JOHANA 8 - BUKUIT NE TILIIL Sireet ne Dutero Kanon

¹ Ago ki wo Jeso tulweetap Mseituni.

² Ak kimus karon konyo Hekaluut, ak ki pwa piik tugul ole mi ineendet; ak ki tep ng'wony, koneet icheek.

³ Ak ki imut siriik ak Pharisaik kobogoryot ne ki kinamji ibeetapkei; ak ye kingo kaginde kwenut,

⁴ keleenji, “Kaneetindoni, kaginam kobogoryondoni eng' ibeetapkei, kota komi ibeetapkei.

⁵ Ki ng'atech Musa eng' Ng'atuutyet kole, Kilage koik ne uu niito: ara ileen nee inyee?”

⁶ Ki mwaei ng'olyoondoniito kotyemei ineendet, si kosich kiit ne kitaame. Ago ki ing'uruuk Jeso, kosir ng'wony eng' mornennyi.

⁷ Ago ye kingo ta koteepse ineendet, kotonon, ak koleenji, “Ingotoi ne ma tinye tengek eng' okweek kowiir eng' koita.”

⁸ Ak ki ing'uruuk kogeny kosir ng'wony eng' mornennyi.

⁹ Ak ye kingo kas icheek ng'olyoondonooto, komanda kobee agenge agenge, kobooch ne oo agoi ne po let: ak ki ng'et Jeso ineegei, ak kobogoryondonooto eng' ole ki mi, kotononi eng' kween.

¹⁰ Kotonon Jeso anyun ak koleenji, “Kobogoryondoni, mi ano icheek? Ma igikyin chii?”

¹¹ Ak ki le, “Ma igiikyo chii, Kiptaiyat.” Ak ki leenji Jeso, “Ma kiikyinin agane, ui anyun; kobooch nguno, koma tata iyai tengek.”

Lapkeiyet ne po ng'wony

¹² Ki mwachi Jeso anyun icheek kogeny, koleenji, “Aa lapkeiyet ne po ng'wony: ineendet ne isuba ko ma wendoti eng' mesundeito, ago nyooru lapkeiyetap saboondo.”

¹³ Koleenji anyun `Pharisaik ineendet, “Ibaoryanjinigei; ma po iman paornateng'ung'.”

¹⁴ Kowolji Jeso koleenji, “Agot ngabaoryanjinigei, ko po iman paornatennyu; amu angen ole abunu, ak ole awendi; ago mongen ole abunu, anan ole awendi.

¹⁵ Orwoochi ko uu mageetap poorto; marwookyini chii anee.

¹⁶ Ee, agot ngarwoch, ko po iman kirwoogennyu; amu ma mi aneege, ago kimi ak Kwanda ne ki iyookwo.

¹⁷ Ee, ak ki kisir eng' Ng'atuutyeng'wong' keele, po iman paornateetap piik aeng'.

¹⁸ Aa ineendet ne abaoryanjinigei, ak paoryanjino Kwanda ne ki iyookwo.”

¹⁹ Koleenji anyun icheek ineendet, “Mi ano Kwandang'ung'?” Kowol Jeso kole, “Mongeno, anan Abba. Nda ki konaa, ta ki ongen Abba agine.”

²⁰ Ki mwa ineendet ng'aleechu eng' ole kigonoree silingisyek, ye ki ineetisyei eng' Hekaluut: ak ma nam chii ineendet; amu kitom koit sainnyi.

Kateunoik agobo peetuusyek che pwanei

²¹ Ki mwachi anyun icheeget kogeny, koleenji, “Awendi, ak tuun ocheeng'a, ak obegu eng' tengektong'wong': ole awendi, ko momuuchi obwa.”

²² Ki le anyun Yahudik, Tos pargei, amu mwaei kole, “Ole awendi, ko momuuchi obwa?”

²³ Ak ki leenji, “Oo po oli po ng'wony, aa po parak: oo po ng'wonyuni; ma po anee ng'wonyuni.

²⁴ Nooto kaamwaiwok, ale, obegu eng' tengekwogikwok: amu ngo moyuani ole aa ineendet, obegu eng' tengekwogikwok.”

²⁵ Ki leenji anyun icheek ineendet, “Ii ng'oo?” Koleenji Jeso, “Nooto ki amwaiwok kobooch taunet.

²⁶ Atinye tuguuk che chaang' che amwae ak che arwoochi agobo okweek: ago po iman ineendet ne ki iyookwo; ak amwachini ng'wony tuguuk che ki agas eng' ineendet.”

²⁷ Ago ma iguiyo kole mwachin agobo Kwanda.

²⁸ Ki leenji Jeso anyun, Ye kaouite Weeriitap chii, onai anyun eng' peetuunooto ole aa ineendet, amayae kiy aneege, ago amwae tuguuchu ko uu ye ki ineeta Kwanda.

²⁹ Ak kimi tuwai ak ineendet ne ki iyookwo; ma pagaakta aneege; amu ayae kotugul tuguuchooto chamaksei eng' ineendet.

³⁰ Ak ye kita komwaei tuguuchu, koyan ineendet che chaang'.

Kocheerei `Jeso Yahudik

³¹ Ki leenji Jeso anyun Yahudichooto kiga koyan ineendet, Ngot otebye okweek eng' ng'olyoondennyu, ko oo kasubikyuk iman;

³² ak onai imanda, ak kotyachak imanda.

³³ Kowolji icheek ineendet koleenji, “Ki kesweegap Abraham, ak tomo keegu otwogigap chii age tugul ole kinye kora. Imwaitoi ano anyun ile, ‘Kityaachok?’ ”

³⁴ Kowolji Jeso koleenji, “Amwaiwok, iman, iman, ale, age tugul ne yaei tengek ko otwogindetap tengek.

³⁵ Ak ma tebyei otwogindet eng' koot koigeny; tebyei weeriit koigeny.

³⁶ Ngo tyachak anyun Weeriit, ko otyagotin iman.

³⁷ Angen ale oo kesweegap Abraham; ago ocheeng'e obara, amu ma tinyei ng'olyoondennyu ole tebee eng' okweek.

³⁸ Amwae tuguuk che ki ageer eng' Abba: ak oyae tuguuchooto ki ogas eng' kwandang'wong'.”

³⁹ Kowolji koleenji, “Kwandanyo ko Abraham.” Koleenji Jeso, “Nda ki oo lagogap Abraham, ta ki oyae poisyosyegap Abraham.

⁴⁰ Ago ngo ocheeng'e obara, chiito ne kamwaiwok ng'aleek che po iman, che ki agas eng' Kamuktaindet: ki ma yai ko uu nooto Abraham.

⁴¹ Oyae poisyonik che po kwandang'wong'.” Ki leenji anyun ineendet, “Ki ma kisichech eng' sokseet; ki tinyei Kwanda agenge, nooto ko Kamuktaindet.”

⁴² Komwachi Jeso icheek koleenji, “Nda ka Kwandang'wong' Kamuktaindet, ta kaochama; amu ki anyoo abunu Kamuktaindet. Ki ma anyoo aneege, ago ki iyookwo ineendet.

⁴³ Amu nee si monai chooto amwae? Amu momuuchi ogas ng'olyoondennyu.

⁴⁴ Oo po kwandang'wong' chesawilyet, ak ochame oyai magutigap kwandang'wong'. Ki rumiindet kobooch taunet, ama tononi eng' imanit, amu ma mi imanit eng' ineendet. Ye mwaei lembech, komwaei agobo tuguukyik, amu kiplembechwa ineendet ak kwanda ne po nooto.

⁴⁵ Ago moyana amu amwae imanit.

⁴⁶ Ng'oo eng' okweek ne igiikyino kole atinye tengek? Ngot amwae imanit, ko amu nee anyun si moyana?

⁴⁷ Ineendet ne po Kamuktaindet kogasei ng'aleegap Kamuktaindet: nooto anyun mogase okweek, amu mo po Kamuktaindet.”

Jeso ak Abraham

⁴⁸ Kowolji anyun Yahudik koleenji, “Ma kimwae acheek iman keele, ii Samarindet, ak itinye oindet?”

⁴⁹ Kowol Jeso kole, “Ma tinyei oindet; ago agonyiti Abba, ak oteweera.

⁵⁰ Ago ma cheeng'e toroornatennyu: miitei agenge ne cheeng'ei ak korwoochi.

⁵¹ Amwaiwok, iman, iman, ale, ngo riip chii ng'olyoondennyu koma keerei meet agoi.”

⁵² Koleenji anyun Yahudik, “Kingen nguno keele itinye oindet. Ki kome Abraham, ak ki kobek maotik; ak imwae ile, ‘Ngo riip chii ng'olyoondennyu, koma chamchami meet agoi.’

⁵³ Tos ii oo isiir kwandanyo Abraham, ne ki kome? Ki kobek maotik. Iyaegei iegu ng'oo?”

⁵⁴ Kowol Jeso kole, “Ngot atoroorige, ko puch toroornatennyu. Kwandanyu ne itoroora; ne omwae ole, ‘Ineendet ko Kamuktaindet neng'wong',’

⁵⁵ ak tomo onai ineendet. Ago angen ineendet; ak ngot amwa ale, mangen ineendet, aegu kiplembechwa, ko uu okweek: ago angen ineendet ak ariibe ng'olyoondennyi.

⁵⁶ Ki paibai kwandang'wong' Abraham kogeer peetuunnyu; ak ki keer, ak kogaskei.”

⁵⁷ Koleenji Yahudik anyun, “Tom iit kenyiisyek konom, ak ki igeer Abraham?”

⁵⁸ Koleenji Jeso, “Amwaiwok, iman, iman, ale, Kingo tomo kobiit Abraham, ami.”

⁵⁹ Ki inem anyun koik komachei kowiire ineendet: ago ki unygei Jeso, ak komanda eng' Hekaluut.