JEREMIA 44 - BUKUIT NE TILIIL Sireet ne Dutero Kanon

Kaimutyet agobo otetap kanamonik

¹ Ki nyoonji ng'olyoot Jeremiah agobo Yahudik tugul che ki menyei emetap Misiri, che ki menyei Migdok, ak Tapanes, ak Nop, ak emetap Patros, koleenji,

² Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ki ogeer yaityet tugul ne ki apchi Jerusalem, ak nganasook tugul che po Judah; ak ogeero, karatwek rani nganasochooto, ama mi chii ne menyei olooto;

³ amu yaityennywa ne ki koyai kotacha anereech, amu ki pa kobeel nyamdutik, koot kamuktaik che ki ma kongen, icheeget, anan okweek, anan kwanisyekwok.

⁴ Ago ki ayookwok otwogikyuk tugul, che maotik, ang'eete karon miising' ak ayoogu, aleenjinok, “Amat oyai kiito samis ne aweche.”

⁵ Ago ma kas, anan koep iit si kobiit koweek kometo yaityennywa, si mata kobeelji nyamdutik kamuktaik che teer.

⁶ Kirong'kei anyun nereegekyuk che ng'woneen, ak kong'waanityi nganasoogap Judah ak eng' ortinwek che po Jerusalem; ak ki koek karatwek ak kigoguber ko uu kiit ne uu peetuusyechu.

⁷ Mwaei anyun Kamuktaindet ne po Toroornatet ne po lugoosyek, Kamuktaindetap Israel, kole: Amu nee si oyachi saboonwekwok yaityoni oo, si kobiit kigeesunenok muren ak kwony, lakwa ak ne reryei, komong' eng' Judah, si ma ng'etwok agot agenge;

⁸ amu otagena poisyonigap eunekwok, obeeljini nyamdutik kamuktaik eng' emetap Misiri, ole ki obe otebee; si kobiit kigeswok, ak oegu che kisasei ak che kichotei eng' pororyosyek tugul che po ng'wony?

⁹ Tos ki outye yaitwogigap kwanisyekwok, ak yaitwogigap laitorinigap Judah, ak yaitwogigap osotikwak, ak yaitwogikwok, ak yaitwogigap osotikwok, che ki yai eng' emetap Judah, ak eng' ortinwegap Jerusalem?

¹⁰ Ma iming'ingei agoi rani, anan koiyweis, anan kobendatee ng'atuutikyuk, anan kayomisutikyuk, che ki ande taing'wong', ak eng' taitap kwanisyekwok.

¹¹ Mwaei anyun Kamuktaindet ne Toroor ne po lugoosyek, Kamuktaindetap Israel, kole: Ogeero, atokyinok togeennyu aibwok yaityet, agoi ageesu Judah tugul.

¹² Ak anam che ng'etu che po Judah, che kitokyigei emetap Misiri, koba kotebee olooto, ak kigeesu icheek tugul: ibutos eng' emetap Misiri; kigeesu icheek eng' rotwetap chok ak eng' rubeet; pegu icheek, kong'etee ne ming'in agoi ne oo, eng' rotwetap chok ak eng' rubeet: ak koek che kichubei, ak che kikwong'ee, ak che kisasei, ak che kichotei.

¹³ Amu abire icheek che menyei emetap Misiri, ko uu ye ki abir Jerusalem, eng' rotwetap chok, ak eng' rubeet, ak eng' koroito;

¹⁴ kot koma chilil anan kong'et agot agenge eng' che kiga ng'et che po Judah, che ki pa emetap Misiri, kotebee olooto, kole koweek kobwa emetap Judah, emet ne machei kole koweekyigei koba komeny: amu ma piitu ne weechigei kobatee ne chilili.

¹⁵ Ki wol anyun murenik tugul che ki ingen kole kibeeljin osotikwak nyamdutik kamuktaik che teer, ak kwonyiik tugul che kitonondos eng' ole neegit, che kituiyet ne oo, agot piik tugul che ki menyei emetap Misiri, eng' Patros, kowolji Jeremiah koleenji,

¹⁶ Ma kigasun ng'olyoondonooto kemwaiwech eng' kainetap Kamuktaindet ne Toroor.

¹⁷ Ago kiyae iman ng'olyoot age tugul ne kagemwa, keele kibeeljini nyamdutik laitoryatap kipsengwet, ne kwondo, ak keroong'jini ineendet kagoochinoik che kieei, ko uu ye ki keyai, acheek ak kwanisyekyok ak laitorinikyok, ak pounikyok, eng' nganasoogap Judah, ak eng' ortinwek che po Jerusalem: amu ki kitinye eng' peetuusyechooto amitwogik che chaang', ak ki kichamegei, ama ki keer yeityo.

¹⁸ Ago kobooch ngap kebagaakte kebeelji nyamdutik laitoryatap kipsengwet ne kwondo, ak keroong'jini kagoochinoik che kieei, korarwech tuguuk tugul, ak kigeswech eng' rotwetap chok ak rubeet.

¹⁹ Ak ye ki kibeeljini nyamdutik laitoryatap kipsengwet ne kwondo, ak keroong'jini kagoochinoik che kieei, tos ma kikwang'kwang'ji magatiinik che kilasune ineendet, ak keroong'ji kagoochinoik che kieei, koma pooto manong'otaikyok?

²⁰ Ki mwachi anyun Jeremiah piik tugul, murenik, ak kwonyiik, agot piik tugul che kiga kowolji, koleenji,

²¹ Tos ki ma ibwaat `Kamuktaindet ne Toroor icheek ama chut metinnyi, nyamdutik che ki obeele eng' nganasoogap Judah, ak eng' ortinwek che po Jerusalem, okweek ak kwanisyekwok, laitorinikwok, ak pounikwok, ak piigap emet,

²² kot ko mata komuuch Kamuktaindet ne Toroor komuita, amu yaityetap poisyonikwok, ak amu tuguuk che kiwechei che ki oyai? Ki ek anyun emeng'wong' ne kuberot, ak ne kikwong'ee, ak ne kisasei, ama menyei chii, ko uu ye uu rani.

²³ Amu ki obeel nyamdutik, ak amu ki oyachi Kamuktaindet ne Toroor tengekto, ama ogas iit kutitap Kamuktaindet ne Toroor, anan obendate ng'atuutikyik, anan kayomisutikyik, anan paornatosyekyik; konyonjok anyun yaityoni ko uu ye uu rani.

²⁴ Ki mwachi kogeny `Jeremiah piik tugul, kobooto kwonyiik tugul, koleenji: Ogas ng'olyootap Kamuktaindet ne Toroor, okweek Judah tugul che omi emetap Misiri:

²⁵ Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole, ki omwa eng' kutusweekwok, okweek kobooto osotikwok, ak oyai kosulda, eng' eunekwok, oleen, Kiyae iman kaarorunosyek che ki kiaroru, kebeelji nyamdutik laitoryatap kipsengwet ne kwondo, ak keroong'ji kagoochinoik che kieei: ogimiit anyun kaarorunosyekwok, ak oyai kaarorunosyekwok.

²⁶ Ogas anyun ng'olyootap Kamuktaindet ne Toroor, okweek piigap Judah tugul che omenye emetap Misiri: Ogeero, koayosye eng' kainennyu ne oo, mwaei Kamuktaindet ne Toroor, ale, ma komwaei kainennyu chii age tugul ne po Judah eng' emet tugul ne po Misiri, kole, ko uu ye sabei Kiptaiyat Kamuktaindet ne Toroor.

²⁷ Ogeero, ariibe icheek agobo yaityet, ma agobo ne myee: ak kigeesu murenik tugul che po Judah che mi emetap Misiri, eng' rotwetap chok ak eng' rubeet, agoi kogeskei.

²⁸ Ak koweigei icheek che chililee rotwetap chok komong' eng' emetap Misiri, kobwa Judah, che ng'ering'; ak konai tugul che ki kong'et che po Judah, che ki pa emetap Misiri koba kotebee olooto, kole ng'olyootap ng'oo ne isuldoi, nenyu anan nenywa.

²⁹ Ak ni kaboorunet eng' okweek, mwaei Kamuktaindet ne Toroor, ale kabirok eng' olito, si onai ole isuldoi iman ng'aleekyuk koibwok yaityet:

³⁰ Mwaei Kamuktaindet ne Toroor kole: Ogeero, andoi Pharaoh Hopra laitoryatap Misiri, eutap puunikyik, ak eutap icheeget che cheeng'ei saboondanyi; ko uu ye ki ande Zedekiah laitoryatap Judah, eutap Nebukadresar laitoryatap Babilon, punyondennyi, ak ko ne ki cheeng'ei saboondanyi.