KAITOSYEK 11 - BUKUIT NE TILIIL Sireet ne Dutero Kanon

Kang'unyng'unyetap piik eng' Tabera

¹ Ki toi anyun piik kong'unyng'uny ak komwaei che yaach kogasei Kamuktaindet ne Toroor, ak ye kingo kas ineendet ko kotoigei nereegekyik. Ara ki lal maatap Kamuktaindet ne Toroor eng' kwenunnywa ak ki peel ole po tabanwegap nganaseet.

² Ki riirchi anyun `piik Musa ak ki sa `ineendet Kamuktaindet ne Toroor ak kogesunotkei maat.

³ Ara ki kiguure yooto Tabera, amu ki lal maatap Kamuktaindet ne Toroor eng' kwenunnywa.

Koleweni `Musa kandoik tamanwogik tisap

⁴ Ki mi piich alak che chaang' che teerchiin che ki mi kwenutap piigap Israel ak ki sich mageet ne ya pichuuto. Ki riiryo piigap Israel ak icheek kogeny kole, “Ng'oo ne koonech panyeek keam?

⁵ Ki ibwaati njireenik che ki kiame puch eng' Misiri, ingweek, logoek che kigureen melon, kitunguk che eecheen ak che mengeechen ak kitunguk che ng'woneen.

⁶ Ago tinyei saboonwekyok munyasta; ma mi kiy age tugul ne kigeeree kobatee mana chu.”

⁷ Ki kergei mana ak peek che mubere che leelach ak ki uu itoondanywa kiit ne kiguure bedola.

⁸ Kibendoti piik kokweoti, si koip kobwa kong'a eng' koita anan kotui eng' kenusyek, yeityo koyo eng' tereenik ak kochop kobwa magatiinik. Ki chamu amitwok che kagichobei mwaita ne karaaran.

⁹ Ye kingo putyi rewoot nganaseet kemoi, kobwanei mana ak rewondonooto.

¹⁰ Ki kas Musa koriirtos piik eng' kooriikwak, chii age tugul eng' kurgeetap emainnyi. Ki toi konereech Kamuktaindet ne Toroor miising'; ak ki iimak Musa agine.

¹¹ Ak ki leenji `Musa Kamuktaindet ne Toroor, “Amu nee si iyachi ne ya otwogindeng'ung'? Amu nee si ma nyooru chameet eng' taing'ung', kot igesenjo mileetap pichu tugul?

¹² Tos anee ne ki asiche pichu tugul? Tos anee ne ki asich kot ileenjo, ‘Kesene tegeng'ung', ko uu ye keseni kwan lakweet ne reryei,’ ile amut koba emet ne ki iyasyechi kwanisyekwak?

¹³ Anyoorchini ano panyeek che agoochini pichu tugul? Amu riirchino koleen, ‘Koonech panyeek, keam.’

¹⁴ Ma muuchi aneege agesen pichu; amu nyigiis kot eng' anee.

¹⁵ Ngot iyaiywo ko uu ni, asaain ale ibara. Ngo ki anyooru chameet eng' taing'ung', ko mata igoono ageer nyalildanyu.”

¹⁶ Ki leenji `Kamuktaindet ne Toroor Musa, “Iyumwa poisyek tamanwogik tisap che po Israel, che ingen ile icheeget ko poisyek ak pounikwak. Imutu icheek kobwa emait ne kituiyechin si kobiit kotononso kobooten eng' olooto.

¹⁷ Achoorugei anyoone keng'alaal ak inyee eng' olooto, ak anemunenen kebebertap kabuuset ne miten inyee ak ande pichooto. Yeityo kogesen icheek mileetap piik kobooten si ma igeseni inyegei.”

¹⁸ Ileenji piik, “Oanyinygei agobo mutai, si oam panyeek; amu ki oriirchi Kamuktaindet ne Toroor, oleen, ‘Ng'oo ne koonech panyeek keam? Amu ki kigoigoi kemi Misiri.’ Koonok anyun Kamuktaindet ne Toroor panyeek amu nooto, si oam.

¹⁹ Moame eng' peetuut agenge, anan eng' peetuusyek aeng', anan eng' peetuusyek muut, anan eng' peetuusyek taman, anan eng' peetuusyek tiptem,

²⁰ ago oame eng' arawet komugul, agoi kong'uchok kot owech. Amu ki oeesye Kamuktaindet ne Toroor ne mi kwenung'wong', ak oriirchi ole, ‘Kilya si kemong'u eng' Misiri?’ ”

²¹ Ago ki le Musa, “Pichu ami kwenunnywa ko eliphuusyek pogol lo che murenik che punei keelyek; ak kaile igoochini panyeek si koam eng' arawet agenge.

²² Tos kieng'ji keechiirek ak tuuga si koyam icheek? Anan kiyumi ngirenik tugul che mi nyanjet si koyam icheek?”

²³ Ki leenji `Kamuktaindet ne Toroor Musa, “Tos nwach eutap Kamuktaindet ne Toroor? Igeere nguno ingosuldoi anan ngo mesuldoi ng'olyoondennyu agobo inyee.”

²⁴ Ki manda anyun Musa kwo saang' komwachi piik ng'aleegap Kamuktaindet ne Toroor. Ki iyum murenik tamanwogik tisap eng' poisyegap pichooto ak kotet eng' ole neegitee Emait.

²⁵ Ki choorgei Kamuktaindet ne Toroor eng' pooldet ak kong'alaalji Musa, ak ki nam kebebertap kabuuset ne ki mi ineendet konde poisyechooto tamanwogik tisap. Ye kingo tebee icheek kabuuset komaotenso agobo ng'aleek che pwoonei. Ago mata tuun koyai ko uu nooto kogeny.

²⁶ Ki kang'et piik aeng'u eng' nganaseet; ki kiguure age Eldad, keguure age Medad. Ki nyoonji icheek kabuuset nganda ki ma pa ole mi emait, ago kibooto pichooto icheeget che kiga kisir. Ki toi komaoten eng' nganaseet.

²⁷ Ak kilabat murenet age ne neran kwo komwachi Musa koleenji, “Maoteni agobo ng'aleek che pwoonei Eldad ak Medad eng' nganaseet.”

²⁸ Ki wol Joshua weeriitap Nun, kiboityotap Musa, ne agenge eng' murenjoto kineran, koleenji, “Musa, kiptaiyandennyu, kergong' icheek!”

²⁹ Ago ki leenji `Musa ineendet, “Kaamin ng'et kong' agobo anee? Myee nda egu maotik piik tugul che po `Kamuktaindet ne Toroor ak myee nda indoi Kamuktaindet ne Toroor Kabuusennyi ne Tiliil kotebee icheek!”

³⁰ Kiweektagei anyun Musa ak poisyegap Israel nganaseet.

Koamei `piik taok

³¹ Ki us anyun usoonet ne punu Kamuktaindet ne Toroor, ak ki ip taok eng' nyanjet ak ki unda taochooto kobutyi nganaseet, ole yamei pandap peetuut agenge ngeng'eete komosi agoi komosin ngeyiem nganaseet. Ki tirirendos taochooto ne yamei mitait agenge kong'etee ng'wony.

³² Ki ng'eetyo piik peetuunooto komugul, kemounooto komugul ak eng' peetuut ne po aeng' komugul koba koyum taochooto. Ineendet ne ki iyum che ng'ering' ko kiyamei kilo eliphuut agenge. Ki ma pichooto taochooto koyieme nganaseet.

³³ Ye kingo ta komi panyechooto kutusweekwak, kotom kolugui, konereech miising' Kamuktaindet ne Toroor agobo piik, ak ki pare `Kamuktaindet ne Toroor icheek koroito ne ki eet kot.

³⁴ Ko uu nooto ko ki kiguuree yooto Kibrot-hataaba, amu ki kitupchi olooto piik che ki kipkesinik.

³⁵ Ki pa piik eng' Kibrot-hataaba agoi koit Haserot ak ki meny olooto.