JEREMIA 34 - BUKUIT NE TILIIL Sireet ne Dutero Kanon

Kateunet agobo Zedekiah

¹ Ki nyoonji Jeremiah `ng'olyoot ne ki punu Kamuktaindet ne Toroor, ye ki pargei Nebukadnezar laitoryatap Babilon, ak lugeennyi tugul, ak pounatosyek tugul che po ng'wony che ki mi pounatennyi, ak pororyosyek tugul kobaregei ak Jerusalem, ak nganasookyik tugul, koleenji:

² Mwaei Kamuktaindet ne Toroor, Kamuktaindetap Israel kole ui ing'alaalji Zedekiah laitoryatap Judah ileenji, mwaei Kamuktaindet ne Toroor kole, Keero, agoochini nganasani eutap laitoryatap Babilon, ak kobeel eng' maat:

³ amechililee eunnyi, ago kiluulin iman, ak kindein eunnyi, ak igeer laitoryatap Babilon togoch, ak ong'alaal tuwai kimni, ak iwe Babilon.

⁴ Ago kas ng'olyootap Kamuktaindet ne Toroor, ee Zedekiah laitoryatap Judah: mwaei Kamuktaindet ne Toroor agobo inyee kole, Memee eng' rotwetap chok;

⁵ imee eng' kaalyeet; ak peelun icheek ko uu nooto ko uu ye kigebeelji kwanisyeguk, laitorinik che po tai che ki indounenen; ak koriirchin, kole, “Pwo kiptaiyat! Amu kaamwa ng'olyoot,” mwaei Kamuktaindet ne Toroor.

⁶ Yeityo komwachi maotyot Jeremiah Zedekiah laitoryatap Judah ng'aleechooto tugul eng' Jerusalem,

⁷ ye ki paregei lugeetap laitoryatap Babilon ak Jerusalem, ak kobargei ak nganasook tugul che po Judah che kigang'et, kobargei ak Lakish ak Aseka; amu chuuto kityo nganasook che ng'ootaatiin che po Judah che ki ng'et.

Katyaget agobo otwogik

⁸ Ki nyoonji Jeremiah `ng'olyoot ne ki punu Kamuktaindet ne Toroor, ye kingo kagoyai Laitoryat Zedekiah arorutyet kobooto piik tugul che ki mi Jerusalem, kole, komwaita katyaget eng' icheek;

⁹ kole kotyach chii tugul otwogindennyi ne muren ak otwogindennyi ne tye, ngo Yahudyot ne muren anan ne tye, kotyach kwo; si ma piit age tugul eng' icheek ne otei age, nooto ko koot Yahudyot tupchennyi.

¹⁰ Ak ki kas iit pounik tugul ak piik tugul che kiga yai arorutyonooto, kole ityaachi chii age tugul otwogindennyi, ne muren, ak kotyach chii age tugul otwogindennyi ne tye kwo, kole ma mi chii eng' icheek ne otei age kogeny; ki kas iit ng'olyoondonooto, ak kogoochi icheek koba:

¹¹ ago eng' let, kowalak icheek, ak koweech kogeny otwogik ak otwogik che tiibiik, che kiga kotyach koba, ak komut icheek kogas iit koek otwogik, ak otwogik che tiibiik.

¹² Ki nyoonji anyun `ng'olyootap Kamuktaindet ne Toroor Jeremiah ne ki punu Kamuktaindet ne Toroor, koleenji,

¹³ mwaei Kamuktaindet ne Toroor, Kamuktaindetap Israel, kole: ki kiyomiske ak kwanisyekwok eng' peetuut ne ki amutu icheek komong' eng' emetap Misiri, komong' eng' kootap otwoknateet aleenji,

¹⁴ Ye ibata kenyiisyek tisabu, kotyach chii age tugul eng' okweek tupchennyi ne Yahudyot, ne kigeal, ago ki kootin eng' kenyiisyek lo, ityaachi ineendet kwo: ago ki ma kasa kwanisyekwok, anan koepcha iit.

¹⁵ Ak ki owalage anyun, ak kiga oyai kiit ne myee eng' tainnyu, omwaitoi katyaget eng' chii age tugul eng' chiitap kokwennyi; ak kiga oyai arorutyet eng' tainnyu eng' koot ne kimwaitoe kainennyu:

¹⁶ ago ki owalage ong'wanit kainennyu, ak koweech chii age tugul otwogindennyi, ak otwogindennyi ne tye, che koga otyach koba eng' poiboiyennywa, ak koomutu icheek kogas iit, koek otwogik ak otwogik che tiibiik, eng' okweek.

¹⁷ Mwaei anyun Kamuktaindet ne Toroor kole: Ma oepcha iit, si omwaite katyaget, eng' chii age tugul eng' tupchennyi, ak eng' chii age tugul eng' chiitap kokwennyi: ogeero, amwaiwok katyaget, mwaei Kamuktaindet ne Toroor, ne po rotwetap chok, ne po koroito, ak ne po rubeet; ak agoitook kewiirchok komosi ak komosi eng' pounatosyek tugul che po ng'wony.

¹⁸ Ak agoitoi piik che ki kobistoe kayomisennyu, che ma yai ng'aleegap arorutyet ne kiga koyai eng' tainnyu, ye kipcheune aeng' moita ak kobun kwenutap kebeberwekyik;

¹⁹ pounigap Judah, ak pounigap Jerusalem, kiptainik, ak tisiik, ak piik tugul che po emet, che ki pun kwenutap kebeberwechooto po moita;

²⁰ agoitoi icheek koba eutap puunikwak, ak koba eutap icheek che cheeng'ei saboonwekwak: ak koek muuswekwak amitwogigap toriitigap parak, ak che po tyong'igap ng'wony.

²¹ Ak agoitoi Zedekiah laitoryatap Judah ak pounikyik koba eutap puunikwak, ak koba eutap icheek che cheeng'ei saboonwekwak, ak eutap lugeetap laitoryatap Babilon, che ki pa eng' oli omi.

²² Ogeero, ang'ate, mwaei Kamuktaindet ne Toroor, ak aweekyi icheek nganasani; ak kobargei ak nganasani, ak koluul, ak kobeel: ak ayai nganasoogap Judah koek surkwen, ole ma komenyei chii.