JEREMIA 46 - BUKUIT NE TILIIL Sireet ne Dutero Kanon

Maonateet agobo Misiri

¹ Ki nyoonji maotyot Jeremiah ng'olyootap Kamuktaindet ne Toroor agobo pororyosyek.

² Ng'aleegap Misiri: agobo lugeetap Pharaoh-neko laitoryatap Misiri, ne ki mi ole neegitee aineet Yufrets eng' Karkemish, ne ki par Nebukadresar laitoryatap Babilon eng' kenyiitap ang'wan ne po Jehoiakim weeriitap Josiah, laitoryatap Judah.

³ Ochop long'onik che mengech ak che eecheen ak ooriikyi lugeet.

⁴ Ochop paraisisyek ak olaany, okweek che olaanye paraisisyek, ak otononse ko kaolaach chepkuloikwak che po lugeet; osit ng'otwek, ak olaach ngoroigap lugeet.

⁵ Amu nee si ageere ko uu nooto? Aragendos ak koweechegei let; kagetuatui piikwak che kiimeen, ak kagomwei kochaakta, ama kusegong': mi kamuiset komosta age tugul, mwaei Kamuktaindet ne Toroor.

⁶ Amat komwei ne chepchep, anan kochilil chiito ne nyigan; ki konachkei ak kobutyo eng' murot kaataam ne po ole neegitee aineetap Yufrets.

⁷ Ng'oo ni ng'eetei ko uu aineet, ne wasegei peekyik ko uu ainoosyek?

⁸ Ng'eetei Misiri ko uu aineet, ak wasegei peekyik ko uu ainoosyek: ak leen, Ang'eete ak atuch emet; ang'eme nganaseet ak piik che menyei olooto.

⁹ Otogoste, okweek, paraisisyek; ak ochakte okweek, kariigap lugeet; ak ingoba piik che nyigoonen: Kush ak Put, che tinyei long'onik; ak Ludik, che tinyei kwangok ak kong'iei.

¹⁰ Amu po peetuunooto Kiptaiyat Kamuktaindet ne Toroor ne po lugoosyek, peetuutap yaaktaetap mugetuut, si koyaaktoochi ineendet mugetuut eng' puunikyik: ak koamis rotwetap chok ak kobiyo, ak koeei korotiikwak kobiyo: amu tinyei Kiptaiyat, Kamuktaindet ne Toroor ne po lugoosyek, tiseiywot eng' emetap murot kaataam ole neegitee aineetap Yufrets.

¹¹ Togoste Gilead ak iip mwanik che kinyaise, ee pergeiyandani, cheptap Misiri: iboisyee kerichek che chaang' puch; mesabe.

¹² Ki kogas pororyosyek agobo teweernateng'ung', ak kigonyi emoni riireguk: amu kagonach chiito ne nyigan ne nyigan, kagobutyo tuwai.

¹³ Ni ng'olyoot ne ki mwachi `Kamuktaindet ne Toroor maotyot Jeremiah, kole nyoonei Nebukadresar laitoryatap Babilon ak kobar emetap Misiri.

¹⁴ Omwaite eng' Misiri, ak obarte eng' Migdol, ak obarte eng' Nop ak eng' Tapanes: oleenji, Otononse, ochopkei; amu kagoamis rotwetap chok eng' tabanweguk.

¹⁵ Amu nee si kibukto cheguuk che kiimeen? Ma tononso, amu ki oon Kamuktaindet ne Toroor.

¹⁶ Ki riich che chaang', ee, ki ibutyi age paragutap age: ak ki le, Ong'eetyee, ongebe kogeny oldap piikyok, agoi emet ne ki kisikyinech kemwee rotwetap chok ne usiisyei.

¹⁷ Kiwookyo eng' olooto kole polateet kityo Pharaoh laitoryatap Misiri; ki kobagakta kosiirto peetuut ne kiga kichop.

¹⁸ Mwaei Laitoryat ne kainennyi ko Kamuktaindet ne Toroor ne po lugoosyek, kole, Ko uu ye asabe, nyoonei iman ineendet ko uu Tabor eng' tuloonook, ak ko uu Karmel eng' ole neegitee nyanjet.

¹⁹ Ee inyee chepto ne imenye Misiri, monorsechigei si iwe keluulin: amu egu Nop karaatya, ak kebeel, ama mi chii ne menyei.

²⁰ Rooryat ne karaaran miising' Misiri; ago kagonyo ng'emisyet ne punu murot kaataam, kagonyo.

²¹ Uu kogeny piikyik che kesirei che mi kwenunnyi moek che neryootiin; amu kagoweigei let ak icheek, kagomwei tugul, ma tononso: amu kanyonji icheek peetuutap nyalildanywa, peetuut ne kibirei.

²² Wendi kutinnyi ko uu ereneet; amu pendi ak lugeet, ak kobookyine ineendet aonok, ko uu piik che ebei keetiik.

²³ Iluuli osnennyi, mwaei Kamuktaindet ne Toroor, agot ngo ma kimuuchi kisyach; amu chaang' kosiir chereng'enyinik, ama iitoksei.

²⁴ Kiteweeri cheptap Misiri; kindoi eutap piigap murot kaataam.

²⁵ Mwaei Kamuktaindet ne Toroor ne po lugoosyek, Kamuktaindetap Israel, kole: Ogeero, abire Ammon ne po No, ak Pharaoh, ak Misiri, kobooto kamuktaikyik, ak laitorinikyik; chooto ko Pharaoh ak icheeget che imang'u ineendet:

²⁶ ak andoi icheek eutap icheeget che cheeng'ei saboonwekwak, ak eutap Nebukadresar laitoryatap Babilon, ak eutap otwogikyik; ye ibata kemeny ko uu peetuusyek che po keny, mwaei Kamuktaindet ne Toroor.

²⁷ Ago meiywei, ee Jakobo otwogindennyu, anan iaragen, ee Israel; amu, keero, asaruun eng' ole loo, ak asaru iyoteng'ung' eng' emet ne ki kiluulji; ak koweek Jakobo, ak komuuny ak kotebee kaalyeet, ama mi chii ne imui.

²⁸ Meiywei, ee Jakobo otwogindennyu, mwaei Kamuktaindet ne Toroor; amu ami kobooten: amu ageesu pororyosyek tugul che kigaonjin, ago magesun; ago atigoonin eng' kirwooget, amabagaaktoin ama kibirin.