JOHANA 1 - BUKUIT NE TILIIL Sireet ne Dutero Kanon

Ng'aleek che indou

¹ Eng' taunet ko ki mi Ng'olyoot, ak ki mi Ng'olyoot ak Kamuktaindet, ak Ng'olyoot ko ki Kamuktaindet.

² Ki mi ineendet ak Kamuktaindet eng' taunet.

³ Ki kiyai tuguuk tugul eng' ineendet; ak ma mi kiy agot agenge ne ki piit ama eng' ineendet. Kiy ne ki yaak

⁴ eng' ineendet ko ki saboondo, ak saboonooto ko ki lapkeiyetap piik,

⁵ ak iluu lapkeiyet eng' mesundeito; ak ma iterteer `mesundeito lapkeiyonooto.

⁶ Ki nyo chii ne ki iyook Kamuktaindet, ne ki kiguure Johana.

⁷ Ki nyo chiichooto koek paoryat, si kobaoryanji lapkeiyet, si kobiit koyan piik tugul amu ineendet.

⁸ Ki ma ko lapkeiyonooto ineendet, ago ki nyo si kobaoryanji lapkeiyonooto.

⁹ Ki mi lapkeiyet ne po iman, ne nyoonei ng'wony, ne iluuchin chii tugul.

¹⁰ Ki mi ng'wony ineendet, ak ki kiyai ng'wony eng' ineendet, ak ki ma nai `ng'wony ineendet.

¹¹ Ki nyoonji chechiik, ak ki ma taach ineendet `piikyik.

¹² Ago tugul che kitaach ineendet, ko ki igoochi kamuget koek lagogap Kamuktaindet, icheek che iyani kainennyi,

¹³ che ki kisich ama eng' korotiik, anan eng' mageetap poorto, anan eng' mageetap chii, ago eng' Kamuktaindet.

¹⁴ Ak ki ek Ng'olyoot poorto ak komeny kwenunnyo (ak ki kigeer toroornatennyi, toroornatet ne uu ne po ne ki kisich ineegei kobunu Kwanda), ko nyiitaat myeeindo ak imanit.

¹⁵ Ki paoryanji ineendet `Johana, koititen kole, “Ineendet ni ne ki amwaitoi ale, ‘Ineendet ne isubwo koegu ne po tai eng' anee, amu ki po tai ineendet eng' anee.’ ”

¹⁶ Amu ko ki kitaach acheek tugul che po nyiennyi, ak myeeindo eng' myeeindo.

¹⁷ Amu ki kigoon ng'atuutyet eng' Musa; konyo myeeindo ak imanit eng' Jeso Kristo.

¹⁸ Ma mi chii ne ki keer Kamuktaindet ole kigoi; kigong'ang'wech Kamuktaindet Weeriit ne ki kisich ineegei, ne mi tegetap Kwanda.

Paornateetap Johana Kabatisanindet

¹⁹ Ak ni ko paornateetap Johana, ye kingo yook `Yahudik Tisiik ak Lawiik eng' Jerusalem koba koteebe kole, “Ii ng'oo inyee?”

²⁰ Ak ki ng'aany ineendet, ama tiiyo; ki ng'aany kole, “Ma aa Kristo anee.”

²¹ Ak kiteebe ineendet kole, “Ara ii ng'oo anyun? Ii Elijah?” Ak ki le, “Ma aa ineendet.” “Ii maotyondonooto?” Ak ki wol kole, “Achicha.”

²² Ki leenji anyun ineendet, “Ii ng'oo inyee? Si kobiit kewolji che koiyookwech. Imwae nee agobo inyegei?”

²³ Ki le, “Aa kutitap chii ne ititeni eng' surkwen, ‘Olitit ooreetap Kiptaiyat,’ ” ko uu ye ki mwa maotyot Isaiah.

²⁴ Ak icheeget che ki kiyok ko ki po Pharisaik.

²⁵ Ak kiteebe ineendet, koleenji, “Kalya anyun si ibatisanisyei, ngo ma ii Kristo, anan Elijah, anan maotyondonooto?”

²⁶ Kowolji Johana pichooto koleenji, “Abatisanisye peek: ago tononi eng' kwenung'wong' age ne mongen,

²⁷ ineendet ne isubwo, ne ma nyoljino atyach anoogap kweonikyik.”

²⁸ Kiyaogis tuguuchuuto eng' Bethania Jordan komosin, ole ki ibatisanisye Johana.

Komwaitoi Johana kole Jeso ko Kristo

²⁹ Eng' peetuut ne po aeng' kogeer `Johana Jeso konyonjin, ak kole, “Ogeero, Aarwet ne po Kamuktaindet, ne ibei tengektap ng'wony!

³⁰ Ineendet ni ne ki amwa ale, ‘Isubwo chiito ne egu ne tai eng' anee amu ki po tai eng' anee.’

³¹ Ak ki ma angen anee ineendet; ago si kobiit kibarta ineendet eng' Israel, ki anyoo anyun amu nooto abatisane peek.”

³² Ak kibaoryan Johana, kole, “Ki ageer Kabuuset ne Tiliil kochoorugei eng' kipsengwet ko uu cheptuget; ak kotebee ineendet.

³³ Ak ki ma angen ineendet: ago ineendet ne ki iyookwo abatisane peek, ko ineendet ne kimwaiwo koleenjo, ‘Chiichooto igeere kochorchingei Kabuuset ne Tiliil, ak koteebee ineendet, ko nooto ne ibatisane Kabuuset ne Tiliil.’

³⁴ Ak ki ageer, ak ki abaoryan ale niito ko Weeriitap Kamuktaindet.”

Kasubik che tai che po Jeso

³⁵ Kogeny eng' peetuut ne ki isubu peetuunooto, ko kitononi Johana, ak aeng' che po kasubikyik;

³⁶ ak ki keerot `ineendet Jeso kowendoti, ak kole, “Ogeero, Aarwet ne po Kamuktaindet!”

³⁷ Ak ki kas chooto aeng' che po kasubikyik kong'alaali ineendet, ak koosup Jeso.

³⁸ Ak kiwelelgei Jeso, ak kogeer icheek kosubu, ak koleenji, “Ocheeng'e nee?” Ak ki leenji ineendet, “Rabbi (ye kiweech keele, Kaneetindet), imenye ano?”

³⁹ Koleenji icheek, “Obwa si ogeer.” Ki pwa anyun kogeer ole menyei, ak ki tebi kobooto ineendet peetuunooto; ki olo po sait taman.

⁴⁰ Ki Andrea, ne tupcho ak Simion Petero, age eng' chooto aeng' che kigasei kong'alaali Johana, ak ki isup ineendet.

⁴¹ Ki sip konyoor Simion ne tupcho, ak koleenji, “Kagenyooru Mesia” (ye kiweech, ko Kristo).

⁴² Ki imutyi `ineendet Jeso. Ki keer `Jeso ineendet ak kole, “Ii Simion weeriitap Johana. Ta keguurenen Kepa” (ye kiweech, ko Petero).

Keguurei Philipu ak Nathanael

⁴³ Eng' peetuut ne ki isubi ko kimach anyun Jeso kwo Galilaya. Ki nyoor `ineendet Philipu ak koleenji, “Isubwo.”

⁴⁴ Ki punu Philliph Bethsaida, nganaseet ne po Andrea ak Petero.

⁴⁵ Ki nyoor `Philipu Nathanael ak koleenji, “Kagenyooru ineendet ne ki sir Musa eng' Ng'atuutyet ak kosir maotik, nooto Jeso ne po Nazareth weeriitap Joseph.”

⁴⁶ Ak ki leenji `Nathanael ineendet, “Tos imuuchi kobun Nazareth kiy age tugul ne myee?” Koleenji `Philipu ineendet, “Nyoo si igeer.”

⁴⁷ Kingo keer `Jeso Nathanael konyonei ole mi ineendet, ak komwa agobo ineendet kole, “Ogeero, Yahudyot iman, ne ma tinyei ng'aalseet!”

⁴⁸ Koleenji `Nathanael ineendet, “Kenaena nee?” Kowolji Jeso koleenji, “Kageerin, ye kemi mogoywet keel, kotom koguurin Philipu.”

⁴⁹ Kowolji Nathanael kole, “Rabbi, ii Weeriitap Kamuktaindet; ii Laitoryatap Israel!”

⁵⁰ Kowolji Jeso koleenji, “Iyani amu kamwaun ale, kaagerin ye kemi mogoywet keel? Tatun igeere tuguuk che eecheen che siirei chu.”

⁵¹ Ak ki leenji, “Amwaiwok, iman, iman, ale, tatun ogeere kipsengwet koyatoksei, ak kotogostoi malaikaisyek che po Kamuktaindet ak kochoorchigei Weeriitap chii.”