KAITOSYEK 12 - BUKUIT NE TILIIL Sireet ne Dutero Kanon

Koamei ng'etkong' Miriam ak Aron

¹ Kichaam anyun `Miriam ak `Aron Musa amu kobogoryotap Kush ne ki itun; amu ki itun Chepkusyot.

² Ki le icheek, “Tos ng'alaali Kamuktaindet ne Toroor ak Musa ineegei? Tos ma ng'alaalwech agacheek?” Ak ki kas Kamuktaindet ne Toroor ng'aleechooto.

³ Ago ki chii ne tala miising' Musa kosiir piik tugul che ki mi ng'wony.

⁴ Ki leenji `Kamuktaindet ne Toroor eng' yooto Musa, Aron ak Miriam, “Omong'u saang' okweek somogu, obwa emait ne kituiyechin.” Ak ki mong' saang' tugul ko somok.

⁵ Ki choorgei anyun Kamuktaindet ne Toroor eng' toloitap pooldet ak kotonone kurgeetap Emait. Ki kuur Aron ak Miriam ak ki pwa icheek tuwai.

⁶ Ki leenji anyun Kamuktaindet ne Toroor, “Ogas anyun ng'aleekyuk: Ngo mi maotyot kwenung'wong', aboorchinigei anee Kamuktaindet ne Toroor eng' ng'ang'utyet, ang'alaaljini eng' karwotitoet.

⁷ Ma uu nooto eng' kiboityondennyu Musa; po iman ineendet eng' koonnyu komugul.

⁸ Ki ng'alaaljindos ak ineendet kimni, ma eng' kalewenaik; ak kogeerei ineendet itoondap Kamuktaindet ne Toroor. Kilya anyun si moiywei ochaam kiboityondennyu Musa?”

⁹ Ki toi anyun konereech Kamuktaindet ne Toroor agobo icheek, yeityo kwo.

¹⁰ Ye kingo togosta parak pooldet eng' Emait, ogeero, ki am mogondosaik Miriam, kileelit poortanyi ko uu teluji. Ak ye kingo kusyi kong' Aron, kogeer Miriam kotinyei mogondosaik.

¹¹ Ki leenji anyun `Aron Musa, “Ee, kiptaiyandennyu, asaain ale amat iityech yaityet agobo tengekto ne kageyai acheek eng' abusnateet.

¹² Asaain ale amat koigei ineendet ne kagome, ne neegit konun poortanyi kotom kesich komong' eng' moetap kamet.”

¹³ Ki riirchi anyun `Musa Kamuktaindet ne Toroor koleenji, “Ee, Kamuktaindet ne Toroor asaain ale isoop ineendet.”

¹⁴ Ki leenji `Kamuktaindet ne Toroor Musa, “Nda kagang'utyi kwandanyi togeet, ko tos kama komurwon peetuusyek tisap? Ingegerchi ineendet saang'utap nganaseet peetuusyek tisap, ak ye ibata kimut kogeny konyo kaa.”

¹⁵ Ki kigerchi anyun Miriam saang'utap nganaseet peetuusyek tisap. Ki ma testai piik eng' pandanywa agoi kimut Miriam kogeny konyo kaa.

¹⁶ Kingo pata nooto koba piik eng' Haserot, ak koba koteech surkwen ne po Paran.