JEREMIA 40 - BUKUIT NE TILIIL Sireet ne Dutero Kanon

Kityaachi Jeremiah

¹ Ki nyoonji Jeremiah `ng'olyoot ne ki punu Kamuktaindet ne Toroor, ye kingo kagotyach Nebusaradan kiptaiyatap riibiik kwo eng' Ramah, ye kiga komut ineendet ko rataat eng' nyororosyek kobooto luulenik tugul che po Jerusalem ak Judah, che kiga kiluul koba Babilon.

² Ki nam anyun kiptaiyatap riibiik Jeremiah, ak koleenji, ki mwa Kamuktaindet ne Toroor Kamuktaindeng'ung' yaityoni agobo olito;

³ ak kagoip yaityonooto konyo, ak koyai ko uu ye ki mwa; amu ki oyachi Kamuktaindet ne Toroor tengekto, ama ogas iit kutinnyi, kagonyonjok anyun kiito.

⁴ Keer anyuno, katyachin rani eng' nyororosyek che mi eung'ung'. Ngot igeer ile myee keebe tuwai Babilon, inyoo keebe, ak ariibin komyee; ago ngot igeere ile ya keebe tuwai Babilon, itebi: keero, mi emoni tugul taing'ung'; ole igeere ile myee ak konyaaljinin iwe, iwe yooto.

⁵ Ak ye ki tomo koweek, kole weege anyun kap Gedalia weeriitap Aikam weeriitap Sapan, ne kigonde laitoryatap Babilon koek pounindet koba nganasoogap Judah, ak komeng'iis kobooto piik: anan iwe oldo age tugul ole igeere ile nyoljinin iwe. Ki igoochi anyun kiptaiyatap riibiik amitwogik ineendet ak kagoochinet ak kounda kwo.

⁶ Ki wo anyun Jeremiah kap Gedalia weeriitap Aikam eng' Mispa, ak komeng'iis kobooto ineendet eng' kwenutap piik che kiga ng'et eng' emet.

Gedalia Pounindetap Judah

⁷ Ak kingo kas kiptainik tugul che po lugoosyek che ki mi emotinwek, icheeget ak murenikwak, kole, kogonde laitoryatap Babilon Gedalia weeriitap Aikam koek pounindet eng' emet, ak kogonde eunnyi murenik, ak kwonyiik, ak lagok, ak piik alak che ki kibananook miising' eng' emet, che po icheek che ki ma kiluul koba Babilon;

⁸ kobwa anyun kap Gedalia eng' Mispa, icheeget ko, Ishmael weeriitap Netania, ak Johanan ak Jonathan weeriigap Karea, ak Seraiah weeriitap Tanumet, ak weeriigap Epai Netopatindet, ak Jesania weeriitap Maakatindet, icheeget kobooto murenikwak.

⁹ Ak ki iyasyechi Gedalia weeriitap Aikam weeriitap Sapan pichooto ak murenikwak, koleenji, amoiywei oot Kaldeik: omeng'iisye eng' emet, ak oot laitoryatap Babilon, si komyeeit eng' okweek.

¹⁰ Ago amenye anee Mispa, si kobiit atonone taitap Kaldeik, che pwonjinech: ago oyum okweek divaik, logoegap kemei, ak mwanik, ak onde tereenikwok, omeny nganasookwok che koonam.

¹¹ Ko uu nooto, kingo kas Yahudik tugul che ki mi Moab, ak che ki mi ak lagogap Ammon, ak che ki mi Edom, kobooto che ki mi emotinwek tugul, kole, ki kobagaach laitoryatap Babilon piik che ki ng'et eng' Judah, ak kole, ki konde Gedalia weeriitap Aikam weeriitap Sapan koboi icheek;

¹² koweek anyun Yahudik tugul eng' komoswek tugul ole kiga ki oonji, ak ki pwa emetap Judah, ole mi Gedalia, eng' Mispa, ak ki iyum divaik ak logoek che chaang' che po kemei.

¹³ Ki pwa kogeny Johanan weeriitap Karea, ak kiptainik tugul che po lugoosyek che ki miitei emotinwek, kap Gedalia eng' Mispa,

¹⁴ ak koleenji tos ingen ile ki iyook Baalis laitoryatap lagogap Ammon Ishmael weeriitap Netania kobarin? Ago ma iyan Gedalia weeriitap Aikam ng'aleekwak.

¹⁵ Kong'alaalji anyun eng' ung'oot, Johanan weeriitap Karea Gedalia eng' Mispa, koleenji, kaigai, ichamwo awo abar Ishmael weeriitap Netania, ama naei chii: amu nee anyun si kobarin, si koyesta Yahudik tugul che ki koyumjingei, ak kobek che ki ng'et che po Judah?

¹⁶ Ago ki leenji Gedalia weeriitap Aikam Johanan weeriitap Karea, Ma myee iyai kiito: amu imwae lembech agobo Ishmael.