JEREMIA 20 - BUKUIT NE TILIIL Sireet ne Dutero Kanon

Jeremiah ak Pasur

¹ Ki kas anyun Pasur weeriitap Imer tisiindet, ne ki pounindet ne oo eng' kootap Kamuktaindet ne Toroor, komaoteni Jeremiah agobo tuguuchuuto.

² Ki pir anyun Pasur maotyot Jeremiah, ak koratyi ineendet keetiik keelyekyik, eng' ormariichet ne po meto ne po Benjamin, ne ki mi kootap Kamuktaindet ne Toroor.

³ Ak ki ityaach Pasur Jeremiah komong' eng' keetichooto eng' peetuut ne po aeng'. Ki leenji anyun Jeremiah ineendet, Ma kuure Kamuktaindet ne Toroor kaineng'ung' Pasur, ago kaguurenen Mogor-misabip.

⁴ Amu mwaei Kamuktaindet ne Toroor kole, keero, ayain iegu kamuiset ne imuege, ak ne imue choronoguk tugul: ak kobar icheek puunikwak eng' rotwetap chok, ak igeer nooto: ak agoite Judah tugul koba eutap laitoryatap Babilon, ak koluul icheek koba Babilon, ak kobare rotwetap chok.

⁵ Ak agoite kogeny mogornatosyek tugul che po nganasani, ak kelunaikyik tugul, ak tuguukyik tugul che po kamanuutyet, ee konoraik tugul che po laitorinigap Judah, koba eunegap puunikwak, che luulei tuguuchooto, ak konam, ak koip koba Babilon.

⁶ Ak inyee Pasur, keluulok kobooto piik tugul che menyei koong'ung'; ak iit Babilon, ak imechi olooto, ak ketupchin olooto, inyee ak choronoguk tugul, che ki imaotenji lembech.

⁷ Ee Kamuktaindet ne Toroor, ki iberbera, ak ki aberberage: ii kiim isiira, ak ki iterteerisye: kaaegu ne kirorechin peetuut komugul, churochura age tugul.

⁸ Amu kotugul ye ang'alaali, awaache; awaache ale, Koroomnateet ak luuleet: amu kagiyai ng'olyootap Kamuktaindet ne Toroor koek chotisyet eng' anee, ak aegu ne kirorechin eng' peetuut komugul.

⁹ Ak ngot amwa ale, Ma mwaei kiy agobo ineendet, anan ang'alaal eng' kainennyi, kobiit anyun eng' muguleldanyu ko uu maat ne lalei eng' kawekyuk, ak ang'et eng' muitaet, ak ma muuchi asiis.

¹⁰ Amu koagas kateweerisyetap che chaang', kamuiset eng' komosta age tugul. Mwaei choronokyuk tugul che achame, che machei kotaama, kole, omwaite, si kemwaite ineendet; tamangap kigaigai, si kiterteer ineendet ak kiyaaktochinegei mugetuut.

¹¹ Ago mi Kamuktaindet ne Toroor kobooto ko uu ineendet ne kiim ak komuisei: kinachi anyun usiikyuk, ama iterteerisyei: ililandos kot, amu ma yai eng' ng'omnateet, ak ma koi kiutye teweernatennywa ne po koigeny.

¹² Ago, ee Kamuktaindet ne Toroor ne po lugoosyek, ne ityeme chii ne po iman, ne igeere kabwaatutik ak muguleldo, koono ageer ye iyaakyini mugetuut icheek; amu ki ang'ang'un ng'olyoondennyu.

¹³ Otyenji Kamuktaindet ne Toroor, olasu Kamuktaindet ne Toroor amu kigosar saboondap ne ma tinyei kiy eng' eunegap yaigap yaityet.

¹⁴ Ingochubok peetuut ne ki kisigena: amat kiberuur peetuut ne kisigena kamennyu.

¹⁵ Ingochubok chiito ne ki ipchin logoiywek che myach kwandanyu, koleenjin, Kagesigun weeriit; ne ki ibaibai ineendet kot.

¹⁶ Ak ingoigei chiichooto nganasook che ki kogabui Kamuktaindet ne Toroor, ama sik: ak ingogas riirek karon, ak waagaat peet kween;

¹⁷ amu ma para ami moo; si koek kamennyu kererinnyu, ak koeet moennyi kotugul.

¹⁸ Amu nee anyun si among' eng' moo, si ageer pirtoetapkei ak arageneet, kot kogeskei peetuusyekyuk eng' kalilanet?