JOHANA 16 - BUKUIT NE TILIIL Sireet ne Dutero Kanon

¹ Kaamwaiwok tuguuchu, si ma kinachak.

² Oonok eng' sinagogisyek. Nyoonei sait, ne ibwaati chii tugul ne parok kole, ayachini Kamuktaindet poisyet.

³ Ak yaei tuguuchu, amu ma nai Kwanda, anan anee.

⁴ Ago kaamwaiwok tuguuchu, si ye nyo sainnywa, omuuchi obwaat ole ki amwaiwok agobo chuuto. “Ago ki ma amwaiwok tuguuchu eng' taunet, amu ki ami kobootok.

⁵ Ago kawe nguno ole mi ineendet ne ki iyookwo; ama mi age eng' okweek ne teebena kole, ‘Iwendi ano?’

⁶ Amu kaamwaiwok tuguuchu, ko kanyi mugulelwekwok arageneet.

⁷ Ago amwaiwok ne po iman: myee eng' okweek ngawe: amu ngo mawe, ko manyonjinok Kagaigaindet; ago ngot awe, ayookwok ineendet.

⁸ Ak ye kagonyo ineendet, kogikyi ng'wony agobo tengekto, ak imanda, ak kirwooget:

⁹ agobo tengekto, amu ma iyana;

¹⁰ agobo imanda, amu awendi ole mi Kwanda, ama ogeero kogeny;

¹¹ agobo kirwooget, amu ki kirwookyi ne oo ne po ng'wonyuni.”

¹² “Ta atinye tuguuk che chaang' che kata ta amwaiwok, ago ma omuuchi omuite nguno.

¹³ Ago ye tuun kagonyo ineendet, Kabuuset ne Tiliil ne po imanit, kondoiywok agoi oit imanda tugul: amu ma mwaei ineegei; ago mwaei tuguuk tugul che kasei: ak kong'ang'wok tuguuk che pwoonei.

¹⁴ Itoroora: amu namei chechuuk, ak kong'ang'wok.

¹⁵ Chechuuk tuguuk tugul che tinyei Kwanda: nooto kaamwa, ale, namei chechuuk, ak koboorwok.”

Riirek kewalei koek poiboyet

¹⁶ “Tomo kitigin, si ma ogeera kogeny; ak mi kitigin kogeny, si ogeero.”

¹⁷ Kong'alaaljigei anyun alak eng' kasubikyik kole, “Nee ni kamwaiwech kole, ‘Mi kitigin, si ma ogeera; ak mi kitigin kogeny, si ogeera: ak, Amu awendi ole mi Kwanda?’ ”

¹⁸ Kole anyun, “Nee ni kamwa kole, ‘Mi kitigin?’ Ma kingen kiit ne mwaei.”

¹⁹ Ki nai Jeso anyun kole, machei koteebe pichooto ineendet, ak ki leenji, “Tos oteebegei okweegei agobo ng'olyoondoni kaamwa ale mi kitigin, si ma ogeera, ak mi kitigin kogeny, si ogeera?

²⁰ Amwaiwok, iman, iman, ale orirtosi ak oteitosi, ago paibai ng'wony: oaragendosi, ago kiweechi arageneng'wong' koek poiboiyet.

²¹ Arageni tamonet ye machei kosigiis, amu kait sainnyi; ago ye kagosich lakweet, koma kobwaati ng'wanindo kogeny, eng' poiboiyet amu kagesikyi chii ng'wony.

²² Nooto anyun otinye arageneet nguno: ago ta ageerok kogeny, ak poiboi mugulelwekwok, ama rebenok chii poiboiyeng'wong'.

²³ Ama oteebena kiy eng' peetuunooto. Amwaiwok, iman, iman, ale, Ngot osoom Kwanda kiy age tugul, kogoonok eng' kainennyu.

²⁴ Tom osoom kiy eng' kainennyu: osoom, si onyooru, si kobiit kosulda poiboiyeng'wong'.”

Kogimiti `Jeso kasubik

²⁵ “Kaamwaiwok tuguuchu eng' kalewenaik: ago nyoonei sait, ye ma ang'alaalwok eng' kalewenaik, ago aboorwok komyee agobo Kwanda.

²⁶ Osoome peetuunooto eng' kainennyu: amamwaiwok, ale ateebee Kwanda kiy agobo okweek;

²⁷ amu chamok ineendet Kwanda, amu ki ochama, ak ki oyan ole ki abunu Kwanda.

²⁸ Ki abunu Kwanda, anyoonji ng'wony: abagaaktoi ng'wony kogeny, ak agetitegei ole mi Kwanda.”

²⁹ Koleenji kasubikyik, “Keero, ing'alaali nguno komyee kotook, ama imwae kalewenet.”

³⁰ Kingen nguno keele ingen tuguuk tugul, ama nyoljin chii koteebenen kiy: kiyani eng' niito keele ki ibunu Kamuktaindet.

³¹ Kowolji Jeso koleenji, “Oyani nguno?

³² Ogeero, nyoonei sait, ee, kagonyo nguno, ye kiyestook, kwo chii tugul oldanyi, ak obagaakta aneege: ago ma mi aneege, amu mi Kwanda kobooto.

³³ Kaamwaiwok tuguuchu, si kobiit onyoorunena kaalyeet. Otinye nyalilda eng' ng'wony! Ago onyiganitu; amu kaaterter ng'wony.”