JOHANA 3 - BUKUIT NE TILIIL Sireet ne Dutero Kanon

Nikodemo ak Jeso

¹ Ki mi chii ne po Pharisaik, ne ki kiguure Nikodemo, ki pounindet ne po Yahudik:

² ki nyo chiichooto ole mi ineendet kemoi, ak koleenji, “Rabbi, kingen keele ii kaneetindet ne punu Kamuktaindet: amu ma mi chii ne imuuchi koyai kaboorunoichu iyae inyee, ngo ma mi Kamuktaindet kobooto ineendet.”

³ Kowolji Jeso koleenji, “Amwaun, iman, iman, ale, ngot koma ki sich chii eng' sigeet ne leel, koma koi imuuch kogeer laitornatetap Kamuktaindet.”

⁴ Koleenji `Nikodemo ineendet, “Kisiktoi ano chii ye kagoosit? Imuuchi kogetyigei moetap kamet kogeny, ak kesich?”

⁵ Kowolji Jeso koleenji, “Amwaun, iman, iman ale, ngot koma ki sich chii eng' peek ak Kabuuset ne Tiliil, koma koi imuuch komong'ji laitornatetap Kamuktaindet.

⁶ Ne ki kisich eng' poorto ko poorto; ak ne ki kisich eng' Kabuuset ne Tiliil ko kabuuset.

⁷ Amekwong' amu kamwaun ale, ‘Kanyool kesichok eng' sigeet ne leel.’

⁸ Usyin koristo ole machei, ak igase cheennyi, ago mengen ole punu, anan ole wendi. Ara uu nooto chii age tugul ne kagisich eng' Kabuuset ne Tiliil.”

⁹ Kowolji Nikodemo koleenji, “Imuuchi kobiitunda ano tuguuchu?”

¹⁰ Kowolji Jeso koleenji, “Ii kaneetindetap Israel, ameguitosi tuguuchu?

¹¹ Amwaun, iman, iman, ale kimwae ne kingen, ak kebaoryanjini ne kagegeer; amotaache paornatennyo.

¹² Ngamwaiwok tuguuk che po ng'wony, amoyani, omuktoi ano oyan ngamwaiwok tuguuk che po kipsengwet?

¹³ Ma mi chii ne ki togosta kipsengwet, kobatee ineendet ne ki choorgei eng' kipsengwet, ineendet ko Weeriitap chii ne mi kipsengwet.

¹⁴ Ak ko uu ye ki igartaat Musa ereneet eng' surkwen, kigartoti ko uu nooto Weeriitap chii matiny:

¹⁵ si konyoor saboondap koigeny eng' ineendet age tugul ne iyani.

¹⁶ Amu ki cham Kamuktaindet ng'wony miising', kot kogoito Weeriinnyi ne ki kisich ineegei, si ma lus age tugul ne iyani ineendet, ago si konyoor saboondap koigeny.

¹⁷ Amu ki ma iyookyi `Kamuktaindet Weeriit ng'wony korwookyi ng'wony; ago si kesar ng'wony eng' ineendet.”

¹⁸ Ma kirwookyin chii ne iyani ineendet: ago ineendet ne ma iyani, ko kagirwookyi, amu ma iyan eng' kainetap Weeriitap Kamuktaindet ne ki kiii ineegei.

¹⁹ Ak ni kirwooget, amu ki nyoonji ng'wony lapkeiyet, ak ki cham piik mesundeito kosiir lapkeiyet; amu ki yaach poisyonikwak.

²⁰ Amu wechei lapkeiyet chii tugul ne yaei yaityo, ama nyoonei ineendet ole mi lapkeiyet, si ma ng'ang'agis poisyonikyik.

²¹ Ago nyoonei ole mi lapkeiyet ineendet ne yaei imanda, si kobiit kibarta poisyonikyik, keele ki kiyai eng' Kamuktaindet.

Komwaei Johana agobo Jeso

²² Kingo pata tuguuchu konyo Jeso ak kasubikyik emet ne kiguure Judea; ak kibeni olooto kobooto icheek, ak kobatisanis.

²³ Ak ki ibatisanisyei Johana agine eng' Aenon ne neegitee Salim, amu ki mi peek che chaang' olooto; ak ki pwa piik, ak ki kibatisan.

²⁴ Amu kitom ketoorchi Johana korgoreet.

²⁵ Ki piit anyun teebutyet eng' alak che po kasubigap Johana ak Yahudyot agobo katiliilet.

²⁶ Ak ki pwanji Johana, ak koleenji, “Rabbi, ibatisanisyei ineendet ne ki mi kobooten eng' Jordan komosin, ne ki ibaoryan agobo ineendet, ak pwaanjin ineendet `piik tugul.”

²⁷ Kowol Johana kole, “Ma koi imuuch chii kotaach kiy, ngo ma kigoochi eng' kipsengwet.

²⁸ Ki obaoryanjo okweeget ole ki amwa ale, ‘Ma aa Kristo’, ago oleen ki kiyokwo andoune ineendet.

²⁹ Sandet ineendet ne tinyei murereet: ago paibai miising' chorweetap sandet, ne tononi koepchin iit ineendet, amu kutitap sandet: isuldaat anyun poiboiyoninyu.

³⁰ Nyoljin ineendet koeet ne matiny, ago aming'initu.”

Ineendet ne punu parak

³¹ Oo ineendet ne punu parak kosiir tugul: ineendet ne po ng'wony ko po ng'wony, ak ng'alaali che po ng'wony: ineendet ne punu kipsengwet ko oo kosiir tugul.

³² Paoryanjin ineendet kiit ne ki kogeer ak ne ki kogas; ama mi chii ne taachei paornatennyi.

³³ Ineendet ne kagotaach paornatennyi ko kagonde ng'ooksennyi, kole po iman Kamuktaindet.

³⁴ Amu ng'alaali ng'aleegap Kamuktaindet ineendet ne ki iyoogu Kamuktaindet; amu ma koonu ineendet Kabuuset ne Tiliil eng' karagendoet.

³⁵ Chamei Kwanda Weeriit, ak ki konde tuguuk tugul eunnyi.

³⁶ Tinyei saboondap koigeny ne iyani Weeriit; ama keerei saboondo ne ma kase iit Weeriit, ago tebee nereegegap Kamuktaindet paragunnyi.