JOHANA 14 - BUKUIT NE TILIIL Sireet ne Dutero Kanon

Ooreet ne itei ole mi Kwanda

¹ Amogoochi mugulelwekwok koiimgei: oyani Kamuktaindet, oyana agane.

² Miitei kooriik che chaang' eng' kootap Abba; nda ki ma ko uu nooto, ta ki amwaiwok; awendi achobwok kooret.

³ Ak ye awe achobwok kooret, anyoone kogeny amutok; si ole ami omite ak okweek.

⁴ Ak ole awendi, ongen ooreet.

⁵ Koleenji Thomas, Kiptaiyat, ma kingen ole iwendi; kinaitoi ano anyun ooreet?

⁶ Koleenji Jeso, Aa ooreet, ak iman, ak saboondo: ma nyoonjin chii Kwanda, ama eng' anee.

⁷ Nda ki onaa, ta ki onai Abba agine: ak kaonai ineendet anyun kobooch nguno, ak kaogeer ineendet.

⁸ Koleenji Philipu, Kiptaiyat, iboorwech Kwanda, si koyamech.

⁹ Koleenji Jeso, Ki kitebi tugul ak okweek peetuusyek che chaang', ak tomo inaa, Philipu? Ineendet ne ki kogeero ko ki kogeer Kwanda: imwae eng' nee anyun, ile, Iboorwech Kwanda?

¹⁰ Tos meyani ile ami eng' Kwanda, ak Kwanda eng' anee? Ng'aleek che amwaiwok koma mwaei aneege: ago Kwanda ne menya ne yaei poisyonikyik.

¹¹ Iyana amu ami eng' Kwanda, ak Kwanda eng' anee: anan oyana agobo poisyonik icheeget.

¹² Amwaiwok, iman, iman, ale, Ineendet ne iyana, koyaei agine poisyonik che ayae; ak koyaei poisyonik che eech eng' chuuto; amu awendi ole mi Kwanda.

¹³ Ak kiit age tugul ne osoome eng' kainennyu, ayae, si kegonyit Kwanda eng' Weeriit.

¹⁴ Ngot osoom kiy age tugul eng' kainennyu, ayae kioto.

Kabuuset ne Tiliil

¹⁵ Ngot ochama, oriibe ng'atuutikyuk.

¹⁶ Ak asoom Kwanda, ak kogoonok kagaigaindet age, si kotebi kobootok koigeny,

¹⁷ nooto Kabuuset ne Tiliil ne po imanit, ne ma imuuchi ng'wony kotaach; amu ma keerei ineendet, ama naei ineendet: ago ongen ineendet: amu tebyei kobootok, ak tuun tebyei eng' oriing'wong'.

¹⁸ Ma pagaaktook ko uu kibananook: anyonjinok.

¹⁹ Ta komi kitigin, si ma kogeero ng'wony; ago ogeera: amu asabe, osaptosi ak okweek.

²⁰ Eng' peetuunooto onai ole ami eng' Abba, ak okweek eng' anee, ak anee eng' okweek.

²¹ Ineendet ne tinyei ng'atuutikyuk, ak koriibei, ko nooto ne chama: ak ineendet ne chama kochamaat eng' Abba, ak achame ineendet ak ang'aang'jigei ineendet.

²² Koleenji `Judas (ma Iskaryot), Kiptaiyat, kalya si ing'ang'weige, ama ing'aang'jige ng'wony?

²³ Kowolji Jeso koleenji, “Ngo chama chii, koriip ng'olyoondennyu: ak kocham Abba ineendet ak kebwonji ineendet, ak kemeny kobooto ineendet.

²⁴ Ineendet ne ma chama ko ma riibei ng'aleekyuk: ak ma nenyu ng'olyoot ne ogase, ago po Kwanda ne ki iyookwo.

²⁵ Kaamwaiwok tuguuchu, kota ami kobootok.

²⁶ Ago ineetook tuguuk tugul Kagaigaindet, Kabuuset ne Tiliil, ne iyoogu Kwanda eng' kainennyu, ak kobwaatwok tugul che kaamwaiwok.

²⁷ Abagakwok kaalyeet; agoonok kalyennyu: ma koonok ko uu ye koonu ng'wony. Among' koiimgei mugulelwekwok, anan koiyweis.

²⁸ Kaogas ko uu ye kaamwaiwok ale, Awendi, ak anyoone ole omi. Ngot ochama, ko oboiboi, amu awendi ole mi Kwanda: amu oo Kwanda eng' anee.

²⁹ Ak kaamwaiwok nguno kotom koyaak, si ye kagoyaak, oyan.

³⁰ Ma ng'alaalwok miising', amu nyoonei ne oo ne po ng'wony: ama tinyei kiy eng' anee;

³¹ ago si konai ng'wony kole achame Kwanda, ak ko uu ye ki koono Kwanda ng'atuutyet, ayae ko uu nooto. Ong'eetyee, keebe.”