KAITOSYEK 1 - BUKUIT NE TILIIL Sireet ne Dutero Kanon

Koitet ne tai ne po piigap Israel

¹ Eng' kenyiit ne po aeng' eng' arawet ne po aeng' eng' peetuut ne po tai, ngap komong' piigap Israel eng' emetap Misiri, ko ki ng'alaalji `Kamuktaindet ne Toroor Musa eng' surkwen ne po Sinai eng' emait ne kituiyechin ak koleenji:

² “Iit tuiyet komugul ne po piigap Israel ko uu ortinwekwak ak ko uu kooriigap kwanisyekwak. Sir ko uu koitetap kainaik, muren age tugul agenge agenge.

³ Oiit ak Aron murenik tugul che imuuchi koba lugeet eng' Israel koosup pcheutigap lugosyekwak, kobooch che ki kotar kenyiisyek tiptem ak kwo tai.

⁴ Ak mi kobootok chiitap ooreet age tugul, age tugul ne oo eng' kootap kwanisyekyik.

⁵ Chu kainaigap murenik che tonondos kobootok si kotoretook: Eng' ooreetap Reuben ko Elisur weeriitap Sedeur;

⁶ Eng' ooreetap Simion ko Selumiel weeriitap Surisadai;

⁷ Eng' ooreetap Judah ko Nason weeriitap Aminadab;

⁸ Eng' ooreetap Issakar ko Natanel weeriitap Suar;

⁹ Eng' ooreetap Zebulun ko Eliap weeriitap Helon;

¹⁰ Eng' lagogap Joseph: eng' che po Ephraim ko Elisama weeriitap Amihud; eng' che po Manasseh ko Gamaliel weeriitap Pedasur;

¹¹ Eng' ooreetap Benjamin ko Abidan weeriitap Gideoni;

¹² Eng' ooreetap Dan ko Aieser weeriitap Amisadai;

¹³ Eng' ooreetap Asher ko Pagiel weeriitap Okran;

¹⁴ Eng' ooreetap Gad ko Eliasap weeriitap Deuel;

¹⁵ Eng' ooreetap Naphtali ko Aira weeriitap Enan.”

¹⁶ Chuuto che ki kikwei eng' tuiyet, pounik che po ortinwegap kwanisyekwak; icheek che kigandoigap eliphuusyek che po Israel.

¹⁷ Ki imut anyun `Musa ak `Aron murenichooto kagemwa kainaikwak,

¹⁸ ak ki iyum `Musa ak `Aron tuiyet komugul kotuiyo eng' peetuut ne po tai ne po arawetap aeng'. Kisirgei piik ko uu ortinwekwak eng' kooriigap kwanisyekwak, chii age tugul eng' kainaikwak kobooch che po kenyiisyek tiptem ak kwo tai, agenge agenge.

¹⁹ Ki iit anyun Musa icheek eng' surkwen ne po Sinai ko uu ye ki ng'at Kamuktaindet ne Toroor.

²⁰ Eng' ooreetap Reuben weeriit ne po tai ne po Israel, ko ki kiit murenik tugul che po kenyiisyek tiptem ak kwo tai. Ki kiit tugul che ki imuuchi koba lugeet, ko uu koitetap kainaikwak agenge agenge, ko uu ibinwekwak, ortinwekwak ak ko uu kooriigap kwanisyekwak.

²¹ Tugul che ki kiit eng' icheek che po ooreetap Reuben ko ki murenik eliphuusyek artam ak lo ak pogol muut.

²² Eng' ooreetap Simion, ko ki kiit murenik tugul che po kenyiisyek tiptem ak kwo tai, tugul che ki imuuchi koba lugeet, kosupkei ak kainaikwak agenge agenge, ko uu ibinwekwak, ortinwekwak ak ko uu kooriigap kwanisyekwak.

²³ Icheek che ki kiit eng' che po ooreetap Simion ko ki eliphuusyek konom ak sogool ak pogol somok.

²⁴ Eng' ooreetap Gad, ko ki kiit murenik tugul kobooch che po kenyiisyek tiptem ak kwo tai, tugul che ki imuuchi koba lugeet kosupkei ak kainaikwak, agenge agenge, ko uu ibinwekwak, ortinwekwak ak ko uu kooriigap kwanisyekwak.

²⁵ Icheek tugul che ki kiit eng' che po ooreetap Gad ko ki eliphuusyek artam ak muut ak pogol lo ak konom.

²⁶ Eng' ooreetap Judah, ko ki kiit tugul kobooch che po kenyiisyek tiptem ak kwo tai, tugul che ki imuuchi koba lugeet, kosupkei ak kainaikwak, ko uu ibinwekwak, ko uu ortinwekwak ak ko uu kooriigap kwanisyekwak.

²⁷ Piik che ki kiit eng' icheek che po ooreetap Judah ko ki eliphuusyek tamanwogik tisap ak ang'wan ak pogol lo.

²⁸ Eng' ooreetap Issakar, ko ki kiit tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ortinwekwak ak ko uu kooriigap kwanisyekwak.

²⁹ Piik tugul che ki kiit eng' icheek che po ooreetap Issakar ko ki eliphuusyek konom ak ang'wan ak pogol ang'wan.

³⁰ Eng' ooreetap Zebulun, ko ki kiit tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

³¹ Che ki kiit eng' icheek che po ooreetap Zebulun, ko ki piik eliphuusyek konom ak tisap ak pogol ang'wan.

³² Eng' ooreetap Joseph, che salu ooreetap Ephraim, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

³³ Che ki kiit eng' icheek che po ooreetap Ephraim ko ki eliphuusyek artam ak pogol muut.

³⁴ Eng' ooreetap Manasseh, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

³⁵ Tugul che ki kiit eng' icheek che po ooreetap Manasseh ko ki eliphuusyek sosom ak aeng' ak pogol aeng'.

³⁶ Eng' ooreetap Benjamin, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

³⁷ Tugul che ki kiit eng' icheek che po ooreetap Benjamin ko ki eliphuusyek sosom ak muut ak pogol ang'wan.

³⁸ Eng' ooreetap Dan, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

³⁹ Tugul che ki kiit eng' icheek che po ooreetap Dan ko ki eliphuusyek tamanwogik lo ak aeng' ak pogol tisap.

⁴⁰ Eng' ooreetap Asher, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko uu ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

⁴¹ Tugul che ki kiit eng' icheek che po ooreetap Asher ko ki eliphuusyek artam ak agenge ak pogol muut.

⁴² Eng' ooreetap Naphtali, ko ki kiit piik tugul kobooch che po kenyiisyek tiptem ak kwo tai, tugul che ki imuuchi koba lugeet, ko ole tee kainaikwak, kosupkei ak ibinwekwak, ko uu ortinwekwak ak ko uu kooriigap kwanisyekwak.

⁴³ Tugul che ki kiit eng' icheek che po ooreetap Naphtali ko ki eliphuusyek konom ak somok ak pogol ang'wan.

⁴⁴ Chuuto piik che ki iit Musa ak Aron ak pounik taman ak aeng' che po Israel kobunu age tugul kootap kwanisyekyik.

⁴⁵ Piik tugul che ki kiit kosupkei ak koorigap kwanisyekwak, icheek tugul che ki imuuchi koba lugeet eng' Israel, kobooch che po kenyiisyek tiptem ak kwo tai,

⁴⁶ ko ki ek tugul eliphuusyek pogol lo ak somok ak pogol muut ak konom.

⁴⁷ Ago ki ma kiit anyun Lawiik kosupkei ak pororyetap kwanisyekwak.

⁴⁸ Kigamwachi `Kamuktaindet ne Toroor Musa koleenji,

⁴⁹ “Amat iit ooreetap Lawi iitite piigap Israel,

⁵⁰ ago inde Lawiik koboi kootap paornateet, tuguuk che mi oriit ak tuguukyik tugul; icheek che ibei koyooto ak tuguukyik che mi oriit. Riibei koyooto ak komeny koyiem yooto.

⁵¹ Ye kimachei kisiipto koot kwo tai, ko Lawiik che putei; ak ye kimachei kitonon koot, ko Lawiik che lumei. Chii age tugul ne ma po ooreetap Lawiik ne riikyin koot, kebarei.

⁵² Teptos anyun piigap Israel eng' pitonwek, kosupkei ak lugosyekwak; chii tugul ak kwanennyi eng' ole mi songolyennyi.

⁵³ Ago menyei koyiemei Lawiik kootap paornateet si manyonji nereeknateet tuiyetap piigap Israel; riibei Lawiik kootap paornateet.”

⁵⁴ Ki yai anyun ko uu nooto piigap Israel, ko uu ye ki kang'at `Kamuktaindet ne Toroor Musa.