JOHANA 18 - BUKUIT NE TILIIL Sireet ne Dutero Kanon

Kenamei Jeso

¹ Ye kingo kagomwa Jeso ng'aleechu, koba ak kasubikyik kolanda eng' kereruut ne kiguure Kedron, ole ki mi mbareet, ole ki wo ineendet, kobooto kasubikyik.

² Ak ki ingen koronooto Judas agine, ne king'wektoi ineendet: amu ki cham kowendi Jeso yooto kobooto kasubikyik.

³ Ak kingo kagonyoor Judas lugeetap kiplugotinik, ak kiptainik che punu tisiik che eecheen ak Pharisaik, kobwa kotinyei taisyek ak kegenganik ak kariik che po lugeet.

⁴ Kwo anyun Jeso, ko kagonai tuguuk tugul che pwaanjin ineendet ak koleenji, “Ocheeng'e ng'oo?”

⁵ Kowolji koleenji, “Jeso ne po Nazareth.” Koleenji Jeso, “Aa ineendet.” Ak ki tononi kobooto icheek Judas agine, ne king'wektoi ineendet.

⁶ Ye kingo mwachi anyun kole, “Aa ineendet,” kobee patai ak kobutyo.

⁷ Ki teebe anyun icheek kogeny, kole, “Ocheeng'e ng'oo?” Ak kole, “Jeso ne po Nazareth.”

⁸ Kowol Jeso, kole, “Kaamwaiwok ale aa ineendet; nooto anyun ngo cheeng'a ounde chu koba.”

⁹ Si kosulda ng'olyoot ne ki mwa kole, “Ma petena agot agenge eng' chooto ki igoono.”

¹⁰ King'us anyun Simion Petero rotwetap chok ne ki tinyei, ak koep otwogindetap tisiindet ne oo, koep iitinnyi ne po tai. Ki kiguure otwogindonooto Malko.

¹¹ Koleenji Jeso anyun Petero, Weekyi rotweet choget: tos maee kigombet ne kagoono Kwanda?

Komi Jeso taitap Annas tisiindet ne oo

¹² Konam anyun lugeet ak kiptaiyat ne oo, ak kiptainik che po Yahudik, Jeso ak koraat ineendet,

¹³ ak komutyi Anas korook; amu ki kabyugoit ne po Caiaphas, ne ki tisiindet ne oo kenyinooto.

¹⁴ Caiaphas nooto ne ki iboorchi Yahudik kole, nyolu komechi chiito agenge piik.

Koeesyoi `Petero Jeso

¹⁵ Ki isup anyun Simion Petero Jeso, ak age eng' kasubik. Amu ki ingengei tisiindet ne oo ak nooto agenge eng' kasubik, koba koot oriit kobooto Jeso agoi kapkirwoogetap tisiindet ne oo.

¹⁶ Kitononi Petero eng' saang' ye neegit kurgeet. Ki manda anyun chiichooto agenge eng' kasubik ne ki ingengei ak tisiindet ne oo, ak kong'alaalji chepto ne kiriibei kurgeet, ki imut Petero konyo ko.

¹⁷ Koleenji anyun chepto ne kiriibei kurgeet Petero, Ma ii agenge eng' kasubigap chiichi? Kole, Ma anee.

¹⁸ Ak kitonondos eng' yooto otwogik ak kiptainik, che kiga kolaal maat ne po nesek, amu ki kaitit; ak kiyue maat: ak kitononi Petero agine kobooto icheek, koyue maat.

Koteepseen `tisiindet ne oo Jeso

¹⁹ Ki teebe anyun tisiindet ne oo Jeso agobo kasubikyik ak kaneetisyennyi.

²⁰ Kowolji Jeso koleenji, “Ki ang'alaalji ng'wony, amauny ng'olyoo; ki aneetisye kotugul eng' sinagogisyek, ak eng' Hekaluut, ole tuiyechin Yahudik tugul; amamwa kiy eng' ung'oot.

²¹ Amu nee si iteebena? Teebe icheek che ki kas kiit ne ki amwachi icheek; keero, ingen chu tuguuk che ki amwa.”

²² Ak ye kingo kagomwa ko uu niito, korabach Jeso age eng' kiptainik che kitonondos eng' yooto kole, “Iwoljini tisiindet ne oo ko uu nooto?”

²³ Kowolji Jeso koleenji, “Ngot ko kaamwa ne ya, ibaoryan agobo nooto ya: ago ngot ko myee, ko amu nee si irabaacha?”

²⁴ Ki iyookto anyun Anas ineendet ko rataat kwo kap Kaiapa, tisiindet ne oo.

Kotiitos `Petero Jeso kogeny

²⁵ Ak kitononi Simion Petero koyue maat. Koleenji anyun icheek ineendet, Ma ii age aginye ne po kasubikyik? Kotiiyo kole, “Ma aa ineendet.”

²⁶ Kole otwogindet age ne po tisiindet ne oo ne kitilyonut ak chiichooto kiebei Petero itinnyi, Koma ageerin eng' mbar omi ak ineendet.

²⁷ Kotiiyo anyun Petero kogeny; ak eng' sainooto koote kipsoiywet.

Komi Jeso taitap Pilato

²⁸ Ki imut Jeso anyun kong'etee kap Kaiapa kwo Praitorium: ak kita ko karon miising'; ak ma pa icheeget Praitorium oriit, si ma ng'woneegitu, ago si kobiit koam paska.

²⁹ Ki manda Pilato anyun kwo ole mi icheek, ak kole, “Nee ng'olyoo ne orwookyine chiichi?”

³⁰ Kowolji koleenji, “Nda koma ko chalwogin chiichi, ta koma kimutu ineendet konyo taing'ung'.”

³¹ Koleenji Pilato icheek anyun, Onam ineendet okweek, ak orwookyi ko uu ng'atuutyeng'wong'. Koleenji anyun Yahudik, Ma chamdaat eng' acheek kebar chii age tugul:

³² si kobiit kosulda ng'olyootap Jeso, ne ki mwa, kobooru meet ole meitoi ineendet.

³³ Ki wo anyun kogeny Pilato Praitorium oriit, ak koguur Jeso, koleenji, “Tos ii Laitoryatap Yahudik?”

³⁴ Kowolji Jeso koleenji, “Imwae ng'olyoondoni inyegei anan komwaun alak agobo anee?”

³⁵ Kowol Pilato kole, “Aa Yahudyot? Kagomutun tainnyu pororyeng'ung' ak tisiik che eecheen. Ki iyai nee?”

³⁶ Kowol Jeso, kole, “Ma po ng'wonyuni laitornatennyu: nda po ng'wonyuni laitornatennyu, ko kata yaei pooryeet kasubikyuk si ma kindea eunegap Yahudik: ago nguno koma po laitornatennyu oli.”

³⁷ Koleenji anyun Pilato ineendet, “Ara, ii laitoryat so?” Kowol Jeso kole, “Imwae ile aa laitoryat. Ki kisicha amu niito, ak ki anyoo ng'wony amu niito, si kobiit abaoryanji imanit. Kasei kutinnyu chii age tugul ne po imanit.”

³⁸ Koleenji Pilato, Nee imanit? Ak ye kingo kagomwa ko uu ni, komanda kogeny ole mi Yahudik, ak koleenji, “Ma anyoorchi anee leluut ineendet.

Ketiljin Jeso kirwoogetap meet

³⁹ Ago otinye piteet, ole atyakwok age eng' paska: ara omache atyakwok Laitoryatap Yahudik?”

⁴⁰ Kobolyo anyun kogeny, kole “Ma chiichi, ago Barabbas!” Ago anyun, ki rebindet Barabbas.