JEREMIA 43 - BUKUIT NE TILIIL Sireet ne Dutero Kanon

Kateunet agobo Israel

¹ Ak ye kingo kagogees Jeremiah ng'alaalet ne ki ng'alaaljin piik tugul ng'aleek tugul che po Kamuktaindet ne Toroor Kamuktaindennywa, che kiga koyooktoe Kamuktaindet ne Toroor Kamuktaindennywa ineendet komwachi icheek ng'aleechooto tugul,

² komwa anyun Azariah weeriitap Hosaia, ak Johanan weeriitap Karea, ak piik tugul che meniotin, koleenji Jeremiah, “Imwae lembech. Ma iyogun Kamuktaindet ne Toroor, Kamuktaindennyo inyoo imwa ile, ‘Mobendi Misiri otebee olooto’;

³ ago kaiberberin Baruk weeriitap Neriah si kogirindech, si kobiit kondeech eutap Kaldeik, si kobarech, ak komutech keebe Babilon keegu luulenik. ”

⁴ Ma kas iit anyun kutitap Kamuktaindet ne Toroor Johanan weeriitap Karea, ak kiptainik tugul che po lugoosyek, ak piik tugul, si kobiit komeny emetap Judah.

⁵ Ago ki imut Johanan weeriitap Karea ak kiptainik tugul che po lugoosyek piik tugul che ki ng'et che ki po Judah, che ki weeksei kobunu pororyosyek tugul ole kiga ki oonji, kobwa kotebee Judah;

⁶ murenik, ak kwonyiik, ak lagok ak tiibiigap laitoryat, ak chii age tugul ne kiga kobagaach Nebusaradan kiptaiyatap riibiik kobagakyi Gedalia weeriitap Aikam, weeriitap Sapan, ak maotyot Jeremiah, ak Baruk weeriitap Neriah;

⁷ ak kiit emetap Misiri; amu ki ma kas iit kutitap Kamuktaindet ne Toroor: ak ki pwa agoi Tapanes.

⁸ Yeityo konyonji `ng'olyootap Kamuktaindet ne Toroor Jeremiah eng' Tapanes, koleenji,

⁹ Nam koik che eecheen, ak iung'e matubaruuk oriit eng' ole kiyae matubaruuk, ne mi ole kibunei kebendi kootap Pharaoh eng' Tapanes, kogeerei piigap Judah;

¹⁰ ak ileenji icheek, Mwaei Kamuktaindet ne Toroor ne po lugoosyek, Kamuktaindetap Israel, kole: Ogeero, ayooktoi kimut Nebukadresar laitoryatap Babilon, otwogindennyu, ak ande ng'echerennyi ne po laitornatet paragutap koichu kaauny; ak koiitae paragutap koichooto emainnyi ne po laitornatet.

¹¹ Ak konyo kobar emetap Misiri; che po meet kobendi meet, ak che po luuleet, kobendi luuleet, ak che po rotwetap chok, kobendi rotwetap chok.

¹² Ak alaal maat eng' kooriigap kanamonigap Misiri; ak kobeel ineendet kanamonichooto, ak koip: ak kolaach emetap Misiri, ko uu ye ilaachi mestowot ngoryennyi; ak kwo eng' olooto eng' kaalyeet.

¹³ Putei kogeny tolochigap Beth-shemesh, ne mi emetap Misiri; ak kobeel kooriigap kanamonigap Misiri.