JEREMIA 17 - BUKUIT NE TILIIL Sireet ne Dutero Kanon

Tengektap Judah

¹ Ki kisire lelutiktap Judah kalamitap karnet kobooto ng'atibindap koita ne ui; ki kimolji mugulelwekwak ak eng' kimnateet ne po kuinoigap kapkorosusyekwak;

² kota kobwaati lagokwak, kapkorosusyekwak, ak Aserik che mi ole mi keetiik che tuonen eng' tuloonook parak,

³ ak eng' tulweennyu ne mi kewanin. Achandoi keip tuguuguk che po kamanuut ak konoraiguk tugul, ak komosweguk che torooreen, amu tengekto eng' kiwotosyeguk tugul.

⁴ Ak ibagaaktoi aginye poroteng'ung' ne ki agoonin; ak agoonin ioot puuniguk eng' emet ne mengen: amu ki olaal maat eng' nereegekyuk, ne lalei koigeny.

Mwautik che teer teer

⁵ Mwaei Kamuktaindet ne Toroor kole: Chuboot chii ne imang'u kipkosabei, ak kotiegei kipkosabei, ineendet ne istoegei muguleldanyi Kamuktaindet ne Toroor.

⁶ Amu igeitu sondiit eng' surkwen, ama keerei ye piitu myeeindo; ago menyei komoswek che yamyotiin eng' surkwen, emetap muunyuk ole ma menyei chii.

⁷ Iberuurot chiito ne imang'u Kamuktaindet ne Toroor, ak ko ne kamang'unennyi Kamuktaindet ne Toroor.

⁸ Amu igeitu ineendet keetit ne ki kiminji ole neegitee peek, ak kowaktoi tigitikyik eng' ole neegitee aineet, amaiyweisyei ye piitu kiptoret, ago tuonitu sogekyik; ama arageni eng' kenyiitap kemeut, ama metoi kooi logoek.

⁹ Kaberberin muguleldo kosiir tuguuk tugul, ak ko ya miising': ng'oo ne imuuchi konai?

¹⁰ Anee Kamuktaindet ne Toroor kasiagindetap muguleldo, atyeme kabwaatutik, si agoochi chii age tugul ko uu ortinwekyik, ak logoegap poisyonikyik.

¹¹ Ko uu taiywet ne igeenyi aarek che ma chechiik, uu nooto ne nyooru mogornatosyek ama eng' iman; petos kota kosabei ineendet, ak koek ineendet eng' kagesunennyi chiito ne perber.

¹² Uu kapkorosunnyo ng'echereetap toroornatet, ne ki kinde ole toroor kobooch taunet.

¹³ Ee Kamuktaindet ne Toroor, inyee ne ii kamang'unetap Israel, kiyaei kolililan icheek tugul che metoin; kisirchin ng'wony icheek che istoenagei, amu ki kometa Kamuktaindet ne Toroor, kondametutap peek che saptos.

¹⁴ Isooba, ee Kamuktaindet ne Toroor si asap; sarwo, si anyoor saruunet; amu ii kalasunennyu.

¹⁵ Keero, mwaiwo icheek koleenjino, “Mi ano ng'olyootap Kamuktaindet ne Toroor? Ingonyo nguno!”

¹⁶ Ma achakte anee kot abagaakte asubin aek mestowot; ama amach peetuutap riirek. Ingen inyee kiit ne ki mang'une kutinnyu; kimi taing'ung'.

¹⁷ Amat imua; ii ole amwechini eng' peetuutap yaityet.

¹⁸ Ingolilanso che usa, ago megoono alilan; ingoaragenso icheek, ago megoono aaragen: ipchi icheek peetuutap yaityet, ak ing'eme icheek ng'emisyet konyil aeng'.

Ng'aleek agobo sabato

¹⁹ Kimwaiwo Kamuktaindet ne Toroor kole: Ui, itonone ormariichetap piik, ole mang'une laitorinigap Judah, ak komandoe, ak eng' ormariichok tugul che po Jerusalem;

²⁰ ak ileenji icheek, Ogas ng'olyootap Kamuktaindet ne Toroor, okweek laitorinigap Judah, ak Judah komugul, ak piik tugul che menyei Jerusalem, che obendi oriit obune ormariichochuuto;

²¹ Mwaei Kamuktaindet ne Toroor kole: Oriipkei, amoip laut age tugul eng' peetuutap sabato, anan oibu kobun ormariichogap Jerusalem;

²² anan oip lautik eng' kooriikwok eng' peetuutap sabato, amoyai poisyo age tugul: ago otabaan peetuutap sabato, ko uu ye ki ang'at kwanisyekwok;

²³ ago ma kas, anan koep iit, ago ki iuit kaatwekwak, si ma kas, ak kotaach kaneetisyet.

²⁴ Ak ngot oepcha iit eng' kagiiletapkei, mwaei Kamuktaindet ne Toroor, si moibu laut age tugul kobun ormariichogap nganasani eng' peetuutap sabato, ago otabaan peetuutap sabato, amoyai poisyo age tugul eng' peetuunooto;

²⁵ pwoonei anyun oriit laitorinik ak pounik che tebee ng'echereetap laitornatet ne po Daudi, kobunu ormariichogap nganasani, kolong'onu kariisyek ak paraisisyek, icheeget ak pounikwak, piigap Judah, ak piik che menyei Jerusalem: ak kemeny nganasani agoi.

²⁶ Ak kobwa kobunu nganasoogap Judah, ak komoswek che kiyiem Jerusalem, ak che punu emetap Benjamin, ak emet ne soi, ak che punu tuloonook, ak che punu murot tai, koibu kagoochinoik che kibeelei, ak tiseiywek, ak kagoochinoigap peek che ng'ootiin, ak tuguuk che nyamdut, ak koibu korosegap kongoi, kobwa kootap Kamuktaindet ne Toroor.

²⁷ Ago ngot ko mogasa iit otabaan peetuutap sabato, amoip laut age tugul ak obe oriit obun ormariichogap Jerusalem eng' peetuutap sabato; alaal anyun maat eng' ormariichokyik, si kobeel kooriigap laitoryat che po Jerusalem, ama kimisi.