JEREMIA 7 - BUKUIT NE TILIIL Sireet ne Dutero Kanon

Amdaetap Jeremiah eng' Hekaluut

¹ Ki nyoonji Jeremiah `ng'olyoot ne ki punu Kamuktaindet ne Toroor koleenji,

² tonone kurgeetap kootap Kamuktaindet ne Toroor, ak imwaite eng' yooto ng'olyoondoni, ile, ogas ng'olyootap Kamuktaindet ne Toroor, okweek tugul che oo po Judah, che omandoe ormariichochu obendi olasu Kamuktaindet ne Toroor.

³ Mwaei Kamuktaindet ne Toroor ne po lugoosyek, Kamuktaindetap Israel kole: Olitit ortinwekwok ak poisyonikwok, si agoonok omeny yuto.

⁴ Amomang'u ng'aleechu po lembech ak ole: “Hekaluutap Kamuktaindet ne Toroor, Hekaluutap Kamuktaindet ne Toroor, Hekaluutap Kamuktaindet ne Toroor chuuto!”

⁵ Amu ngot olitit komyee ortinwekwok ak poisyonikwok, ak ngot orwooksechi komyee chii ak chiitap kokwennyi,

⁶ ngot ko mosastoe toondet, ak ne ma tinyei sigiik, ak mosoget, amotumde korotiik che ma tinyei tengek eng' olito, anan osubote kamuktaik che teer ogoochinegei nyalilda,

⁷ agoonok anyun omeny olito, emet ne ki agoochi kwanisyekwok kobooch keny agoi koigeny.

⁸ Ago ogeero, omang'u okweek ng'aleegap lembech che ma imuuchi kogoonok kelunet age tugul.

⁹ Tos nyolu ochoorsei, orumisyei, oyaei ibeetapkei, oyosye eng' lembech, obeelji nyamdutik Baal ak osubote kamuktaik che teer che mongen,

¹⁰ yeityo obwa otonone tainnyu eng' koi, ne kimwaitoe kainennyu ak ole, “Kagesarwech,” si kobiit oyai tuguuchuuto tugul kiwechei?

¹¹ Tos kaek kooi kemwaitoe kainennyu kebeneetap rebiik eng' taing'wong'? Onai ole anee, aneendet ne kaageer, mwaei Kamuktaindet ne Toroor.

¹² Oba nguno oldanyu ne ki mi Shiloh, ole ki ande kainennyu eng' tai, si ogeer kiit ne ki ayachi amu tengekwogigap piikyuk Israel.

¹³ Ara anyun, amu ki oyai poisyonichuuto tugul, mwaei Kamuktaindet ne Toroor, ak ki ang'alaalwok, ang'eete karon miising' ak ang'alaali, ago ma ogas, ak ki aguurok, ago ma owolu,

¹⁴ ayachini anyun koyooto, nooto kimwaitoe kainennyu, ne omang'u, kobooto komosta ne ki agoonok ak kwanisyekwok, ko uu ye ki ayachi Shiloh.

¹⁵ Atimdak eng' tainnyu, ko uu ye ki atimde tupchosyekwok tugul, iyoteet komugul ne po Ephraim.

Ngelelnatetap piik

¹⁶ Ara anyun inyee Jeremiah, ko mat isaa agobo pichu, agot iriirchi ko matiriirchi, mat isaachi anan isaa. Amu ma kasun.

¹⁷ Tos megeere tuguuk che yaei eng' nganasoogap Judah ak eng' ortinwegap Jerusalem?

¹⁸ Iyumi lagok kweenik, ilali maat kwanisyek, kokwonykwonyi magatiinik kwonyiik, si kobeelji osotyotap laitoryat ne po kipsengwet ak koroong'ji kagoochinoik che kieei, kamuktaik, si kobiit kotacha anereech.

¹⁹ Tos tachei ng'oo pichooto konereech? Tos anee? Mwaei Kamuktaindet ne Toroor. Tos matachegei icheegei, si kogoochigei kalilanet eng' togoochikwak?

²⁰ Mwaei anyun Kiptaiyat Kamuktaindet ne Toroor kole; Ogeero, kiroong'jin olito nereegekyuk ak nereegekyuk che ng'woneen, kiroong'jin piik, tuuga, keetiigap timiin ak eng' logoegap mbar; ak laldos, ama kimisi.

²¹ Mwaei Kamuktaindet ne Toroor ne po lugoosyek, Kamuktaindetap Israel, kole, otesyi kagoochinoikwok che kibeelei tiseiywek ak oam panyeek.

²² Amu ki ma ang'alaalji kwanisyekwok anan ang'at icheek eng' peetuut ne ki amutu komang'une emetap Misiri, agobo kagoochinoik che kibeelei ak tiseiywek.

²³ Ago ki ang'at icheek agobo ng'olyoondoni aleenji, ogas kutinnyu, si aek Kamuktaindeng'wong', ak oegu piikyuk. Obendate ooreet tugul ne ang'atook, si kobiit komyeeit eng' okweek.

²⁴ Ago ma kas, ama ep iit, ago kibendatee kirwoogutikwak ak uuindap mugulelwekwak che yaacheen. Kituitui koba let, ma pa tai.

²⁵ Kobooch peetuut ne ki mong' kwanisyekwok eng' emetap Misiri agoi rani, ko ki ayookwok otwogikyuk tugul che maotik ang'eete kotugul karon ak ayoogu icheek.

²⁶ Ago ma kasa, ama ep iit, ago ki iuit kaatinnywa. Ki yai ne ya kosiir kwanisyekwak.

²⁷ Ara anyun mwachi icheek ng'aleechuuto tugul. Ago ma kasin. Iguure icheek kogeny, ago mawolun.

²⁸ Ileenjini icheek, niito pororyet ne ma epchi iit kutitap Kamuktaindet ne Toroor Kamuktaindennywa, ama taach atep ne myee. Ki kobet imanda ak kigeisto eng' kutusweekwak.

Tengekwogik eng' atebweetap Himon

²⁹ Ee Jerusalem, icheru suumeeguk anyun, ak iwiirte, rirate eng' tuloonook che churyotin, amu kaesyok ak ametook anee Kamuktaindet ne Toroor, okweek ibini ko kogoono nereegek.

³⁰ Amu ki koyai lagogap Judah kiit ne ya eng' tainnyu, mwaei Kamuktaindet ne Toroor. Ki konde tuguukwak che kiwechei koot ne kimwaitoe kainennyu ak komurwon.

³¹ Kigoteech komoswek che torooreen che po Topet, ne mi atebweetap weeriitap Hinom, si kobeel weeriikwak ak tiibiikwak eng' maat; ne ki ma ang'at, ne ma kuura met.

³² Keero, pwoonei anyun peetuusyek, mwaei Kamuktaindet ne Toroor, che ma keguure yooto Topet, anan keguure weeriitap Hinom, ago kiguure Atebweetap Parisyet. Amu tuun tubisyei icheek eng' Topet, amu ma komi ole ketupchin.

³³ Ak koek muuswegap pichu amitwogigap toriitik che po parak, ak che po tyong'igap ng'wony. Ama piitu chii ne iyestoi.

³⁴ Agoochini anyun kosiis tuugeetap poiboiyet ak ne po kagasetapkei, ne po sandet ak ne po murereet, eng' nganasoogap Judah ak ortinwegap Jerusalem, amu egu emet karaatya.