JEREMIA 47 - BUKUIT NE TILIIL Sireet ne Dutero Kanon

Maonateet agobo Philistia

¹ Ki nyoonji `ng'olyootap Kamuktaindet ne Toroor maotyot Jeremiah agobo Philistik, kotomo kobar Pharaoh Gaza.

² Mwaei Kamuktaindet ne Toroor kole: Ogeero, Tesoksei peek kobunu murot kaataam kot koek kereruut aineet ne chwaldoi, ak kochwalda emet ak tugul che mi olooto, nganaseet kobooto che menyei olooto: ak koriiryo murenik, ak kowaakyo piik tugul che menyei emet.

³ Ye kas kirgirenetap keelyegap paraisisyegap piikyik che kiimeen, eng' rwaetap kariisyekyik che po lugeet, eng' cheetap keelyegap kariisyekyik, magusyin kong' kwanisyek lagokwak amu nyalulnatetap eunek;

⁴ amu peetuut ne nyoonei koluulei Philistik tugul, si koisto eng' Tyro ak Sidon toretindet age tugul ne ng'etu: amu luulei Kamuktaindet ne Toroor Philistik, che ki ng'et che po ngeguutap Kaptor.

⁵ Kanyonji Gaza poosto; kagiges Askelon, che ki ng'et che po atebweetap Mediterenian: iriire ak itei kot kotyanit?

⁶ Ee, inyee rotwetap chok ne po Kamuktaindet ne Toroor, tyanitu si tuun isiis? Weekyigei chogeng'ung'; imuuny, ak isiis.

⁷ Imuktoi ano isiis, igeere ile ki kong'atin Kamuktaindet ne Toroor ibar Askelon, ak ngeguutap nyanjet? Ki kong'at ko uu nooto.