JEREMIA 36 - BUKUIT NE TILIIL Sireet ne Dutero Kanon

Bukuit ne arung'aat

¹ Ki nyoonji Jeremiah ng'olyoondoni ne ki punu Kamuktaindet ne Toroor eng' kenyiit ne po ang'wan ne po Jehoiakim weeriitap Josiah, laitoryatap Judah, koleenji

² nam bukuit ne mamanat, isirchi ng'aleek tugul che koamwaun agobo Israel, ak agobo Judah, ak agobo pororyosyek tugul, kobooch peetuut ne ki ang'alaalun, kobooch peetuusyegap Josiah, agoi peetuuni.

³ Abeere tamangap kogas kootap Judah yaityet tugul ne kaatil ale ayachini icheek; si koweek chii tugul eng' icheek kometo ooreennyi ne ya, si anyochi kaat amu yaityennywa ak tengektonywa.

⁴ Ki kuur anyun Jeremiah Baruk weeriitap Neriah; ak kisir Baruk ng'aleek tugul che po Kamuktaindet ne Toroor che kimwaei Jeremiah, che kiga komwachi `Kamuktaindet ne Toroor ineendet, kosirchi bukuit ne mamanat.

⁵ Ak ki ng'at Jeremiah Baruk, koleenji aa kerat; ma muuchi awo kootap Kamuktaindet ne Toroor:

⁶ ui anyun isoman bukuiniito, ne kaisirchi che kegasena, ng'aleegap Kamuktaindet ne Toroor, soman kogasei piik eng' kootap Kamuktaindet ne Toroor eng' peetuutap karugutetapkei, ak isoman kogeny kogasei piik tugul che po Judah che punu nganasookwak.

⁷ Tamangap komwaita soomutikwak eng' taitap Kamuktaindet ne Toroor, ak koweek chii age tugul kometo ooreennyi ne ya, amu eecheen nereegek kobooto nereegek che ng'woneen che ki komwa Kamuktaindet ne Toroor agobo pichu.

⁸ Ak ki yai Baruk weeriitap Neriah ko uu tugul che ki ng'at maotyot Jeremiah ineendet, kosoman eng' bukuit ng'aleegap Kamuktaindet ne Toroor eng' kootap Kamuktaindet ne Toroor.

⁹ Ak eng' kenyiit ne po muut ne po Jehoiakim weeriitap Josiah, laitoryatap Judah, eng' arawetap sogool, komwaita piik tugul eng' Jerusalem, kobooto piik tugul che ki punu nganasoogap Judah kobwanei Jerusalem, karugutetapkei eng' taitap Kamuktaindet ne Toroor.

¹⁰ Kisoman anyun Baruk ng'aleegap Jeremiah che ki kisirchi bukuit, eng' kootap Kamuktaindet ne Toroor, eng' koot ne po oriit ne po Gemaria weeriitap Sapan siriindet, eng' seremut ne po meto, eng' ole kimandoe ne po ormariichet ne leel ne po kootap Kamuktaindet ne Toroor, kisooman kogasei piik tugul.

Kesomani Bukuit

¹¹ Ak ye kingo kas Mikaia weeriitap Gemaria, weeriitap Sapan, ng'aleechooto tugul po Kamuktaindet ne Toroor eng' bukuit,

¹² kochoortagei kwo kootap laitoryat, koot ne po oriit ne po siriindet; ak ki tebyei eng' olooto pounik tugul chooto ko: Elisama siriindet, Delaiah weeriitap Semaiah, Elnatan weeriitap Akbor, ak Gemaria weeriitap Sapan, ak Zedekiah weeriitap Hananiah, ak pounik tugul.

¹³ Komwachi anyun Mikaia icheek ng'aleek tugul che kagas, ye kisomani Baruk bukuit kogasei piik.

¹⁴ Koyookto anyun pounik tugul Jeudi weeriitap Netania, weeriitap Selemya, weeriitap Kusi, kwo ole mi Baruk, koleenji nam eng' eung'ung' bukuit ne kesomanjini piik kogas, ak inyoo. Konam anyun Baruk weeriitap Neriah eng' eunnyi bukuinooto, ak konyo ole mi pichooto.

¹⁵ Ak ki leenji icheek ineendet, Tebi ng'wony anyun, ak isoman kegas. Kosoman anyun Baruk kogasei pichooto.

¹⁶ Kingo kagogas ng'aleechooto tugul anyun, kogeerotkei eng' kaiyweisyet, ak koleenji Baruk, Kimwachini iman laitoryat ng'aleechuuto tugul.

¹⁷ Yeityo koteebe icheek Baruk koleenji mwaiwech anyun ole ki itepte si isir ng'aleechuuto komwaei ineendet:

¹⁸ Kowolji anyun Baruk icheek koleenji kimwaiwo ng'aleechuuto tugul, ak ki asirchi bukuit eng' wino.

¹⁹ Yeityo komwachi pounik Baruk, koleenji, ui unygei, inyee ak Jeremiah; among' konai chii ole omi.

Peelseetap bukuit

²⁰ Ki pa anyun kaplaitoryat eng' seremut; ago kiga konde bukuinooto koot ne po oriit ne po Elisama siriindet; ak ki mwachi laitoryat ng'aleechooto tugul kogas.

²¹ Koyookto anyun laitoryat Jeudi kwo koip bukuit: ak ki inem eng' koot ne po oriit ne po Elisama siriindet. Ak kisooman Jeudi kogas laitoryat, ak kogas pounik tugul che kitonondos eng' ole neegitee laitoryat.

²² Ki tebee laitoryat koot ne ki menyei eng' peetuusyegap kaitityet eng' arawetap sogool: ak kimi maat ne kilalei eng' kisigirit eng' tainnyi.

²³ Ak kingo kagosoman Jeudi kartasisyek somok anan ang'wan, kotil laitoryat eng' rotweet, ak kowiirchi maata kimi kisigirit, agoi kolal bukuit komugul kogeskei eng' maata.

²⁴ Ma iyweis, ama peet ngoroikwak, laitoryat, anan age eng' otwogikyik ne kigasei ng'aleechooto tugul.

²⁵ Ki igaigai anyun Elnatan ak Delaiah ak Gemaria laitoryat, si ma peel bukuit: ago ma kasyi.

²⁶ Ak ki ng'at laitoryat Jerameel weeriitap laitoryat, kobooto Seraiah weeriitap Asriel, ak Selemya weeriitap Abdeel, konam Baruk siriindet ak maotyot Jeremiah: ago kiuny `Kamuktaindet ne Toroor icheek.

Kotetu Jeremiah kesir bukuit age

²⁷ Ki nyoonji anyun `ng'olyootap Kamuktaindet ne Toroor Jeremiah, ko kagobeel laitoryat bukuit, ak ng'aleek che kisirei Baruk komwaei Jeremiah, koleenji

²⁸ nam bukuit age kogeny, ak isirchi ng'aleechooto tugul po tai che ki mi bukuit ne po tai ne kibeelei Jehoiakim laitoryatap Judah.

²⁹ Ak imwa agobo Jehoiakim laitoryatap Judah ile, Mwaei Kamuktaindet ne Toroor kole: Ki ibeel bukuinooto, ile, Amu nee si isir, ile, Nyoonei laitoryatap Babilon iman kong'emei emoni, ak kowong' eng' olito chii ak tyony?

³⁰ Mwaei anyun Kamuktaindet ne Toroor agobo Jehoiakim laitoryatap Judah ko uu ni kole: Ma sichei chii ne tebee ng'echereetap laitornatet ne po Daudi: ak ki wiirtoi muustonyi peet kobir asiista, ak kotebee kaititindo kemoi.

³¹ Ak abire ineendet ak iyotennyi, kobooto otwogikyik amu tengektonywa; ak aipchini icheek ak piik che menyei Jerusalem, kobooto piigap Judah, yaityet tugul ne ki amwa agobo icheek, ago ma kas.

³² Ki nam anyun Jeremiah bukuit age ne mamanat, ak kogoochi Baruk siriindet, weeriitap Neriah; ne ki sirchi ng'aleek tugul che kimwaei Jeremiah che ki mi bukuit, ne kiga kobeel Jehoiakim laitoryat ne po Judah: ak ki kitesyi ng'aleek alak che chaang' che kergei ak chugiche.