JEREMIA 14 - BUKUIT NE TILIIL Sireet ne Dutero Kanon

Kemeut ne piitu eng' Judah

¹ Ki nyoonji Jeremiah ng'olyootap Kamuktaindet ne Toroor agobo kemeut.

² Ki mwa kole, itei Judah ak nyaluldos ormariichokyik, tebyei piikyik koteitos, ak kotogosta riiregap Jerusalem.

³ Iyooktoi piikwak che taagunotiin kiboitiinikwak koba ole mi peek: pendi agoi keriingonik, ama nyooru peek. Weeksei kiboitiinik puch ak tereenikwak; kolililandos, kotoptobendos ak kogatuch metowekwak eng' arageneet.

⁴ Ililandos che ibatisye ak kotuchei metowekwak, amu emet ne ki kobetak, ak amu ki ma kota komi ropta emet.

⁵ Ee, yiei kenyeleet agine eng' kewanin, ak kobagaakta arwennyi, amu ma mi susweek.

⁶ Tonondos ak icheek sigirogap timiin eng' tuloonook che churyotin, isyendos ko uu lelwek; imenitu konyekwak, amu ma komi kiy ne tuon.

⁷ Nga paoryanjinech tengekwogikyok, iboisye ee Kamuktaindet ne Toroor, amu kaineng'ung'. Amu chaang' kachuchugosyekyok pogei, ak kigeyaun acheek tengek.

⁸ Ee inyee kamang'unetap Israel, yetindennyi eng' peetuutap nyalilda, amu nee si iige toondet eng' emet, ak iige kiprutoiyot ne mastoi koruei kemout agenge?

⁹ Amu nee si iige chii ne kakwong', kalya iige chii ne kiim, ne ma imuuch kosaruunis? Ago inyee, ee Kamuktaindet ne Toroor, imi kwenunnyo ak kimwaitaenech kaineng'ung'; amemetech.

¹⁰ Mwachin Kamuktaindet ne Toroor pichu kole; “Ki cham ko uu nooto koombenso; tomo koisto keelyekwak. Mataachei anyun anee icheek amu nooto. Ago abwaati aneendet tengektonywa, ak aityin pireet amu tengekwogikwak.”

¹¹ Ak kimwaiwo Kamuktaindet ne Toroor koleenjo, “Amat isaa isomji pichu myeeindo.

¹² Agot ye irugutkei icheek, koma kase riirekwak, ak ye igoito kagoochinet ne kibeelei, kobooto kagoochinetap peek che ng'ootiin, ko mataache. Ago ageesu icheek eng' rotwetap chok, rubeet ak koroito.”

¹³ Ago ki amwa anyun ale, ee, Kiptaiyat Kamuktaindet ne Toroor! Keero, mwachin maotik icheek, koleenji, “ ‘Maityinok rotwetap chok, amonyooru rubeet; ago agoonok kaalyeet ne po iman eng' olito.’ ”

¹⁴ Ago ki leenjo anyun Kamuktaindet ne Toroor, maoteni maotik lembechek eng' kainennyu. Ma ayookte icheek, ama ang'at icheek anan ang'alaalji. Maotenwok ng'ang'utyet ne po lembech, kobooto ng'oorset ak kiit ne po puch ak kaberberisyetap mugulelwekwak.

¹⁵ Amu nooto anyun komwae Kamuktaindet ne Toroor ko uu ni agobo maotik che maoteni eng' kainennyu; Nga ma ayookte icheek, komwae komwaei icheek koleen, ma piitu rotwetap chok anan rubeet eng' emoni. Kigeesu maotichooto eng' rotwetap chok ak rubeet.

¹⁶ Ak kewiirchi ortinwek che po Jerusalem piik che ki maotenjin, amu rubeet ak rotwetap chok. Ama piitu chii ne tubei icheek, osotikwak, weeriikwak ak tiibiikwak. Amu aroong'jini icheeget yaityennywa.

¹⁷ Mwachi icheek ng'olyoondoni ileenji, “Ingoba peekyuk po kong' kemoi ak peet, amat kosiisyo, amu kail ne pergeiyat, nooto piikyuk, eng' ilet ne oo ak eng' kaguotenet ne ng'waan miising'.

¹⁸ Ngot ale awo mbar, ageere che ki kebare rotwetap chok! Ak ngot ale awo nganaseet, ageere ale miitei che nyaluldos amu rubeet! Amu pendoti eng' emet maotik ak tisiik ama tinyei naet.”

¹⁹ Tos ki ieesye Judah iman? Tos kigowech saboondang'ung' Zion? Amu nee si ibirech, ama mi kasoobet eng' acheek? Ki kigen kaalyeet, ago ma nyo kiy ne myee; ki kigen peetuutap kasoobet ak keero, ki piit arageneet!

²⁰ Ee Kamuktaindet ne Toroor, king'aanye tengektonyo, ak yaityetap kwanisyekyok, amu kigeyaun tengekto.

²¹ Amat iwechech amu kaineng'ung', ameteweer ng'echereetap laitornatet ne po toroornateng'ung'. Ibwaat, amat ibut kayomiset ne kigaiyomiswech.

²² Tos mi eng' age tugul eng' kanamonik che ma tilei kiy che po pororyosyek, ne imuuchi kogoon ropta? Anan tos imuuchi kipsengwet kogoon ropta ne inesi? Tos ma inyeendet Kamuktaindet ne Toroor, Kamuktaindennyo? Ara anyun kimang'un inyee, amu inyee ne yae tuguuchuuto tugul.