JEREMIA 48 - BUKUIT NE TILIIL Sireet ne Dutero Kanon

Maonateet agobo Moab

¹ Ng'aleegap Moab: Mwaei Kamuktaindet ne Toroor ne po lugoosyek, Kamuktaindetap Israel, kole: Pwo eng' Nebo! Amu kagoek karaatya; kagiteweer Kiriataim, kageluul: kagiteweer Miskap, kagebut.

² Ma komi kalasunetap Moab; Ki kochop yaityet eng' Hesbon agobo emonooto, ne mwaei koleen, Nyoo kigeesu si ma koegu pororyet kogeny. Agot inyee, ee Madmen, kigoonin isiis; onin rotwetap chok.

³ Kutitap riirek ne punu Horonaim, luuleet ak ng'emisyet ne oo!

⁴ Kageng'em Moab; kagoriiryo lagokyik kot kegas.

⁵ Amu togostoi ole kitogostoe ne po Luhit koriiryoti kotugul; amu ki kogas pichiindap riiregap ng'emisyet eng' ole kichoortoegei ne po Horonaim.

⁶ Omwei, osaru saboonwekwok, ak oige sondiit eng' surkwen.

⁷ Amu-i, kiluulin aginye, amu kaimang'u poisyoniguk ak konoraiguk: ak keluul Kemos, kobooto tisiikyik ak pounikyik.

⁸ Ak nyoonjin luulindet nganaseet age tugul, ama mi nganaseet ne chilili; lusei kogeny atebweet, ak keng'emei warenget; ko uu ye kagomwa Kamuktaindet ne Toroor.

⁹ Igoochi Moab kebebaik, si kobiit kotiriren komwei: ak koek nganasookyik karatwek, ne ma mi chii ne menyei.

¹⁰ Chuboot ineendet ne machuuljingei poisyetap Kamuktaindet ne Toroor, ak chuboot ineendet ne etee rotwennyi po chok korotiik.

¹¹ Kigotebee Moab kaalyeet kobooch ming'inatennyi, ki kotepto kimnateennyi ko uu divaik che mi ak misigiikyik, che tomo kerong' eng' tereet age koba tereet age: ak tomo keluul: ta kotinyei anyun amu nooto anyinyindanyi, ak tomo kowalak ng'uunennyi.

¹² Ogeer anyuno, pwoonei peetuusyek, mwaei Kamuktaindet ne Toroor, che ayookyini ineendet piik che rong'u, ak koranda ineendet; ak korong' kogeskei eng' tereenikyik, ak kotui sotonikwak.

¹³ Ak kolilaan Moab amu Kemos, ko uu ye ki ililan kootap Israel agobo Bethel, ne ki imang'u.

¹⁴ Omuktoi ano omwa ole, ki murenik che nyigoonen, ak ko ki murenik che kiimeen eng' lugeet?

¹⁵ Kigong'emak Moab, ki kotogosta icheek nganasookyik, kigoba parisyet murenikyik che ki kilewen, mwaei Laitoryat, ne kainennyi ko Kamuktaindet ne Toroor ne po lugoosyek.

¹⁶ Kariikyi Moab nyalildanywa, ak chogu usiisyennyi.

¹⁷ Oriirchi ineendet okweek tugul che omi ole neegitee ineendet, ak okweek tugul che ongen kainennyi; omwa ole, Katepto ano si koil kirokto ne kiim, kirokto ne karaaran!

¹⁸ Ee inyee chepto ne itebee Dibon, chooruge eng' toroornateng'ung', ak itebi eng' melelda; amu kagopookyin ng'emindetap Moab, kagong'em irimoiguk.

¹⁹ Ee inyee ne imenye Aroer, tonon eng' ooreet taban, ak itoben: teebee ne mweei, ak chepto ne chilili; ileenji, kageyai nee?

²⁰ Kagiteweer Moab; amu kagebut: owaach ak oriirye; omwaite eng' Arnon, ole, Kageng'em Moab.

²¹ Ak kagonyonji kirwooget warenget; kanyonji Holon, Jasa, ak Mepaat;

²² ak Dibon, Nebo, ak Beth-diblataim;

²³ ak Kiriataim, Beth-gamul, ak Beth-meon;

²⁴ ak Keryot, Bosra, ak nganasook tugul che po emetap Moab, che looen ak che neegit.

²⁵ Kageisto kuinetap Moab, ak kagoil eunnyi, mwaei Kamuktaindet ne Toroor.

²⁶ Ogoochi ineendet kobogit; amu ki kotoroorgei kogirinda Kamuktaindet ne Toroor; ak mildoegei Moab kang'undaekyik, ak kerorechin.

²⁷ Tos ma ek Israel eng' inyee ne kirorechin? Tos ki kinyoor komi ak chooriik? Amu kotugul ye ing'alaali agobo ineendet, ilelechi metit.

²⁸ Ee okweek che omenye kebenonik; ak oige cheptuget ne teechei keswennyi eng' tabanwegap kurgeetap kebeneet.

²⁹ Kigegas menoteetap Moab, keele, menot miising'; kaetetapkei, ak menatennyi, ak kachaunennyi pogei, ak losennyi pogei.

³⁰ Angen nereegekyik, mwaei Kamuktaindet ne Toroor, ale puch; ma yai kiy kachaunaikyik pogei.

³¹ Awaache anyun agobo Moab; ee, ariirchini miising' Moab tugul: amu iteeitos icheek agobo piigap Kir-heres.

³² Ariirchinin eng' riirek che siirei che po Jaser, ee keetitap sabibuk ne po Sibma: kagolandae nyanjet temeniguk, kiit nyanjetap Jaser: kagonam luuloindet logoeguk che po kemei, ak ole kitue sabibuk.

³³ Ak kageisto kagasetapkei ak poiboiyet, eng' mbareet ne rurei kot ak eng' emetap Moab; ak kaagoochi kogeskei divaik eng' ole kituisye: ma mi ne tyechei eng' waagaatap kagasetapkei; ma egu waagandanooto waagaatap kagasetapkei.

³⁴ Kagotwek icheek kobooch riiregap Hesbon agoi Eleale, kot koit Jahas, kobooch Zoar agoi Horonaim, agoi Eglat-Selesiya: amu teng'dos peegap Nimrim.

³⁵ Ageesu kogeny eng' Moab, mwaei Kamuktaindet ne Toroor, ineendet ne igoitoi koroseek eng' ole toroor, ak ineendet ne peeljin nyamdutik kanamonikyik.

³⁶ Cheei anyun muguleldanyu agobo Moab ko uu ndurerusyek, ak kocheei muguleldanyu ko uu ndurerusyek agobo piigap Kir-heres: kagobetyo anyun chaang'indap tuguuk che kiga konyoor.

³⁷ Amu churat metit age tugul, ak kigetil tamnet age tugul: mi eunek tugul perutik che ki kitilei, ak kogermenegei kuniok.

³⁸ Mi kateiyasyek kooriik tugul parak che po Moab ak eng' komosta age tugul eng' ortinwekyik: amu ki atui Moab ko uu tereet ne ma kiboiboitune, mwaei Kamuktaindet ne Toroor.

³⁹ Kitepto ano si koyie! Iteitoi ano icheek! Katepto ano si kotukta patai Moab eng' kalilanet! Egu anyun Moab ne kirorechin ak koek ne kwong'ee icheek tugul che mi tabanwekyik.

⁴⁰ Amu mwaei Kamuktaindet ne Toroor kole, ogeero, tirireni ko uu kipsiichit, ak kouito kebebaikyik kotokyi Moab.

⁴¹ Kageluul Keryot, ak kageche irimoikyik, ak koigei mugulelwegap piik che nyigoonen che po Moab, eng' peetuunooto, muguleldap kwondo ne tinyei ng'wanindo ye machei kosigiis.

⁴² Ak keng'em Moab si ma koegu pororyet, amu ki kotoroorgei kogirinda Kamuktaindet ne Toroor.

⁴³ Kabwonjin kaiyweisyet, ak keriinget, ak mesteet, ee inyee ne imenye Moab, mwaei Kamuktaindet ne Toroor.

⁴⁴ Ibutyin keriinget, ne mwee kaiyweisyet; ak konam mesteet ne togosune keriinget: ak aipchini ineendet, nooto ko Moab, kenyiit ne aityini ineendet pireet, mwaei Kamuktaindet ne Toroor.

⁴⁵ Tonondos che mweei ama tinyei kimnateet eng' urwetap Hesbon: amu kamang'une maat Hesbon, ak kamang'une liplibenetap maat, Sihon, ak kagobeel luuitap Moab, ak metowekwak parak che po icheek che poldos.

⁴⁶ Pwo! Inyee, ee Moab! Kagogeskei piigap Kemos: amu kageluul weeriiguk, ak kageluul tiibiiguk.

⁴⁷ Ago aweechi kogeny luulenigap Moab eng' peetuusyek che po let, mwaei Kamuktaindet ne Toroor. Tee nooto anyun kirwoogetap Moab.