JOHANA 4 - BUKUIT NE TILIIL Sireet ne Dutero Kanon

Jeso ak kobogoryotap Samaria

¹ Ye kingo nai Kiptaiyat kole ki kogas Pharisaik kole ki yaei `Jeso piik koek kasubik ak kobatisani che siirei che ki ibatisan Johana

² (ago ma Jeso ineendet ne ki ibatisanisyei, ago kasubikyik),

³ kong'eet eng' Judea, kwo kogeny Galilaya.

⁴ Ak ki kanyool kobun Samaria.

⁵ Ki it anyun nganaseet ne po Samaria, ne kiguure Sykar, ne neegitee kooret ne ki igoochi Jakobo weeriinnyi Joseph:

⁶ ak ki mi olooto keriingetap peek ne po Jakobo. Kitebyei anyun Jeso eng' ye neegitee keriingetap peek, amu ng'etatetap pandanyi. Ki olo po sait lo.

⁷ Ki nyo kobogoryot ne po Samaria kosiil peek: koleenji Jeso, Inaga aee.

⁸ Amu kigaba kasubikyik nganaseet koal amitwogik.

⁹ Ki leenji anyun kobogoryot ne po Samaria, Katepto ano si isooma peek che iee, ak inyee ko ii Yahudyot, ak anee ko aa kobogoryotap Samaria? (Amu ma namegei Yahudik ak Samarik.)

¹⁰ Kowolji Jeso koleenji, “Nda kengen konunetap Kamuktaindet, ak ineendet ne kalenjin, ‘Inaga peek aee,’ ta kaisoom ineendet, ak ta kagogoonin peegap saboon.”

¹¹ Koleenji kobogoryot, Kiptaiyat, metinye kiit ne isiile, ak loo keriinget: inyoorchini ano anyun peechooto po saboon?

¹² Ii oo inyee eng' kwandanyo Jakobo, ne ki koonech keriingoni, ne kiee ineendet ak weeriikyik, ak tuukyik?

¹³ Kowolji Jeso koleenji, “Age tugul ne eei peechu kota koamei melel kogeny:

¹⁴ ago age tugul ne eei peek che agoochini koma koamei melel agoi; ago egu peek che agoochini kondap peek eng' ineendet, che kuutu agoi saboondap koigeny.”

¹⁵ Koleenji kobogoryot, Kiptaiyat, inaga peechooto, si ma koama melel, si ma anyoone asiile peek eng' oli loo.

¹⁶ Koleenji Jeso kobogoryondonooto, Ui, iguur manong'otyondeng'ung', ak obwa yuto.

¹⁷ Kowolji kobogoryot koleenji, “Ma tinyei manong'otyot.” Koleenji Jeso, “Kaimwa komyee ile, ‘Ma tinye manong'otyot’,

¹⁸ amu ki otebi ak manong'otaik muut; ak ineendet ne omi tuwai nguno koma manong'otyondeng'ung': kaimwa anyun iman niito.”

¹⁹ Koleenji kobogoryot, Kiptaiyat, kaageer ale ii maotyo.

²⁰ Ki saaei kwanisyekyok eng' tulwooni; ak oleen okweek, Jerusalem ole kanyool kosaae piik.

²¹ Koleenji Jeso, Kobogoryondoni, iyana, nyoonei sait, ye ma kosaae Kwanda eng' tulwooni, anan eng' Jerusalem.

²² Osae ne mongen: kisaae acheek ne kingen: amu punu yetunet Yahudik.

²³ Ago nyoonei sait, ak kagoit nguno, ye saaei Kwanda saaik che po iman eng' Kabuuset ne Tiliil ak imanit: amu cheeng'oti Kwanda che uu chooto koek che saaei ineendet.

²⁴ Kamuktaindet ko kabuuset: ak kanyool kosa ineendet eng' kabuuset ak imanit che saaei ineendet.

²⁵ Koleenji kobogoryot, Angen ale nyoonei Mesia (ne keguure Kristo): ye nyo ineendet, komwaiwech tuguuk tugul.

²⁶ Koleenji Jeso, Aa ineendet ne ang'alaalun.

²⁷ Ki pwa anyun kasubikyik; ak ki kwong'yo amu ki ng'alaali ak kobogoryot; ago ma mwachi chii kole, “Icheeng'e nee? Anan, Kalya si ong'alaal ak ineendet?”

²⁸ Ki pagaakta anyun kobogoryot tereennyi po pei, ak kwo nganaseet, ak komwachi piik koleenji,

²⁹ Obwa ogeer chiito ne kamwaiwo tuguuk tugul che ki ayai atkinye kora: tos Kristo niito?

³⁰ Ki mong' anyun eng' nganaseet kobwa ole mi ineendet.

³¹ Kingo ta kobwanei, kosoom kasubikyik, kole, “Rabbi, amisye.”

³² Ago ki leenji icheek, “Atinye amitwogik che aame che mongen.”

³³ Koleenjigei anyun kasubikyik, “Tos kagoipchi chii kiy ne amei?”

³⁴ Koleenji Jeso, “Amitwogikyuk ko ayai mageetap ineendet ne ki iyookwo, ak ageesu poisyennyi.

³⁵ Momwae okweek ole, ‘Ta komi arawek ang'wanu, si koit kesisyet?’ Ogeero, amwaiwok ale, ‘Ong'eet met, ak ogeer mbareenik ole kagoleelagitu, kagoyam keges.

³⁶ Ineendet ne kesei kotaachei melekto, ak koyumi logoek che po saboondap koigeny; si koboiboitu tuwai ne koolei ak ne kesei.

³⁷ Amu po iman mwaoni eng' ni, kolei age, kogesei age.

³⁸ Ki ayooktook oges che ki ma onyalilji: kigonyalilji alage, ak kaonam okweek uuindap poisyennywa.’ ”

³⁹ Ki iyan anyun ineendet Samarik che chaang' che po nganasanooto amu ng'olyootap kobogoryot, ne kibaoryan kole, “Kamwaiwo tuguuk tugul che ki ayai atkinye kora.”

⁴⁰ Nooto anyun, ye kingo pwanji ineendet `Samarik, kosoom kole kotebi kobooto icheek; ak ki peni olooto peetuusyek aeng'.

⁴¹ Ak ki iyan alak che chaang' amu ng'olyoondennyi;

⁴² ak ki leenji kobogoryot, “Kiyani nguno, ma amu ng'alaaleng'ung': amu kagegasyige; ak kingen iman keele niito ko Yetindetap ng'wony.”

Kosoobi Jeso weeriitap kiboityotap kaplaitoryat

⁴³ Ak kingo pata peetuusyechooto aeng'u kong'eet eng' olooto kwo Galilaya.

⁴⁴ Amu kibaoryan Jeso ineendet kole, “Ma tinyei maotyondo teegisto eng' emennyi.”

⁴⁵ Ak kingo nyo anyun Galilaya, kotaach ineendet piigap Galilaya, ko kagogeer tuguuk tugul che ki yai ineendet eng' Jerusalem eng' igoorto: amu kigaba ak icheek igoorto.

⁴⁶ Ki nyo anyun ineendet kogeny Kana ne po Galilaya, ole kiyae peek koek divaik. Ak ki mi kiboityot age ne po kaplaitoryat, ne ki myani weeriinnyi eng' Kapernaum.

⁴⁷ Ye kingo kas kole kagomong' Jeso eng' Judea konyo Galilaya, kwo ole mi ineendet, ak ki soom kochoorgei, kosoop weeriinnyi; amu ki neegit kome.

⁴⁸ Koleenji anyun `Jeso ineendet, Ngot ko mogeer kaboorunoik ak kwang'utik, koma koi oyan matiny.

⁴⁹ Koleenji kiboityondonooto, Kiptaiyat, chooruge kotom kome lakweennyu.

⁵⁰ Koleenji `Jeso ineendet, Ui inyee; sabei weeriing'ung'. Koyan anyun chiichooto ng'olyoot ne kamwachi Jeso, ak kwo.

⁵¹ Ak ye kita kochoortagei, kotuiyo ak otwogikyik, ak koleenji, Sabei weeriing'ung'.

⁵² koteebee anyun kole kogaigaitu kotya. Koleenji anyun pichooto ineendet, Kobagaakta eseet ineendet amut sait tisap.

⁵³ Konai anyun kwanda kole ko sainooto ne komwachin Jeso koleenjin, Sabei weeriing'ung': ak ki iyan ineendet ak koonnyi komugul.

⁵⁴ Nooto kaboorunet ne po aeng' ne ki yai Jeso kobooch ngo mong' eng' Judea konyo Galilaya.