JOHANA 9 - BUKUIT NE TILIIL Sireet ne Dutero Kanon

Kosoobi `Jeso chii ne kiga kisich ko koraat

¹ Ak ye ki siirtoi, kogeer chiito ne ki koraat kobooch ko kagisich.

² Ak kiteebe ineendet kasubikyik, koleenji, “Rabbi, ng'oo ne ki yai tengekto, chiichi anan sigiikyik, si kesich ko koraat?”

³ Kowol Jeso kole, “Ki ma yai chiichi tengekto, anan sigiikyik; ago si kobiit kotook poisyosyegap Kamuktaindet eng' ineendet.

⁴ Kanyool keyai poisyosyegap ineendet ne ki iyookwo, kota ko peet: nyoonei kemout, ye ma komuuchi chii kobois.

⁵ Ye ta ami, ko aa lapkeiyetap ng'wony.”

⁶ Ye kingo kagomwa ko uu nooto, kong'utyi ng'ung'unyek, ak kotangwar, ak koilee konyekyik ng'ung'unyechooto,

⁷ ak koleenji, “Ui iunde eng' tamboiyotap Siloam” (ye kiweech keele, “Kiyookto”). Ki wo anyun, ak koun, ak konyo kogeertoi.

⁸ Ki mwa anyun piigap kokwet, ak che kiga kogeer ineendet eng' tai kole soomindet, kole, “Tos ma ineendet ni ne ki cham kotebyei ak kosoomsei?”

⁹ Kole alage, Ineendet: kole alage, Achicha, ago kerge ak ineendet. Kole chiichooto, Aa ineendet.

¹⁰ Ki leenji anyun icheek ineendet, Kagiyatita ano konyeguk?

¹¹ Kowol kole, “Katangwar ng'ung'unyek chiito ne keguure Jeso, ak koilee konyekyuk, ak koleenjo, ‘Ui Siloam ak iunde.’ Kaawe anyun ak aun, ak ageerte.”

¹² Ak ki leenji, “Mi ano ineendet?” Kole, “Mangen.”

Koteebsen Pharisaik chii ne ki koraat

¹³ Ki imut icheek chiichooto ki koraat eng' tai, kwo ole mi Pharisaik.

¹⁴ Ki sabato peetuunooto ye kitangwari Jeso ng'ung'unyek, si koyate konyegap chiichooto.

¹⁵ koteebee anyun Pharisaik kogeny ineendet kole, katepto ano si igeerte? Ak ki leenji, “Kagoiile konyekyuk ng'ung'unyek che katangwar, ak kaaun, ak kaageerte.”

¹⁶ Kole alak che po Pharisaik anyun, Ma punu Kamuktaindet chiichi, amu ma riibei sabato. Ago ki le alage, Imuktoi ano chii ne kiptengekyo koyai kaboorunoik che uu chu? Ak ki piit toiyet eng' kwenunnywa.

¹⁷ Ki leenji anyun kogeny chiito ne koraat, Imwae nee agobo ineendet, amu kayaat konyeguk? Ak ki le, “Maotyo.”

¹⁸ Ma iyan anyun Yahudik agobo ineendet, kole, ko koraat ak kagogeerto. Koguur sigiigap chiichooto kagogeerto,

¹⁹ ak koteebe koleenji, “Tos weeriing'wong' ni, ne omwae ole ki kisich ko koraat? Katepto ano si kogeerto nguno?”

²⁰ Kowol sigiikyik kole, “Kingen keele weeriinnyo niito, ak kingen keele ki kisich ko koraat:

²¹ ago ma kingen ole katepto si kogeerto nguno; ak ma kingen ineendet ne kayaatei konyekyik: oteebe ineendet; kogoeet; ingomwa ineegei.”

²² Ki mwa ng'aleechu sigiikyik, amu ki iywei Yahudik: amu kiga sip kochamyechi Yahudik, kole, ngo ng'aany chii age tugul kole Kristo ineendet, kibeetoi eng' sinagogit.

²³ Ki mwa anyun sigiikyik amu nooto kole, “Oteebe, amu kogoeet ineendet. ”

²⁴ Ki kuur anyun ne po aeng' pichooto chiichooto ki koraat, ak koleenji, “Igoochi Kamuktaindet kalasunet: kingen keele kiptengekyo chiichi.”

²⁵ Kowol anyun ineendet kole, “Ngo kiptengekyo chiichooto, ko mangen. Angen kiit agenge, ale, koa koraat, ago ageertoi nguno.”

²⁶ Koleenji anyun icheek ineendet, “Kayaun nee? Kayatita ano konyeguk?”

²⁷ Kowolji icheek koleenji, “Kaamwaiwok, ama ogas, kalya si omach ogas kogeny? Omache oegu ak okweek kasubikyik?”

²⁸ Ak king'emji kuut ineendet kole, “Ii kasubindennyi so? Ago ki kasubigap Musa acheek.”

²⁹ Kingen keele kigong'alaalji `Kamuktaindet Musa: ago ma kingen kole po chiichi.

³⁰ Kowolji chiichooto icheeget koleenji, “Kwang'ut niito anyun, amu mongen ole punu, ago kagoyat konyekyuk.

³¹ Kingen keele ma kasei Kamuktaindet kiptengeginik: ago ngo lasu chii age tugul Kamuktaindet, ak koyai magennyi, kogasei ineendet.

³² Kobooch ngetoi ng'wony koma ki kas keele ki yaat chii konyegap chiito ne ki kisich ko koraat.

³³ Nda ma punu Kamuktaindet chiichi koma koi imuuch koyai kiy.”

³⁴ Kowolji ineendet koleenji, “Ki kisikten iman tengekwogik, ak ineetech?” Ak ki toorta ineendet kwo saang'.

Koneeti Jeso agobo koraatet ne po oriit

³⁵ Ki kas Jeso kole kagetoorta ineendet kwo saang'; ak kingo nyoor ineendet, koleenji, “Tos iyani Weeriitap Kamuktaindet?”

³⁶ Ak ki wol kole, “Ng'oo nooto, Kiptaiyat, si kobiit ayan ineendet?”

³⁷ Koleenji Jeso, Kaigeer ineendet ak ko ineendet ni ng'alaali kobooten.

³⁸ Ak ki le, Kiptaiyat, ayani. Ak kogutung'ji kolas ineendet.

³⁹ Ak ki le Jeso, “Ki anyoo ng'wonyuni amu kirwooget, si kobiit kogeerto che ma keertoi; ak kogoryo che keertoi.”

⁴⁰ Ki kas tuguuchuuto alak che po Pharisaik che ki mi kobooto ineendet ak koleenji, “Ki koryotin agacheek?”

⁴¹ Koleenji Jeso, “Nda oo koryotiin okweek, ta motinye tengek; ago nguno omwae ole, ‘Kigeertoi’ nooto anyun, tebyei tengektong'wong'.”