JOHANA 17 - BUKUIT NE TILIIL Sireet ne Dutero Kanon

Saaet ne po Jeso

¹ Ki mwa Jeso ng'aleechu; ak konyal kipsengwet, ak kole, “Abba, kagonyo sait; itoroor Weeriing'ung', si kotoroorin Weeriit;

² ko uu ye ki igoochi ineendet kimnateet koboi piik tugul, si kobiit kogoochi saboondap koigeny tugul che ki igoochi ineendet.

³ Ak ni saboondap koigeny, ale konain Kamuktaindet ne inyeendet inyegei ne po iman, ak Jeso Kristo, ne ki iyoogu.

⁴ Ki atoroorin eng' ng'wony, amu kaagesu poisyet ne ki igoono ayai.

⁵ Ak nguno, ee Abba, itoroora eng' inyeendet inyegei eng' toroornatet ne ki atinye kemi tuwai kotom kobiit ng'wony.

⁶ Ki aboorchi kaineng'ung' piik che ki igoono eng' ng'wony. Ki cheguuk, ak ki igoono; ak ki koriip ng'olyoondeng'ung'.

⁷ Kagonai nguno kole punun tuguuk tugul che ki igoono;

⁸ amu ki agoochi icheek ng'aleek che ki igoono ak ki kotaach, ak ki konai iman kole ki abunu ole imi, ak ki koyan kole ki iyookwo.

⁹ Asaae agobo icheek: ma saae agobo ng'wony, ago agobo icheek che ki igoono; amu cheguuk:

¹⁰ ak tuguuk tugul chechuuk ko cheguuk, ak cheguuk ko chechuuk: ak ki itoroora eng' icheek.

¹¹ Ak ma amite ng'wony, ago mi ng'wony chu, ak anyoone ole imi. Abba ne Tiliil, riip eng' kaineng'ung' icheek che ki igoono, si kobiit koek agenge, ko uu acheek.

¹² Ki ariip eng' kaineng'ung' icheek che ki igoono, ye kota kemi ak icheek: ki ariip icheek, ama pet agot agenge eng' icheek, kobatee weeriitap luseet; si kobiit kosulda siruutyet.

¹³ Ak kanyonjin nguno; ak amwae tuguuchu eng' ng'wony, si kobiit kosulda poiboiyennyu eng' icheek.

¹⁴ Ki agoochi ng'olyoondeng'ung'; ak kawech ng'wony icheek, amu ma po ng'wony, ko uu ye ma po ng'wony anee.

¹⁵ Masaae ale imut icheek eng' ng'wony, ago ale iriip icheek eng' ineendet ne ya.

¹⁶ Ma po ng'wony icheek, ko uu ye ma po ng'wony anee.

¹⁷ Itiliil icheek eng' imanit: imanit ng'olyoondeng'ung'.

¹⁸ Ko uu ye ki iyookwo anyo ng'wony, ko uu nooto kaayookte icheek koba ng'wony.

¹⁹ Ak atabaanige agobo icheek si kobiit kitabaan icheek eng' imanit.

²⁰ Amasaae agobo chu kityo, ago asaae agobo icheek che tuun iyana amu ng'olyoonnywa;

²¹ si kobiit koek icheek tugul agenge; ko uu ye imi inyee Abba, eng' anee, ak anee eng' inyee, si kobiit kotep icheek eng' acheek: si kobiit koyan ng'wony kole ki iyookwo.

²² Ak kaagoochi icheek toroornatet ne ki igoono; si kobiit koek agenge ko uu ye ki agenge acheek;

²³ anee eng' icheek, ak inyee eng' anee, si kobiit koek icheek che ititaatiin eng' agenge; si kobiit konai ng'wony kole ki iyookwo, ak ichame icheek, ko uu ye ichama.”

²⁴ Abba, amache ale kotebi kobooto eng' ole ami, icheek che ki igoono; si kobiit kogeer toroornatennyu ne ki igoono; amu ki ichama kotom kelumda ng'wony.

²⁵ “Ee Abba ne po imanda, ki ma kongenin ng'wony, ago ki angenin; ak ki konai chu kole, ki iyookwo.

²⁶ Ki ang'aang'ji icheek kaineng'ung', ak ta ang'aang'jini; si kobiit kotebee icheek chamyet ne ki ichamena, ak anee eng' icheek.”