JEREMIA 39 - BUKUIT NE TILIIL Sireet ne Dutero Kanon

Kabutetap Jerusalem

¹ Ak kingo kageluul Jerusalem (eng' kenyiitap sogool ne po Zedekiah laitoryatap Judah, eng' arawetap taman, konyo Nebukadresar laitoryatap Babilon kobooto lugeennyi tugul kobookyi Jerusalem, ak koyiem;

² ki kibut nganasanooto eng' kenyiitap taman ak agenge ne po Zedekiah, eng' arawet ne po ang'wan, eng' peetuutap sogool ne po arawanooto:)

³ kobwa anyun neganaset oriit pounik tugul che po laitoryatap Babilon, ak kotebee ormariichet ne po kween, chooto ko Nergal-sareser, Samgar-ne po, Sarsekim, Rap-saris, Nergal-saresar, Reb-mag, kobooto pounik tugul alak che ki ng'et che po laitoryatap Babilon.

⁴ Ak kingo keer Zedekiah laitoryatap Judah ak murenik tugul che po lugeet, pichooto, komwei komanda eng' nganaseet kemoi, kobun ooreetap mbareetap laitoryat, eng' ormariichet ne ki mi kwenutap inatusyek aeng': ak kimandae ooreetap Arabah.

⁵ Ago ki isup icheek lugeetap Kaldeik, ak ki namji Zedekiah warengetap Jeriko: ak kingo kagonam ineendet, komutyi Nebukadresar laitoryatap Babilon ne ki mi Ribla eng' emetap Hamath, ak ki irwookyi ineendet.

⁶ Ki par anyun laitoryatap Babilon weeriigap Zedekiah eng' Ribla, kogeerei ineendet: ki par kogeny laitoryatap Babilon piik che taagunotiin tugul che po Judah.

⁷ Ki par kogeny konyegap Zedekiah, ak korate mugurek si komut kwo Babilon.

⁸ Ak ki peel Kaldeik kootap laitoryat, ak kooriigap piik, ak kobut irimoigap Jerusalem.

⁹ Yeityo komut Nebusaradan kiptaiyatap riibiik, piik che kiga ng'et eng' nganaseet koba Babilon koek luulenik, kobooto piik che ki mwei eng' nganaseet konamgei ak ineendet, kobooto piik che kiga ng'et.

¹⁰ Ago ki pagaakta Nebusaradan kiptaiyatap riibiik, alak che po piik che kibananook, che ki ma kotinyei kiy, eng' emetap Judah, ak kogoochi icheek mbareenigap sabibuk kobooto mbareenik eng' peetuunooto.

Kityaachi Jeremiah

¹¹ Ki ng'at anyun Nebukadresar laitoryatap Babilon Nebusaradan kiptaiyatap riibiik, agobo Jeremiah, koleenji,

¹² imut ineendet ak iriip komyee, ameyachi kiy ne ya; ago yachi ko uu ye mwaun ineendet.

¹³ Ki iyookto anyun Nebusaradan kiptaiyatap riibiik, kobooto Nebusasban, Rab-saris, ak Nergal-saresar ak Rab-mag, ak kiptainik tugul che eecheen che po laitoryatap Babilon;

¹⁴ ki iyookto kimut Jeremiah komong' eng' seremutap riibiik, ak konde ineendet eutap Gedalia weeriitap Aikam, weeriitap Sapan, si kobiit komut ineendet kwo kaa: kimeng'iis anyun eng' kwenutap piik.

Kamang'unet ne po Ebed-melek

¹⁵ Ki nyoonji anyun `ng'olyootap Kamuktaindet ne Toroor Jeremiah, ye kigerat eng' seremutap riibiik, koleenji,

¹⁶ ui, ak ing'alaalji Ebed-melek Ethiopiaindet, ileenji, mwaei Kamuktaindet ne Toroor ne po lugoosyek, Kamuktaindetap Israel, kole: Keero, aipchini ng'aleekyuk nganasani agobo yaityet, ma agobo myeeindo; ak isuldoi eng' taing'ung' eng' peetuunooto.

¹⁷ Ago asaruun eng' peetuunooto, mwaei Kamuktaindet ne Toroor: ama kigoochinin eunegap piik che iywei.

¹⁸ Amu asaruun iman, ama kibarin eng' rotwetap chok, ago iluule sabeeng'ung' kobunjiin: amu ki imang'wa, mwaei Kamuktaindet ne Toroor.