ayaaiin iegu pororyet ne oo ne kiim kosiir icheek.”

¹³ Ki leenji anyun `Musa Kamuktaindet ne Toroor, “Kasei anyun Misiriik agobo ng'olyoondoniito ki imutu pichuuto kotogos eng' kwenunnywa eng' kimnateng'ung',

¹⁴ komwachi piigap emoniito. Ki kogas icheek kole imi inyee Kamuktaindet ne Toroor kwenutap pichu. Amu itaagu inyee Kamuktaindet ne Toroor kimni, tonone poldeng'ung' paragunnywa ak indoe icheek eng' toloitap pooldet peet ak eng' toloitap maat kemoi.

¹⁵ Ngot ibar pichu kibagenge, komwa anyun pororyosyek che ki kogas agobo ng'aleeguk kole,

¹⁶ ‘Ki kobarchi `Kamuktaindet ne Toroor pichooto surkwen amu ki ma imuuch ineendet komut icheek koba emet ne kiga koyasyechi.’

¹⁷ Asaain anyun nguno ale, ingoeet kimnateetap Kiptaiyat ko uu ye kaimwa ile,

¹⁸ ‘Ma sip konereechi Kamuktaindet ne Toroor ak ko nyiitaat rireenet, ne nyochin kaat tengekto ak pistoet ama nyochin kaat puch kiptengekyot; ago iityin lagok agobo tengektap kwanisyekwak agoi ibinda ne po somok ak ne po ang'wan.’

¹⁹ Asaain ale nyochi kaat anyun pichu tengektonywa ko uu ooindap rireeneng'ung' ak ko uu ye ki inyochigaat pichu kobooch Misiri agoi kora.”

²⁰ Ki wol Kamuktaindet ne Toroor kole, “Ka anyochi kaat icheek ko uu ng'olyoondeng'ung'.

²¹ Ago iman, ko uu ye asabe ak ko uu ye tuun nyiei ng'wony komugul toroorindap Kamuktaindet ne Toroor,

²² koma mi agot agenge eng' pichu tugul che ki kogeer toroorindanyu ak kaboorunoikyuk che ki ayai eng' Misiri ak eng' surkwen. Ko uu ye ki kotyema konyil taman, ama epchi iit kutinnyu,

²³ koma keerei iman emonooto ki ayosyechi kwanisyekwak. Ama keerei age tugul eng' icheek che kisasa.

²⁴ Kobatee kiboityondennyu Kaleb amu ki tinyei sabeet age ak ki isuba eng' kagesunatetapkei, amuti ineendet kwo emonooto kigawo ak kobunji iyotennyi.

²⁵ Amu menyei atebweet Amelegik ak Kanaanik, ko oweigei anyun mutai ak obe surkwen otokyigei ooreet ne wendi Nyanjet ne Piriir.”

²⁶ Ki mwachi anyun `Kamuktaindet ne Toroor Musa ak Aron koleenji,

²⁷ “Amuitoi eng' tuiyoni ya ne ing'unyng'ung'jino kot kotyanit? Koagas kang'unyng'unyetap piigap Israel che ing'unyng'ung'jino.

²⁸ Ileenji icheek, Kale Kamuktaindet ne Toroor ‘Ko uu ye asabe ak ko uu ye kaomwaiwo agas eng' itiikyuk, ayaiywok anyun ko uu nooto:

²⁹ Obekyini ong'atani tugul che ki kiit eng' okweek, kobooch che po kenyiisyek tiptem ak kwo tai che ki kong'unyng'ung'ja,

³⁰ mooite emonooto iman ne ki ayosyechigei ale agoonok omeny olooto, kobatee Kaleb weeriitap Jepune ak Joshua weeriitap Nun, chooto icheegei kityo che itei.

³¹ Ago amuti lagokwok che ki ole egu luulenik koba emonooto, si konai icheek emet ne ki oeesye.

³² Ago okweek, obekyini ong'atani.

³³ Iyogisyote lagokwok eng' ong'atani kenyiisyek artam ak koibot kugoinateng'wong' agoi kigees ne po let eng' okweek koek muuswek eng' surkwen.

³⁴ Ko uu koitetap peetuusyek che ki otar eng' segeetap emet, chooto peetuusyek artam, ko peetuut age tugul ko kenyiit, oiboti anyun tengekwogikwok kenyiisyek artam si kobiit onai ye aistoenok kayomisutyennyu.’

³⁵ Kaamwa anee Kamuktaindet ne Toroor, kaayosyechi ale ayachini chuuto tugul tuiyoni ya ne katila let. Igesyingei icheek ong'atani, pekyin icheek olito.”

³⁶ Ki pek pichooto che ki iyookto Musa koba kosegei emet, che ki week, che ki pwa kogoochi piik kong'unyng'ung'ji ineendet, amu ng'aleek che yaach che ki ip agobo emonooto.

³⁷ Ki pek icheek ki ip ng'aleek che yaach agobo emet ko ki pek tugul eng' koroito eng' taitap Kamuktaindet ne Toroor.

³⁸ Ago ki ng'et Joshua weeriitap Nun ak Kaleb weeriitap Jepune, eng' piik che kigaba kosegei emet.

Tyemetap tai ne po kabookyinetap emet

³⁹ Ye kingo mwachi `Musa piigap Israel ng'aleechuuto tugul, koriiryo icheek miising'.

⁴⁰ Ki ng'eetyo anyun karon miising' ak kotogosta agoi tulweet parak koleen, “Kimi yu, kagibe ketogoste ole ki komwa Kamuktaindet ne Toroor, amu kogeyai tengekto.”

⁴¹ Ago ki leenji Musa, “Amu nee si obistoe ng'atuutyetap Kamuktaindet ne Toroor? Amu ma isuldoi ng'olyoot ngeyai ne uu nooto.

⁴² Amat otogoste amu ma mi Kamuktaindet ne Toroor kobootok, si ma parak koterteerak eng' puunikwok.

⁴³ Amu mi taing'wong' eng' olooto Amelegik ak Kanaanik. Amu ki oweegei let ama osup Kamuktaindet ne Toroor, koma mi anyun ineendet kobootok ak ki parok eng' rotwetap chok.”

⁴⁴ Agot nga uu nooto, ko ki ma kas iit icheek, ago ki pa kin icheek agoi tulweet parak. Ki ma kiip moingetap arorutyetap Kamuktaindet ne Toroor eng' nganaseet ak ki ma wo Musa agine.

⁴⁵ Ki choorgei anyun Amelegik ak Kanaanik che ki menyei tulwoonooto ak ki par icheek ak ki oon agoi koit Horma.